មេធាវីមួយរូបបានឲ្យដឹងកាលពីម្សិលមិញថា ភរិយារបស់លោក ហង្ស សេរីឧត្តម អ្នកកាសែតដែលត្រូវគេសម្លាប់ នឹងប្តឹងឧទ្ធរណ៍ទៅក្រសួងយុត្តិធម៌ និងសាលាឧទ្ធរណ៍ជំុវិញសេចក្តីសម្រេចរបស់សាលាដំបូងខេត្តរតនគិរី ដែលលុបចោលការចោទប្រកាន់នាយកងរាជអាវុធហត្ថម្នាក់ និងភរិយារបស់ខ្លួនដែលត្រូវបានចោទប្រកាន់ថា មានការពាក់ព័ន្ធក្នុងការធ្វើឃាតអ្នកកាសែតរូបនេះ។
លោក ហង្ស សេរីឧត្តម អាយុ៤២ឆ្នាំ ជាអ្នកយកព័ត៌មានរបស់កាសែតវីរជនខ្មែរដែលជាកាសែតចេញផ្សាយប្រចាំថ្ងៃ ត្រូវបានគេប្រទះឃើញត្រូវគេកាប់ស្លាប់ ហើយយកទៅដាក់នៅក្នុងឃ្លុបកន្ទុយឡានរបស់គាត់នៅក្នុងស្រុកអូរជុំកាលពីថ្ងៃទី១១ ខែកញ្ញាឆ្នាំមុន។ ក្នុងរយៈពេលជាច្រើនខែមុនពេលត្រូវបានគេឃាត អ្នកកាសែតរូបនេះបានសរសេរអំពីមន្ត្រីដែលពាក់ព័ន្ធក្នុងការជួញដូរឈើខុសច្បាប់។
ពីរថ្ងៃបន្ទាប់ពីសាកសពអ្នកកាសែតរូបនេះត្រូវបានរកឃើញ អនុសេនីយ៍ឯកកងរាជអាវុធហត្ថ អាន ប៊ុនហេង និង ភរិយារបស់ខ្លួនឈ្មោះ ស៊ឺម វី ត្រូវបានចាប់ខ្លួននៅពេលដែលនគរបាលបានរកឃើញស្បែកជើងមួយគូរបស់ លោក ហង្ស សេរីឧត្តម នៅក្បែរភោជនីយដ្ឋានរបស់ប្តី-ប្រពន្ធទាំងពីរនេះ ជាទីដែលជនរងគ្រោះបានកំពុងជប់លៀងនៅពេលយប់ មុនពេលលោក ឧត្តម បាត់ខ្លួន។
សាលាដំបូងខេត្តរតនគិរី បានលើកលែងការចោទប្រកាន់ទាំងអស់ចំពោះប្តី-ប្រពន្ធទាំងពីរនាក់នេះកាលពីសប្តាហ៍មុន ហើយពួកគេត្រូវបានដោះលែងកាលពីយប់ថ្ងៃព្រហស្បតិ៍សប្តាហ៍មុនផងដែរ។ អង្គការសិទ្ធិមនុស្សក្នុងស្រុក និងអន្តរជាតិបានលើកឡើងថា សាលក្រមនេះគឺជាកំហុសឆ្គងរបស់តុលាការ ហើយបានអំពាវនាវឲ្យនាំខ្លួនអ្នកដែលទទួលខុសត្រូវក្នុងរឿងនេះទៅផ្តន្ទាទោស។
លោក ហុក ផល្លា មេធាវីរបស់អ្នកស្រី អ៊ឺម ចាន់ធី ដែលត្រូវជាភរិយា លោក ឧត្តម បានមានប្រសាសន៍កាលពីម្សិលមិញថា អ្នកស្រី ចាន់ធី កំពុងស្ថិតនៅក្នុងរាជធានីភ្នំពេញដើម្បីជួបពិភាក្សាជាមួយអង្គការសិទ្ធិមនុស្សក្នុងស្រុកអាដហុក ដើម្បីប្តឹងឧទ្ធរណ៍ទៅក្រសួងយុត្តិធម៌ និងសាលាឧទ្ធរណ៍ ឲ្យធ្វើអន្តរាគមន៍ក្នុងរឿងក្តីនេះ។
លោក ផល្លា បានថ្លែងថា “ វាមិនយុត្តិធម៌សោះ ដែលតុលាការដោះលែងនិងលើកលែងការចោទប្រកាន់ទាំងអស់ចំពោះជនសង្ស័យនោះ ពីព្រោះ [ប្តីរបស់កូនក្តីខ្ញុំ] បានបាត់បង់ជីវិត”។ លោកបានបន្ថែមថា ពួកគេមានផែនការប្តឹងឧទ្ធរណ៍នាពេលឆាប់ៗនេះ។
លោកបានមានប្រសាសន៍ថា “ ខ្ញុំគិតថា ការដោះលែងជនសង្ស័យនឹងលើកទឹកចិត្តឲ្យឃាតករប្រព្រឹត្តអំពើឃាតកម្មបន្ថែមទៀត។ ខ្ញុំជឿថា មនុស្សម្នាក់មិនអាចធ្វើដូច្នេះតែឯងបានទេ ក៏ប៉ុន្តែ តុលាការមិនបានសើុបអង្កេតដើម្បីស្វែងរកអ្នកផ្សេងទៀតដែលអាចនៅពីក្រោយបទល្មើសនេះទេ”។
ចៅក្រមមួយក្រុមមានគ្នាបីនាក់បានបញ្ជាឲ្យមានការស៊ើបអង្កេតឃាតកម្មមួយឡើងវិញកាលពីខែឧសភា ដោយសំអាងថា ខ្វះភ័ស្តុតាង បន្ទាប់ពីសវនាការជំនុំជម្រះត្រូវបានធ្វើឡើងក្នុងខែមីនា និងខែមេសា។ អំឡុងសវនាការជំនុំជម្រះមួយកាលពីថ្ងៃទី២ ខែសីហា សាក្សីបាននិយាយថា ពួកគេបានឮមនុស្សស្រែកឲ្យជួយចេញពីភោជនីយដ្ឋានរបស់ប្តី-ប្រពន្ធទាំងពីរនេះ នៅយប់ដែលអ្នកកាសែតរូបនេះបាត់ខ្លួន។
អង្គការសិទ្ធិមនុស្សក្នុងស្រុកអាដហុក ដែលបាននិងកំពុងតែតាមដានរឿងក្តីនេះយ៉ាងដិតដល់ បានរិះគន់នីតិវិធីរបស់តុលាការនេះ អំឡុងការស៊ើបអង្កេតលើកដំបូងអំពីរឿងក្តីនេះ។ ក្នុងស៊ើបអង្កេតនោះ ភ័ស្តុតាងសំខាន់ៗដូចជាការថតសំឡេងតាមទូរស័ព្ទមិនត្រូវបានពិនិត្យ ឬដកហូត បន្ទាប់ពីឃាតកម្មបានកើតឡើងភ្លាមនោះទេ។
លោក ឆាយ ធី អ្នកសម្របសម្រួលរបស់អង្គការអាដហុក ប្រចាំនៅខេត្តរតនគិរី បានបញ្ជាក់ថា ប្តី-ប្រពន្ធមួយគូនេះត្រូវបានដោះលែងកាលពីយប់ថ្ងៃព្រហស្បតិ៍ បន្ទាប់ពីតុលាការសម្រេចបែបនេះ។ ក្រុមមន្ត្រីនៅឯតុលាការមិនអាចទាក់ទងសុំធ្វើសេចក្តីអត្ថាធិប្បាយបានទេ៕
ប្រែសម្រួលដោយ ចេវ ប៊ុននី