មេធាវីមួយរូបបានលើកឡើងកាលពីម្សិលមិញថា សាលាដំបូងខេត្តរតនគិរី កាលពីម្សិលមិញបានលើកលែងការចោទប្រកាន់មន្ត្រីកងរាជអាវុធហត្ថម្នាក់ និងប្រពន្ធរបស់គាត់ដែលគេសង្ស័យថា មានជាប់ពាក់ព័ន្ធនៅក្នុងការធ្វើឃាតអ្នកកាសែតស៊ើបអង្កេតម្នាក់ ហើយបានបង្គាប់ឲ្យមានការដោះលែងប្ដីប្រពន្ធទាំងពីរនេះ។
លោក ហង្ស សេរីឧត្តម អាយុ៤២ឆ្នាំ ជាអ្នកយកព័ត៌មានឲ្យកាសែតវីរជនខ្មែរ ត្រូវគេកាប់សម្លាប់ រួចហើយញាត់ចូលទៅក្នុងគូទរថយន្តម៉ាកតូយ៉ូតាកាមរី របស់គាត់ នៅក្នុងស្រុកអូរជុំ កាលពីថ្ងៃទី១១ ខែកញ្ញាឆ្នាំមុន។ ហើយនៅប៉ុន្មានខែមុនការធ្វើឃាតលោកបានសរសេរព័ត៌មានអំពីមន្ត្រីដែលជាប់ពាក់ព័ន្ធក្នុងការរកស៊ីឈើប្រណីតដោយខុសច្បាប់។
ពីរថ្ងៃបន្ទាប់ពីគេបានរកឃើញសាកសពរបស់គាត់ លោក អាន ប៊ុនហេង អនុសេនីយ៍ឯកកងរាជអាវុធហត្ថ និងប្រពន្ធរបស់លោកឈ្មោះ ស៊ឹម វី ត្រូវបានចាប់ខ្លួននៅពេលនគរបាលបានរកឃើញស្បែកជើងមួយគូរបស់លោក ហង្ស សេរីឧត្តម នៅក្នុងភោជនីយដ្ឋានរបស់ប្ដីប្រពន្ធពីរនាក់នេះ កន្លែងដែលគាត់បានពិសាស្រានៅពេលយប់មុនពេលគាត់បាត់ខ្លួន។ នៅពេលការស៊ើបអង្កេតរបស់តុលាការបានសន្និដ្ឋានថា ពួកគេគឺជាជនសង្ស័យតែមួយគត់ នៅពេលនោះអង្គការសិទ្ធិមនុស្ស និងក្រុមគ្រួសារជនរងគ្រោះបានលើកឡើងថា ខ្លួនជឿជាក់ថា មានអ្នកផ្សេងទៀតអាចនឹងដឹងអំពីការធ្វើឃាតនេះ។
លោក ទេព មុន្នីជាតិ មេធាវីរបស់ជនសង្ស័យទាំងពីរបានលើកឡើងកាលពីម្សិលមិញថា តុលាការបានលើកលែងការចោទប្រកាន់ទាំងអស់ដែលដាក់បន្ទុកលើកូនក្ដីរបស់លោក ហើយពួកគេប្រហែលជាត្រូវដោះលែងនៅថ្ងៃនេះ។
លោក មុន្នីជាតិ បានមានប្រសាសន៍ថា “តុលាការបានសម្រេចលើកលែងការចោទប្រកាន់ ដោយសារគ្មានភ័ស្តុតាងពិតប្រាកដ ដែលអាចដាក់បន្ទុកលើកូនក្ដីរបស់ខ្ញុំ”។ លោកបានបន្ថែមថា លោកមានការសោកស្ដាយខ្លាំងណាស់ចំពោះការស្លាប់អ្នកកាសែតរូបនេះ។លោកបានបន្តថា “ខ្ញុំគ្រាន់តែបំពេញតួនាទីរបស់ខ្ញុំ ដើម្បីជួយកូនក្ដីរបស់ខ្ញុំតែប៉ុណ្ណោះ ហើយខ្ញុំមានអារម្មណ៍សោកស្ដាយខ្លាំងណាស់ចំពោះក្រុមគ្រួសាររបស់អ្នកកាសែតដែលបាត់បង់ជីវិតរូបនេះ”។
បន្ទាប់ពីការបើកសវនាការលើកដំបូង កាលពីខែមីនា និងមេសា មេធាវីមួយក្រុមមានសមាជិកបីរូប បានសម្រេចថា សំណុំរឿងនេះខ្វះភ័ស្តុតាង ហើយបានស្នើឲ្យលោក សួស ឡា ប្រធានតុលាការធ្វើការស៊ើបអង្កេតឡើងវិញ ដែលត្រូវបានសន្និដ្ឋានកាលពីខែមុន។
លោក ឆាយ ធី អ្នកសម្របសម្រួលរបស់អង្គការសិទ្ធិមនុស្សអាដហុក ប្រចាំខេត្តរតនគិរី ដែលបានតាមដានសំណុំរឿងនេះជាប់ជានិច្ច និងបានចូលរួមការប្រកាសសាលក្រមកាលពីម្សិលមិញបានលើកឡើងថា សាលាដំបូងខេត្តរតនគិរី បានបើកសវនាការជំនុំជម្រះក្ដីនៅថ្ងៃទី២ ខែសីហា ហើយបានសាកសួរសាក្សីថ្មីមួយចំនួនដែលអះអាងថា បានឮគេស្រែកឲ្យជួយចេញពីភោជនីយដ្ឋានរបស់ប្ដីប្រពន្ធទាំងពីរនេះនៅយប់ដែលអ្នកកាសែតរូបនេះត្រូវគេធ្វើឃាត។
លោកបានបន្ថែមថា មេធាវីការពារក្ដីក៏បានបង្ហាញលទ្ធផលដែលទទួលបានពីមន្ទីរពិសោធន៍នៅប្រទេសវៀតណាម ផងដែរ។មន្ទីរពិសោធន៍នេះបានវិភាគភួយមួយដែលគេឃើញនៅក្នុងសណ្ឋាគាររបស់ប្ដីប្រពន្ធទាំងពីរនេះ និងដែលគេគិតថា មានស្នាមឈាមរបស់អ្នកកាសែតរូបនេះ។ ប៉ុន្តែលទ្ធផលដែលបានមកពីមន្ទីរពិសោធន៍នេះបង្ហាញថា ស្នាមប្រឡាក់នៅលើភួយនោះ គឺជាថ្នាំពណ៌ក្រហមមិនមែនឈាមនោះឡើយ។
លោកបានមានប្រសាសន៍ថា តែទោះជាយ៉ាងណាភ័ស្តុតាងសំខាន់ៗជាច្រើនដែលដាក់បន្ទុកលើប្ដីប្រពន្ធទាំងពីរនេះមិនត្រូវបានគេបង្ហាញឡើយ។ លោកបានថ្លែងថា “ការសម្រេចលើកលែងការចោទប្រកាន់នេះ គឺវាអយុត្តិធម៌ណាស់សម្រាប់ក្រុមគ្រួសាររបស់ជនរងគ្រោះ ហើយប្រពន្ធរបស់អ្នកកាសែតដែលត្រូវគេធ្វើឃាតរូបនេះនឹងភ័យខ្លាចចំពោះសុវត្ថិភាពរបស់ខ្លួន”។
អ្នកស្រី អ៊ីម ចន្ធី ប្រពន្ធរបស់អ្នកកាសែតរូបនេះបាននិយាយថា អ្នកស្រីមានការរន្ធត់ចិត្តខ្លាំងណាស់នៅពេលប្រធានក្រុមប្រឹក្សាជំនុំជម្រះបានប្រកាសសាលក្រម ហើយអ្នកស្រីបានចាត់ទុកការសម្រេចនេះថា ជាការសម្រេច “មួយដ៏អយុត្តិធម៌បំផុត”។ អ្នកស្រីបានលើកឡើងថា “គ្មានយុត្តិធម៌សម្រាប់អ្នកក្រីក្រដូចរូបខ្ញុំឡើយ។ ខ្ញុំនឹងប្ដឹងឧទ្ធរណ៍ចំពោះការស្លាប់របស់ប្ដីខ្ញុំ”។
អ្នកកាសែតក្នុងស្រុកដែលរាយការណ៍អំពីការរកស៊ីឈើប្រណីត និងឈើហ៊ុបដោយខុសច្បាប់ ជារឿយៗតែងតែមានជាប់ពាក់ព័ន្ធនឹងអ្នកមានអំណាច ជាធម្មតាសុទ្ធតែប្រឈមនឹងការគំរាមកំហែង។ អង្គការសិទ្ធិមនុស្ស និងអង្គការសហប្រជាជាតិក៏បានថ្កោលទោសការធ្វើឃាតលោក ហង្ស សេរីឧត្តម ដែរ។
លោក ប៉ែន សមិទ្ធិ ប្រធានក្លឹបអ្នកកាសែតកម្ពុជា បានលើកឡើងថា សាលក្រមនេះវាផ្ទុយទៅនឹងភ័ស្តុតាងមួយចំនួនដែលត្រូវបានផ្ដល់កាលពីលើកមុននៅក្នុងសំណុំរឿងនេះ។
លោកបានមានប្រសាសន៍ថា “ខ្ញុំបានប្ដឹងទៅប្រធានសាលាដំបូងខេត្តរតនគិរីឲ្យត្រួតពិនិត្យការសម្រេចរបស់ចៅក្រមនេះឡើងវិញ ហើយផ្ដល់យុត្តិធម៌ឲ្យក្រុមគ្រួសារជនរងគ្រោះ និងអ្នកកាសែតទាំងអស់”។
លោក ប៉ា ងួនទៀង នាយកប្រតិបត្តិមជ្ឈមណ្ឌលកម្ពុជាសម្រាប់ប្រព័ន្ធផ្សព្វផ្សាយឯករាជ្យ បានលើកឡើងថា ការស៊ើបអង្កេតរបស់តុលាការដែលមានបញ្ហា និងសាលក្រមនេះគឺជាការគំរាមដល់សេរីភាពប្រព័ន្ធផ្សព្វផ្សាយនៅប្រទេសកម្ពុជា។
លោកបានមានប្រសាសន៍ថា “ប្រសិនបើតុលាការពិតជាឯករាជ្យ ហើយចង់ធ្វើការស៊ើបអង្កេតដ៏ត្រឹមត្រូវមួយមែននោះ ខ្ញុំគិតថា ភ័ស្តុតាងប្រាកដជាអាចរកឃើញ។ នេះគឺជាការគំរាមកំហែងមួយដែលមានគ្រោះថ្នាក់រួចទៅហើយ។ ហើយការដោះលែងជនសង្ស័យគឺជាការគំរាមកំហែងដល់សេរីភាពសារព័ត៌មាន”។
យោងតាមមជ្ឈមណ្ឌលសិទ្ធិមនុស្សកម្ពុជាបានឲ្យដឹងថា លោក ហង្ស សេរីឧត្តម គឺជាអ្នកកាសែតទី១១ ហើយដែលត្រូវគេសម្លាប់នៅក្នុងប្រទេសកម្ពុជាតាំងពីឆ្នាំ១៩៩៤មកហើយសំណុំរឿងទាំងនេះសុទ្ធតែមិនត្រូវបានដោះស្រាយ។
មជ្ឈមណ្ឌលសិទ្ធិមនុស្សកម្ពុជា បានលើកឡើងនៅក្នុងសេចក្ដីថ្លែងការណ៍មួយកាលពីម្សិលមិញថា “[លោក ហង្ស សេរីឧត្តម] ឥឡូវនេះគឺជាអ្នកកាសែតទី១១ ហើយដែលអ្នកធ្វើឃាតពួកគេសុទ្ធតែរួចខ្លួន”៕
ប្រែសម្រួលដោយ ស៊ា ស៊ុយឈាង