មន្ត្រីបានឲ្យដឹងថា បុរសបួននាក់រួមទាំងឪពុកមារបស់ជនរងគ្រោះផងដែរ ដែលសង្ស័យថា បានចាប់រំលោភក្មួយស្រីរបស់ខ្លួននោះ ត្រូវបានចាប់ខ្លួនក្នុងស្ថានភាពជាជនសង្ស័យ ក្នុងករណីចាប់រំលោភបីដាច់ដោយឡែកពីគ្នា កាលពីម្សិលមិញ និងកាលពីថ្ងៃអាទិត្យ។
យោងតាមលោក ឌួង ឌី អធិការរងនគរបាលស្រុកសាមគ្គីមានជ័យបានឲ្យដឹងថា ជនសង្ស័យឈ្មោះ ណាន់ វី អាយុ៣៨ឆ្នាំ រស់នៅខេត្តកំពង់ឆ្នាំង ត្រូវបានចោទប្រកាន់ថា បានចាប់រំលោភក្មួយស្រីអាយុ១០ឆ្នាំរបស់ខ្លួនជាច្រើនលើក។ លោក ឌួង ឌី បានមានប្រសាសន៍បន្តថា “ជនសង្ស័យបានរំលោភជនរងគ្រោះចំនួនប្រាំដង ហើយនៅលើកចុងក្រោយគឺនៅថ្ងៃអង្គារ ក្នុងព្រៃស្ថិតនៅចម្ងាយប្រហែល៥០០ម៉ែត្រពីភូមិ”។
យោងតាមលោក ឌួង ឌី បានឲ្យដឹងបន្តទៀតថា ជនសង្ស័យឈ្មោះ ណាន់ វី បានឲ្យក្មួយស្រីរបស់ខ្លួនរក្សាការសម្ងាត់ ដោយសន្យាផ្ដល់ប្រាក់ឲ្យ ប៉ុន្តែជនសង្ស័យនេះត្រូវបានរាយការណ៍ប្រាប់នគរបាល បន្ទាប់ពីគ្រួសារជនរងគ្រោះដឹងពីរឿងនេះ ដោយសារកុមារីរងគ្រោះមានការឈឺចុកចាប់យ៉ាងខ្លាំង។
យោងតាមនគរបាលឲ្យដឹងថា ជនសង្ស័យឈ្មោះ ណាន់ វី សារភាពថា ខ្លួនបានប្រព្រឹត្តសកម្មភាពរំលោភនេះមែន ហើយជននេះត្រូវបានឃុំខ្លួនបណ្ដោះអាសន្ននៅស្នងការដ្ឋាននគរបាលខេត្ត ដើម្បីរង់ចាំការជំនុំជម្រះ។ នគរបាលបានបន្ថែមទៀត កាលពីម្សិលមិញថា កាលពីថ្ងៃអាទិត្យ ជនសង្ស័យ ឈ្មោះ ផាន់ ស៊ុយ អាយុ៣៨ឆ្នាំ ត្រូវបានចាប់ខ្លួនពីបទរំលោភក្មេងស្រីអាយុ៨ឆ្នាំម្នាក់ក្នុងក្រុងសេរីសោភ័ណ ក្នុងខេត្តបន្ទាយមានជ័យ។
លោក ឡៃ ភូរី នាយនគរបាលប៉ុស្តិ៍សង្កាត់កោះពងសត្វ ឲ្យដឹងថា ជនសង្ស័យរូបនេះត្រូវបានចាប់ខ្លួន បន្ទាប់ពីនគរបាលបានទទួលពាក្យបណ្ដឹងពីជីដូនរបស់ជនរងគ្រោះ ដែលជាអ្នកមើលថែទាំកុមារីរងគ្រោះដោយសារតែឪពុកម្ដាយរបស់កុមារីរងគ្រោះរូបនេះ បានធ្វើចំណាកស្រុកទៅធ្វើការនៅប្រទេសថៃ។
លោកបន្តថា ជីដូនរបស់កុមារីរងគ្រោះបានប្រាប់នគរបាលថា កុមារីរងគ្រោះរូបនេះត្រូវបានចាប់រំលោភទាំងកណ្ដាលថ្ងៃតែម្ដង នៅពេលកុមាររងគ្រោះបានដើរកាត់ផ្ទះរបស់ជនសង្ស័យកាលពីថ្ងៃទី២៧ ខែសីហា។
លោកថ្លែងថា “ជនរងគ្រោះមិនអាចប្រាប់រឿងនេះឲ្យជីដូនរបស់ខ្លួនដឹងបានទេ ដោយសារជនសង្ស័យបានគំរាមសម្លាប់នាង ប្រសិនបើនាងប្រាប់រឿងនេះឲ្យអ្នកណាម្នាក់ដឹង”។ ជនសង្ស័យឈ្មោះ ផាន់ ស៊ុយ ក៏បានសារភាពថាខ្លួនបានប្រព្រឹត្តបទឧក្រិដ្ឋរបស់ខ្លួន ហើយបច្ចុប្បន្ន ត្រូវបានឃុំខ្លួននៅស្នងការដ្ឋាននគរបាលខេត្ត ដើម្បីរង់ចាំការជំនុំជម្រះ។
កាលពីម្សិលមិញ នគរបាលបានចាប់ខ្លួនជនសង្ស័យពីរនាក់ ពីបទរំលោភស្ត្រីម្នាក់អាយុ២៦ឆ្នាំ និងបានប៉ុនប៉ងរំលោភក្មួយស្រីអាយុ១១ឆ្នាំម្នាក់របស់ស្ត្រីរងគ្រោះ នៅក្នុងក្រុងកំពង់ឆ្នាំង។ យោងតាមលោក ហ៊ុល វាសនា ស្នងការរងនគរបាលក្រុងកំពង់ឆ្នាំងបានឲ្យដឹងថា ស្ត្រីរងគ្រោះរូបនេះបានបាត់ក្មួយស្រីរបស់ខ្លួនខណៈដែលកំពុងដើរនៅក្នុងក្រុងកំពង់ឆ្នាំង ហើយទីបំផុតបានរកឃើញក្មួយស្រីរបស់គាត់ ក្នុងអគារគេបោះបង់ចោលមួយ ដែលក្មេងស្រីរងគ្រោះត្រូវគេចាប់រំលោភ។
លោក វាសនា បានបន្ថែមថា ជនសង្ស័យឈ្មោះ សុខ ប្រាក់ អាយុ១៩ឆ្នាំ និងឈ្មោះ ម៉ឺ ចាន់ដារ៉ារស្មី អាយុ១៥ឆ្នាំ ត្រូវបានបញ្ជូនទៅស្នងការនគរបាលខេត្តដើម្បីសាកសួរ។
លោក ឈួន ចំរ៉ុង ប្រធានកម្មវិធីសិទ្ធិស្ត្រី និងកុមារ អង្គការអាដហុក បានឲ្យដឹងថា មានករណីរំលោភកុមារចំនួន១២០ករណីត្រូវបានរាយការណ៍ ក្នុងរយៈពេលប្រាំពីរខែដើមឆ្នាំនេះ។ ក្នុងរយៈពេលដូចគ្នាកាលពីឆ្នាំ២០១២ មានករណីរំលោភកុមារ១២៩ករណីត្រូវបានរាយការណ៍៕
ប្រែសម្រួលដោយ ឃិន ណៃ