មន្ត្រីតុលាការនិងនគរបាលបានឲ្យដឹងកាលពីម្សិលមិញថា សាលាដំបូងរាជធានីភ្នំពេញបានសាកសួរពាណិជ្ជករចំនួនពីរនាក់កាលពីម្សិលមិញ ជុំវិញការចោទប្រកាន់ពីបទឆបោក និងពីបទប្រើឯកសារសាធារណៈក្លែងក្លាយ និងជុំវិញការអះអាងថា ពួកគេបានក្លែងបន្លំហត្ថលេខារបស់លោកនាយករដ្ឋមន្ត្រី ហ៊ុន សែន នៅក្នុងកិច្ចព្រមព្រៀងរុករករ៉ែ។
ព្រះរាជអាជ្ញារង វ៉ា សក្តា បានឲ្យដឹងថា ជនជាតិខ្មែរម្នាក់ឈ្មោះ អាល់ រុំនី អាយុ៤១ឆ្នាំ និងជនជាតិចិនឈ្មោះ ជីន មីងស៊ីន (ChinMingxin) អាយុ៤៥ឆ្នាំ ត្រូវបានតុលាការសាកសួរកាលពីម្សិលមិញ។ លោកស្រី សក្តា បានថ្លែងថា “ខ្ញុំបានស្នើឲ្យមានការចោទប្រកាន់ពីបទឆបោក និងប្រើឯកសារសាធារណៈក្លែង ក្លាយ ហើយខ្ញុំបានបញ្ជូនសំណុំរឿងនេះទៅចៅក្រមសាកសួររួចហើយ”។
លោកស្រីបានបដិសេធមិនផ្តល់សេចក្តីលម្អិតបន្ថែមទៀតឡើយ។ ចៅក្រមសាកសួរ តែ សំអាង បានឲ្យដឹងថា លោកកំពុងតែសាកសួរបុរសទាំងពីរនាក់នេះនៅឡើយ ហើយគិតត្រឹមយប់ម្សិលមិញនេះ លោកមិនទាន់បានចោទប្រកាន់ពួកគេនៅឡើយទេ។
ឧត្តមសេនីយ៍ឯក គៀត ច័ន្ទថារិទ្ធអ្នកនាំពាក្យនគរបាលជាតិ បានឲ្យដឹងថា មន្ត្រីមានសមត្ថកិច្ចបានស៊ើបអង្កេតករណីនេះមែន ប៉ុន្តែបានបញ្ជាក់ថា លោកមិនដឹងច្បាស់ពីសេចក្តីលម្អិតទេ។ មន្ត្រីនគរបាលព្រហ្មទណ្ឌម្នាក់នៅក្រសួងមហាផ្ទៃ ដែលនិយាយក្នុងលក្ខខណ្ឌអនាមិកដោយសារខ្លួនមិនត្រូវបានអនុញ្ញាតឲ្យនិយាយជាមួយបណ្តាញព័ត៌មាន ប្រាប់អត្តសញ្ញាណបុរសទាំងពីរនាក់នេះថា មានឈ្មោះ រុំនី ជាប្រធានក្រុមហ៊ុន ACICA Group of Companies
និងដៃគូពាណិជ្ចកម្មរបស់ខ្លួនឈ្មោះ ជីន ដែលត្រូវបានចាប់ខ្លួនកាលពីថ្ងៃសៅរ៍ក្នុងរាជធានីភ្នំពេញ។
លោកបានមានប្រសាសន៍ថា នគរបាលបានទទួលពាក្យបណ្តឹងមួយ ដែលចោទប្រកាន់លោក រុំនី និងលោក ជីន ពីបទឆបោកជនរងគ្រោះមិនបញ្ចេញអត្តសញ្ញាណម្នាក់នូវទឹកប្រាក់ចំនួន៨១០.០០០ដុល្លារ ដោយប្រើឯកសារក្លែងក្លាយក្នុងកិច្ចព្រមព្រៀងមួយ ដែលមានទឹកប្រាក់ប្រហែល៦លានដុល្លារស្តីពីការលក់អាជ្ញាប័ណ្ណរុករករ៉ែមួយនៅក្នុងខេត្តមណ្ឌលគិរី។
មន្ត្រីរូបនេះបានឲ្យដឹងថា “ជនសង្ស័យត្រូវបានចោទប្រកាន់ពីបទប្រើឯកសារខុសច្បាប់ពីក្រសួងឧស្សាហកម្ម រ៉ែ និងថាមពល លិខិតខុសច្បាប់មួយពីក្រសួងទំនាក់ទំនងរដ្ឋសភា ព្រឹទ្ធសភា និងអធិការកិច្ច ព្រមទាំងហត្ថលេខាក្លែងក្លាយរបស់លោកនាយករដ្ឋមន្ត្រី ហ៊ុន សែន ដើម្បីបោកជនរងគ្រោះយកប្រាក់ចំនួន៨១០.០០០ដុល្លារ”។
ក្នុងគេហទំព័ររបស់ ACICA Group មានការអះអាងថា ក្រៅពីអាជីវកម្មរ៉ែ ក្រុមហ៊ុននេះមានគម្រោង ដែលត្រូវបានអនុម័តរួចជាច្រើនទៀតនៅក្នុងប្រទេសកម្ពុជា។ គម្រោងដែលត្រូវបានបង្ហោះនៅលើគេហទំព័រដែលអះអាងថា សុទ្ធតែមានការចុះហត្ថលេខាពីលោក ហ៊ុន សែន នេះ រួមមាន “សម្បទានឯកជនភាវូបនីយកម្មទឹក និងសំណល់រាវសម្រាប់រយៈពេល៧០ឆ្នាំតាមគម្រោងBOO/BOT [សាងសង់ ប្រតិបត្តិការ កាន់កាប់/សាងសង់ ប្រតិបត្តិការផ្ទេរ]សម្រាប់ខេត្តចំនួន១៨នៅក្នុងប្រទេសកម្ពុជា] ចម្ការដូងប្រេងទំហំ៣៧.៥៧០ហិកតានៅខេត្តកោះកុង និងការសម្រេចយល់ព្រមឲ្យក្រុមហ៊ុននេះធ្វើការសិក្សាលើ“ គម្រោងសាងសង់រោងចក្រផលិតថាមពលវារីអគិ្គសនី”នៅលើទន្លេមេគង្គ។
នៅក្នុងខែកញ្ញាឆ្នាំ២០១២ ក្រុមហ៊ុននេះបានអះអាងថា នឹងបង្កើតរោងចក្ររថយន្ត ACICA Automotive (Cambodia) ដែលនឹងផលិតរថយន្តផលិតនៅកម្ពុជា៕
(រាយការណ៍បន្ថែមដោយ Simon Lewis)
ប្រែសម្រួលដោយ ចេវ ប៊ុននី