យោងតាមសេចក្ដីថ្លែងការណ៍មួយចេញកាលពីម្សិលមិញបានឲ្យដឹងថា អាជ្ញាធររាជធានីភ្នំពេញកំពុងតែរៀបចំវិធានការ ដើម្បីចេញអាជ្ញាប័ណ្ណទៅឲ្យស្ថានីយប្រេងឥន្ធនៈរាប់រយ ដែលកំពុងតែប្រតិបត្តិការដោយខុសច្បាប់ក្នុងរាជធានី ដោយសារស្ថានីយប្រេងឥន្ធនៈទាំងនេះបង្កការគំរាមកំហែងដល់សុវត្ថិភាពសាធារណៈ។
លោក ប៉ា សុជាតិវង្ស អភិបាលរាជធានីភ្នំពេញបានបើកកិច្ចប្រជុំមួយកាលពីថ្ងៃអង្គារ ជាមួយម្ចាស់ស្ថានីយប្រេងឥន្ធនៈនានាស្ដីអំពីបញ្ហានៃការលក់ប្រេងឥន្ធនៈខុសច្បាប់ និងភាពចាំបាច់នៃការអនុវត្តច្បាប់ ដើម្បីហាមប្រាមមិនឲ្យស្ថានីយប្រេងឥន្ធនៈណា ដែលគ្មានអាជ្ញាប័ណ្ណបន្តប្រតិបត្តិការរបស់ខ្លួន។
លោក ប៉ា សុជាតិវង្ស បានមានប្រសាសន៍ថា “យើងត្រូវតែបង្កើតផែនការថ្មី ដើម្បីគ្រប់គ្រងស្ថានីយប្រេងឥន្ធនៈឲ្យបានត្រឹមត្រូវ និងដើម្បីធានាឲ្យបានថា ស្ថានីយប្រេងឥន្ធនៈទាំងនោះអនុវត្ត និងធ្វើតាមគោលការណ៍អនុវត្តន៍តាមបទដ្ឋានបច្ចេកទេស”។ លោកបន្ថែមថា ស្ថានីយប្រេងឥន្ធនៈទាំងនោះដែលសព្វថ្ងៃកំពុងតែប្រតិបត្តិការ ដោយគ្មានអាជ្ញាប័ណ្ណ អាចប្រឈមនឹងការបិទ។
យោងតាមរបាយការណ៍ ដែលធ្វើឡើងដោយមន្ទីរឧស្សាហកម្ម រ៉ែ និងថាមពលរាជធានី និងត្រូវបានពិភាក្សានៅក្នុងកិច្ចប្រជុំបានឲ្យដឹងថា មានតែស្ថានីយប្រេងឥន្ធនៈចំនួន១២០ប៉ុណ្ណោះក្នុងចំណោមស្ថានីយប្រេងឥន្ធនៈចំនួន៣៧០ ដែលមានអាជ្ញាប័ណ្ណលក់ប្រេងក្នុងរាជធានីភ្នំពេញសព្វថ្ងៃ។
លោក ប៉ា សុជាតិវង្ស ថ្លែងថា “ស្ថានីយប្រេងឥន្ធនៈកន្លែងលក់ប្រេងនានា ដែលកំពុងតែលក់ប្រេង ចំាបាច់ត្រូវតែបំពេញទម្រង់បែបបទ ដើម្បីទទួលបានអាជ្ញាប័ណ្ណពីសាលារាជធានីភ្នំពេញ ក្នុងគោលបំណងទប់ស្កាត់ស្ថានីយប្រេងឥន្ធនៈទាំងនោះកុំឲ្យលក់ប្រេងដោយគ្មានការទទួលខុសត្រូវចំពោះមុខអាជ្ញាធរមូលដ្ឋាននៅពេលកើតមានបញ្ហាណាមួយ”។
លោក ឡុង ឌីម៉ង់ អ្នកនាំពាក្យសាលារាជធានីភ្នំពេញបានលើកឡើងថា កិច្ចប្រជុំកាលពីថ្ងៃអង្គារ គឺត្រូវបានធ្វើឡើងដើម្បីលើកកម្ពស់ការការពារសុវត្ថិភាពពីអគ្គិភ័យ និងទប់ស្កាត់ការខូចខាតដល់អគារដែលនៅក្បែរៗស្ថានីយប្រេងឥន្ធនៈ។ តែទោះជាយ៉ាងណា គំនិតផ្ដួចផ្ដើម ដើម្បីគ្រប់គ្រងការលក់ប្រេងឥន្ធនៈទាំងនេះ គឺវាកើតឡើងចំពេលភាពតានតឹងកំពុងតែបន្តនៅក្នុងរាជធានីភ្នំពេញ ពាក់ព័ន្ធនឹងលទ្ធផលនៃការបោះឆ្នោតជាតិកាលពីថ្ងៃទី២៨ ខែកក្កដា ដែលមានជម្លោះ និងការអំពាវនាវឲ្យមានមហាបាតុកម្មបន្តទៀតរបស់គណបក្សសង្គ្រោះជាតិ ដើម្បីបង្ខំឲ្យគណបក្សប្រជាជនកម្ពុជាកំពុងកាន់អំណាចព្រមទទួលយកការអំពាវនាវឲ្យមានការស៊ើបអង្កេតដោយឯករាជ្យលើភាពមិនប្រក្រតីនៃការបោះឆ្នោត។
មុនពេលសាលារាជធានីភ្នំពេញចាប់ផ្ដើមអនុវត្តច្បាប់ដែលតម្រូវឲ្យមានអាជ្ញាប័ណ្ណ លោក ឡុង ឌីម៉ង់ បានមានប្រសាសន៍ថា ក្រុមការងារនឹងប្រមូលតួលេខសរុបនៃស្ថានីយប្រេងឥន្ធនៈទាំងអស់ ហើយបន្ទាប់មកនឹងបញ្ជូនលិខិតអញ្ជើញម្ចាស់ស្ថានីយប្រេងឥន្ធនៈទាំងនោះឲ្យមកទទួលយកអាជ្ញាប័ណ្ណ។
លោក ស្លូត សំប៊ុន ម្ចាស់ហាងលក់ហ្គាសឈ្មោះ ម៉ូឌឺន ហ្គាស ដែលមានទីតាំងនៅក្នុងសង្កាត់បឹងរាំង ខណ្ឌដូនពេញ បាននិយាយថា គាត់គ្មានអាជ្ញាប័ណ្ណនោះទេ ប៉ុន្តែគាត់មិនអាចនិយាយពីច្បាប់ថ្មីរបស់សាលារាជធានីភ្នំពេញបានឡើយ ពីព្រោះគាត់មិនទាន់ទទួលបានដំណឹងពីច្បាប់ថ្មីនេះនៅឡើយទេ។លោក ស្លូត សំប៊ុន បាននិយាយបន្ថែមទៀតថា “ក្រុមហ៊ុនរបស់ខ្ញុំមិនមានអាជ្ញាប័ណ្ណណាមួយពីសាលារាជធានីភ្នំពេញទេ ប៉ុន្តែយើងបានចុះបញ្ជីធ្វើពាណិជ្ជកម្មជាមួយក្រសួងពាណិជ្ជកម្មរួចហើយ”៕
ប្រែសម្រួលដោយ ស៊ា ស៊ុយឈាង