33 C
Phnom Penh

អង្គការ​តម្លាភាព​កម្ពុជា៖ លទ្ធផល​នៃការ​បោះ​ឆ្នោត​ជាតិ​មិនបាន​​ឆ្លុះ​បញ្ចាំង​ពី​ឆន្ទៈ​របស់​ប្រជាពលរដ្ឋ​​

ដោយ ឌឹ ខេមបូឌា ដេលី

បទវិភាគ

កាលពី​ម្សិលមិញ អង្គការ​តម្លាភាព​កម្ពុជា​បាន​សន្និដ្ឋាន​ថា លទ្ធផល​ជា​ផ្លូវការ​​នៃ​​ការ​បោះ​ឆ្នោត​ជាតិ​ កាលពីថ្ងៃទី​២៨ ខែ​កក្កដា ដែល​ចេញ​ដោយគណៈកម្មា ធិការ​ជាតិ​​រៀប​ចំការ​បោះ​ឆ្នោត ​(គ.ជ.ប.) មិន​ឆ្លុះ​បញ្ចាំង​ពី​ឆន្ទៈ​របស់​ប្រជាពលរដ្ឋ​នោះ​ទេ​ ដោយ​សារ​ភាព​មិន​ប្រក្រតី​កើត​មាន​ច្រើន​​ នៅ​មុននិង​​​​អំឡុង​​​​​​ថ្ងៃ បោះ​ឆ្នោត​។

របាយការណ៍​ដែល​ផ្អែក​លើការ​ស៊ើប​អង្កេត​​បាន​មក​ពី​អ្នក​សង្កេត​ការ​ណ៍​បោះ​ឆ្នោត​​ចំនួន​៩០៦នាក់​ ដែល​ត្រូវ​បាន​បញ្ជូន​ឲ្យ​ទៅ​ឃ្លាំមើល​ការ​បោះ​ឆ្នោត​តាម​ការិយាល័យ​បោះ​ឆ្នោត​ចំនួន​៤០៩​ការិយាល័យ​នៅទូ​​​ទាំង​​​២៤​ខេត្ត-រាជធានីបាន​លើក​​ឡើង​ថា អ្នក​បោះ​ឆ្នោត​ដែល​មាន​ឯកសារ​បញ្ជាក់​អត្តសញ្ញាណ​ត្រឹមត្រូវ​មិន​អាច​រក​ឈ្មោះ​​​របស់​​ខ្លួននៅ​​​​បញ្ជី​បោះ​ឆ្នោត​​ឃើញ​​ទេ​ ហើយ​​​​​មិន​ត្រូវ​បាន​អនុញ្ញាត​ឲ្យ​បោះ​ឆ្នោត​ឡើយ​នៅ​តាម​ការិយា​ល័យ​បោះ​​ឆ្នោត​ប្រហែល​៦០ភាគ​រយ​ ​។

របាយការ​ណ៍​នេះ​បាន​លើក​ឡើង​ថា “ដោយ​សារ​តែ​ស្ថានភាព​នៅ​មុន​ថ្ងៃ​បោះ​ឆ្នោត​មាន​បញ្ហា​ និង​ដំណើរ​ការ​បោះ​ឆ្នោត​មាន​ភាព​មិន​ប្រក្រតី​ច្រើន​នោះ​ អង្គការ​តម្លា​ភាព​​កម្ពុជា​មិន​មាន​​ជំនឿ​​​​​ចិត្ត​ឡើយ​ថា លទ្ធ​ផល​នៃការ​បោះ​ឆ្នោតនេះ​បាន​​ឆ្លុះ​បញ្ចាំង​​​ពី​ឆន្ទៈ​របស់​ប្រជាពលរដ្ឋ​នោះ​”។ អង្គការ​តម្លាភាព​​កម្ពុជា​បាន​បង្ហាញ​ពី​បញ្ហាមួយ​ចំនួន​ដែល​អ្នក​ឃ្លាំមើល​ការ​បោះ​ឆ្នោត​បាន​លើក​ឡើង​ម្តង​ហើយ​ម្តង​ទៀត​ថា បាន​ធ្វើ​ឲ្យ​ខូច​ភាព​ស្រប​ច្បាប់​នៃ​លទ្ធផល​បោះ​ឆ្នោត​ ប៉ុន្តែ បញ្ហា​ទាំង​នេះ​​ត្រូវ​បាន​ច្រាន​ចោល​បន្ទាប់​ពី​ គ.ជ.ប. និង​ក្រុម​ប្រឹក្សា​ធម្ម​នុញ្ញ​បើក​ការ​ស៊ើប​អង្កេត​។

បញ្ហាមួយក្នុង​ចំណោម​បញ្ហាទាំង​នោះ​ ​គឺ​ការ​​ប្រើប្រាស់​ប័ណ្ណ​បញ្ជាក់​អត្តសញ្ញាណ​សម្រាប់​បោះ​​ឆ្នោត​ ដែល​​បាន​ចេញ​ទៅ​ឲ្យ​​ប្រជា​ពលរដ្ឋ​ដែល​បាត់​ ឬក៏​គ្មាន​អត្ត​សញ្ញាណ​​ប័ណ្ណ​​ ដោយ​អនុញ្ញាត​ឲ្យ​ពួកគាត់​​អាច​បោះ​ឆ្នោត​​បាន​។ ទោះ​បី​ជា​មាន​ការ​ស្នើ​ម្តង​ហើយ​ម្តង​ទៀត​​ពី​អ្នក​ឃ្លាំមើល​ការ​បោះ​ឆ្នោត​ដែល​ពោរ​ពេញ​ដោយ​ក្តី​ព្រួយ​បារម្ភ​ក៏​ដោយ ក៏​ គ.ជ.ប. នៅ​តែ​បដិសេធមិន​បង្ហាញ​​តួលេខ​​នៃ​ការ​ចេញ​ប័ណ្ណ​បញ្ជាក់​អត្ត​សញ្ញាណនេះ​ដែល​ចេញ​ដោយ​​ឃុំ​-សង្កាត់​ដដែល​​ ហើយ​នេះ​​​គឺ​ជា​អ្វី​ដែល​អ្នក​សង្កេត​ការណ៍​​បោះ​ឆ្នោត​​​ព្រួយ​បារម្ភ​ខ្លាច​ក្រែង​​គេ​ប្រើ​ប័ណ្ណ​នេះ​ ដើម្បី​លួច​បន្លំ​សន្លឹក​ឆ្នោត​។ ហើយ​បើ​យោង​តាម​អ្នក​សង្កេត​ការណ៍​បោះ​ឆ្នោត​បានឲ្យ​ដឹង​ថា​ មាន​ប័ណ្ណ​បញ្ជាក់​អត្ត​សញ្ញាណ​សម្រាប់​បោះ​ឆ្នោត​ប្រហែល​១​លាន​ប័ណ្ណ​ត្រូវ​បាន​ចេញ​នៅ​​ថ្ងៃ​ចុង​ក្រោយ​នៃ​​ការ​ចុះ​ឈ្មោះ​​បោះ​ឆ្នោត​ និង​ថ្ងៃ​​បោះ​ឆ្នោត​។

របាយការណ៍​នេះ​បាន​លើក​ឡើង​ថា “សំឡេង​ឆ្នោត​របស់​គណ​បក្ស​​កាន់​អំណាច​មាន​ការ​កើន​ឡើង​នៅ​ក្នុង​ចំណោម​ការិយា​ល័យ​​បោះ​ឆ្នោត​នានា ដែល​ត្រូវ​បាន​សង្កេត​ការណ៍​ដោយ​អង្គការ​តម្លា​ភាព​​កម្ពុជា​​​ ព្រោះ​​​ប័ណ្ណ​បញ្ជាក់​អត្តសញ្ញាណ​សម្រាប់​បោះ​ឆ្នោត​នេះ​​​ត្រូវ​បាន​គេ​ប្រើ​ជាច្រើន​នៅ​តាម​ការិយា​​​ល័យ​បោះ​ឆ្នោត​ទាំ​ងនោះ​។

របាយការណ៍​នេះបានលើក​ឡើង​បន្ថែម​ថា “ទោះ​បី​ជា​យ៉ាង​ណា​ក៏​ដោយ​ អង្គការ​តម្លាភាព​​​កម្ពុជា​មិន​អាច​កំណត់​បាន​ទេ​ថា តើ​និន្នាការ​នេះ​មាន​ពិត​ប្រាកដ​នៅ​ទូ​ទាំង​ប្រទេស​ឬក៏​អត់​នោះទេ​ ព្រោះ​​​.គ្មាន​ទិន្នន័យ​ស្តី​ពី​ចំនួន​ប័ណ្ណ​បញ្ជាក់អត្ត​សញ្ញាណ​សម្រាប់​បោះ​ឆ្នោត​ដែល​ចេញ​ដោយ​​ឃុំ-សង្កាត់​ និងចេញ​​នៅ​តាម​​ការិយាល័យ​នានានៅ​ទូទាំង​ប្រទេស​ ”។

យោង​តាម​អង្គការ​តម្លាភាព​កម្ពុជា​បាន​ឲ្យ​ដឹង​ថា ប័ណ្ណ​បញ្ជាក់​អត្តសញ្ញាណ​សម្រាប់​បោះ​ឆ្នោតនេះ​ ​ត្រូវ​បាន​ប្រើ​ដើម្បី​បោះ​ឆ្នោត​នៅ​តាម​​​​ការិយាល័យ​បោះ​ឆ្នោត​ចំនួន​ប្រហែល​៩៣ភាគរយ​។ ក្នុង​ការិយា​ល័យ​​​បោះ​ឆ្នោត​១១​ភាគរយ​ មានប្រជាពលរដ្ឋ​៥១នាក់​ ឬ​ក៏​លើស ​​ពី​នេះ​បាន​ប្រើ​ប័ណ្ណ​នេះដើម្បី​​បោះ​ឆ្នោត។

លោក ទេព នីថា អគ្គលេខា​ធិការ​ គ.ជ.ប. បានមាន​ប្រសាសន៍​ថា ​លោក​មិន​បាន​អាន​របាយការណ៍​នេះ​ទេ​ ប៉ុន្តែ លោក​បាន​គូស​បញ្ជាក់​ថា ប័ណ្ណ​បញ្ជាក់​អត្តសញ្ញាណ​ដែល​ចេញ​ដោយ​ឃុំ​-សង្កាត់​ត្រូវ​បាន​បិទ​បង្ហាញ​តាម​ឃុំ​-សង្កាត់នានា​នៅ​មុនថ្ងៃបោះ​ឆ្នោត​។ លោក​បាន​ថ្លែង​ថា “អំឡុង​ពេល​ចេញ​ប័ណ្ណ​បញ្ជាក់​អត្តសញ្ញាណ​នេះ គ.ជ.ប. មិន​បាន​ដឹង​ថា នរណា​ជាអ្នក​គាំទ្រ​គណបក្ស​ប្រជាជន​កម្ពុជា ឬក៏​គណបក្ស​សង្គ្រោះ​ជាតិ​ឡើយ។

តែ​ទោះ​បី​ជា​ គណបក្ស​សង្គ្រោះជាតិ​ និង ​គណបក្ស​ប្រជាជន​កម្ពុជា​ កាលពី​ដើម​សប្តាហ៍​នេះ​បាន​ព្រម​ព្រៀង​គ្នា​បង្កើត​គណៈ​កម្មការ​រួម​មួយ​ ដើម្បី​ពិភាក្សា​ពី​កំណែ​ទម្រង់​នៃ​ការ​បោះ​ឆ្នោត​ក៏​ដោយ ក៏​លោក ព្រាប កុល នាយក ​ប្រតិបត្តិ​អង្គការ​តម្លាភាព​កម្ពុជា​បាន​លើក​ឡើង​ថា គណៈកម្មានេះ​លេច​រូប​រាង​ឡើង​​​ត្រឹម​​តែ​ជា​គោល​ការណ៍​ប៉ុណ្ណោះ ហើយ​បាន​ទទូច​​ឲ្យ​ប្រទេស​ដែល​ជាម្ចាស់​ជំនួយ​​ផ្សេងៗ​ពិចារណា​ពី​ភាព​ចាំ​បាច់​នៃ​ការ​ធ្វើ​កំណែ​ទម្រង់​​​នេះ​ មុន​ពេល​ផ្តល់​ជំនួយ​នា​ពេល​អនាគត​។

លោក​បាន​មាន​ប្រសាសន៍​ថា “យើង​ចង់​ឲ្យ​ម្ចាស់​ជំនួយ​រួម​បញ្ចូល​សូចនា​​​ករ​គោល​​ពាក់ព័ន្ធ​នឹង​កំណែ​ទម្រង់​នៃការ​បោះឆ្នោត​នេះ”។ លោក​បាន​បន្ថែម​ថា “ ហើយ​​លក្ខ​ខណ្ឌ​​​មួយ​ក្នុង​ចំណោមលក្ខខណ្ឌ​​ទាំង​នោះ​គួរ​តែ​ជា​ជំនួយ​ហិរញ្ញវត្ថុ​ ពី​សហរដ្ឋ​អាមេរិក ឬក៏​សហភាព​អឺរ៉ុប។នេះ​គឺ​ជា​អំណាច​តែ​មួយ​គត់​ដែល​ម្ចាស់​ជំនួយ​​មាន​”។

អនុសាសន៍​របស់​របាយការណ៍​នេះ ក៏​មាន​​​​រួម​បញ្ចូល​ការ​អំពាវ​នាវ​ឲ្យ​មាន​ការ​រុះ​រើ​សមា​ជិក​ គ.ជ.ប.ព្រម​ទាំង​កំណែ​ទម្រង់​ច្បាប់​បោះ​ឆ្នោត​ផងដែរ។នៅ​ពេល​ចេញ​លទ្ធផលជា​ផ្លូវការ​នៃការ​បោះ​ឆ្នោត​ គ.ជ.ប. បាន​ប្រកាស​​ថា គណបក្ស​ប្រជាជន​កម្ពុជា​ទទួល​បាន​៦៨​អាសនៈ​រីឯ​គណបក្ស​សង្គ្រោះ​ជាតិ​ទទួល  ​បាន​៥៥ អាសនៈ៕

(រាយការ​ណ៍​បន្ថែម​ដោយ អ៊ាង ម៉េងឡេង)
ប្រែសម្រួលដោយ ស៊ា ស៊ុយ​ឈាង​

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស