28 C
Phnom Penh

ព្រះ​មហាក្សត្រ​ កោះ​​​ប្រជុំ​សភា​ ដែល​មាន​គណបក្ស​​ជាប់​ឆ្នោត​តែ​មួយ​ចូលរួម​​​​​

ដោយ ឌឹ ខេមបូឌា ដេលី

បទវិភាគ

ព្រះ​មហាក្សត្រ​ នរោត្តម សីហមុនី បាន​ធ្វើ​ជា​ព្រះ​អធិបតី​នៅ​ក្នុងការបើក​​សម័យ​ប្រជុំ​សភា​ ដែល​​អវត្តមាន​​សមាជិក​ជិត​ពាក់​កណ្ដាល​កាលពី​ម្សិលមិញ​ ព្រោះ​សមាជិក​សភា​ជាប់​ឆ្នោត​ទាំង​៥៥រូប​​របស់​គណបក្ស​សង្គ្រោះ​ជាតិ បាន​ធ្វើតាម​ការ​គំរាម​របស់​ខ្លួន​ធ្វើ​ពហិការ​រដ្ឋ​សភា ដើម្បី​តវ៉ា​នឹង​លទ្ធផល​បោះឆ្នោត​​ជាតិ​ កាលពីខែ​កក្កដា។

ព្រះមហាក្សត្រ​​​ នរោត្តម សី​ហ​មុនី (ឆ្វេង) លោក​នាយក​រដ្ឋ​ម​ន្រ្តី ​ហ៊ុន​ សែន​ (ស្តាំ) ទទួល​ស្វាគមន៍​​មន្រ្តី​ស្ថានទូត​ប្រចាំ​ប្រទេស​កម្ពុជា​​ នៅ​ខាង​ក្រៅ​របង​រដ្ឋ​សភា​ជាតិ​​ អំឡុង​ពេល​​​​​​​​​បើក​​​កិច្ច​ប្រជុំ​​​សភា​​​លើក​​​ដំបូង​​​ កាល​ពីម្សិលមិញ​​​ ទោះ​បី​ជាគណ​បក្ស​​​សង្គ្រោះ​​​ជាតិ​​​ មិន​​​បាន​​​ចូល​​​រួម​​​នៅ​​​ក្នុង​​​សម័យ​​​ប្រជុំ​​​​ក៏​ដោយ​​​។ (​ស៊ីវ ចាន់​ណា)
ព្រះមហាក្សត្រ​​​ នរោត្តម សី​ហ​មុនី (ឆ្វេង) លោក​នាយក​រដ្ឋ​ម​ន្រ្តី ​ហ៊ុន​ សែន​ (ស្តាំ) ទទួល​ស្វាគមន៍​​មន្រ្តី​ស្ថានទូត​ប្រចាំ​ប្រទេស​កម្ពុជា​​ នៅ​ខាង​ក្រៅ​របង​រដ្ឋ​សភា​ជាតិ​​ អំឡុង​ពេល​​​​​​​​​បើក​​​កិច្ច​ប្រជុំ​​​សភា​​​លើក​​​ដំបូង​​​ កាល​ពីម្សិលមិញ​​​ ទោះ​បី​ជាគណ​បក្ស​​​សង្គ្រោះ​​​ជាតិ​​​ មិន​​​បាន​​​ចូល​​​រួម​​​នៅ​​​ក្នុង​​​សម័យ​​​ប្រជុំ​​​​ក៏​ដោយ​​​។ (​ស៊ីវ ចាន់​ណា)

ដូច​ដែលខ្លួន​​បាន​សន្យា​នោះ សមាជិក​សភា​គណបក្ស​សង្គ្រោះ​ជាតិ​ បាន​ធ្វើ​ដំណើរ​​ទៅក្រុង​សៀម​រាប ដែល​នៅ​ទី​នោះ​ពួកគាត់​បាន​ចាត់​ទុក​សម័យ​ប្រជុំ​សភា​លើក​​ដំបូង​នេះ​ថា មិន​ស្រប​តាម​រដ្ឋ​ធម្មនុញ្ញ ហើយ​បាន​ចាត់​ទុក​ប្រទេស​កម្ពុជា​ថា​ ជា​ប្រទេស​ឯក​បក្ស​។

អ្នក​វិភាគ​ និង​អ្នក​សង្កេត​ការ​បោះ​ឆ្នោត​ក៏បាន​ចោទ​សួរ​ពីភាព​ស្រប​ច្បាប់​របស់​រដ្ឋ​​​សភា​ថ្មី​នេះ​ផង​ដែរ ហើយបារម្ភ​ខ្លាច​មាន​ភាពច្របូក​ច្របល់​ជាសាធារណៈ​កាន់តែ​ខ្លាំង​​ប្រសិន​បើ​សមាជិក​សភា​គណបក្ស​ប្រជា​ជន​កម្ពុជា​បន្ត​អនុម័ត​ច្បាប់​នានា​នោះ។

ទោះ​ជា​យ៉ាង​ណា ​ ព្រះ​មហាក្សត្រ​ នរោត្តម សីហមុនី និង​សមាជិក​ជាប់​ឆ្នោត​ទាំង​៦៨រូប​​​ នៃ​គណបក្ស​ប្រជា​ជន​កម្ពុជា របស់​លោក​នាយក​រដ្ឋមន្ត្រី​ ហ៊ុន សែន ​បាន​បន្ត​សម័យ​ប្រជុំ​សភា​ដែល​មាន​ការ​ចូល​រួម​ពី​អ្នក​​​ការ​​​ទូត​បរទេស​ប្រចាំ​កម្ពុជា​ជា​ច្រើនរូប​ រួម​ទាំង​គណៈ​ប្រតិភូ​អឺរ៉ុបមួយ​ចំនួនដែល​បានរិះគន់​ដំណើរ​ការ​បោះ​ឆ្នោត​នេះ​ និង​មិន​បាន​ទទួល​ស្គាល់​លទ្ធ​​​ផល​ផ្លូវ​ការ​​នៃ​ការ​បោះ​ឆ្នោត​នេះ​ទេ។

ពេល​យាង​ចូល​​​​ព្រះ​​​សុវណ្ណ​​​កោច្ឆៈ ​​​(កៅអី​ពណ៌មាស) ​របស់​ព្រះ​​​​​​​អង្គ​នៅ​មុខ​សាល​រដ្ឋ​​​សភា ព្រះមហាក្សត្រ សីហមុនី មិន​បាន​មាន​បន្ទូល​អំពី​សមាជិក​សភា​គណបក្ស​ប្រឆាំង​ដែល​អវត្ត​មាន​ទាំង​៥៥​រូប​នោះទេ ហើយ​បាន​ស្វាគមន៍​សមាជិក​សភា​គណបក្ស​ប្រជា​ជន​កម្ពុជា​ទាំង​៦៨​រូប។ ព្រះ​មហាក្សត្រ​បានមាន​​បន្ទូល​ថា “ការ​បើក​សម័យ​ប្រជុំ​សភា​នីតិកាល​ទី​៥​នេះ គឺ​ជា​ទំព័រ​​ថ្មីមួយ​នៅ​ក្នុង​ប្រវត្តិ​សាស្ត្រ​នៃ​អង្គ​នីតិ​បញ្ញត្តិ​​​របស់​យើង​ ដោយ​សម្ដេច​ ​ឯក​ឧត្តម និង​លោក​ជំទាវ​​ចំណាយ​ទាំ​ង​កម្លាំង​កាយ​ និង​កម្លាំង​​ចិត្ត​ដើម្បី​បម្រើ​ប្រទេស​ជាតិ​ ដោយ​ការ​យក​ផល​ប្រយោជន៍​ជាតិ​ជា​ធំ​ជាង​អ្វីៗ​ទាំង​អស់។ ខ្ញុំ​សង្ឃឹម​ថា រដ្ឋសភានីតិកាលទី​៥​នេះ​នឹង​ដំណើរ​ការ​ដោយ​រលូន​ និង​បំពេញ​តួនាទី​ និង​ភារកិច្ច​​របស់​ខ្លួន​ប្រកប​ដោយ​ផ្លែផ្កា​ ដើម្បី​ផល​ប្រយោជន៍​មាតុភូមិ និង​ប្រជា​ជន​កម្ពុជា​”។

បន្ទាប់​ពីការ​ចាប់​ដៃ​ និង​ថត​រូប​ជាមួយ​​ព្រះ​មហាក្សត្រ​ សីហមុនី នៅ​ខាង​ក្រៅ​រដ្ឋ​សភា​ សមាជិក​សភាគណបក្ស​ប្រជា​ជន​កម្ពុជា បាន​ត្រឡប់ចូល​​ទៅ​ក្នុង​រដ្ឋសភា​វិញ ហើយ​លោក​ ហេង សំរិន ប្រធាន​ចុង​ក្រោយ​នៃ​រដ្ឋ​សភា​នេះនិង​ទំនង​ជា​អាច​​ធ្វើ​​នៅ​អាណត្តិ​ក្រោយ​ទៀត​នោះ បាន​អាន​ឈ្មោះសមាជិក​សភា​ជាប់​ឆ្នោត​ទាំង​១២៣រូប រួម​ទាំង​សមា​ជិក​សភា​គណបក្ស​សង្គ្រោះ​ជាតិ​ ដែល​អវត្ត​​មាន​ទាំង​នោះ​​ផង​ដែរ។

លោក​បាន​​​ថ្លែង​​​​​​ថា “ខ្ញុំ​សូម​ប្រកាស​ជា​​​​​​ឱឡា​​​​​​រិ​ក​ថា ឈ្មោះ​សមាជិក​សភា​ជាប់​ឆ្នោត​ដែល​គណៈកម្មាធិការ​ជាតិ​រៀប​ចំ​ការ​បោះ​ឆ្នោត​បញ្ជូន​​​​​​​ម​ក​ឲ្យ​រដ្ឋសភា​​​ត្រូវ​បាន​អនុម័ត​នៅ​ថ្ងៃ​ទី​២៣ ខែ​កញ្ញា ឆ្នាំ២០១៣។ ខ្ញុំ​សូ​ម​អប​អរ​សាទរ​​​​ដល់​ឯក​ឧត្តម និង​លោក​ជំទាវ​ទាំង​អស់​”។

​បន្ទាប់​មក​ សមាជិក​សភាគណបក្ស​ប្រជា​ជន​កម្ពុជាទាំង​៦៨​រូប បាន​អនុម័ត​បទ​បញ្ជា​​ផ្ទៃ​ក្នុង​ថ្មី​របស់​រដ្ឋសភា ដោយ​ការ​លើក​ដៃ​យ៉ាង​​​​​​​​​​លឿន​ ហើយ​​នៅ​ថ្ងៃ​នេះ​​នឹង​បោះ​ឆ្នោត​ជ្រើស​រើស​ថ្នាក់​​ដឹក​នាំ​ថ្មី​របស់​រដ្ឋសភា​ បន្ទាប់​​នាយក​រដ្ឋមន្ត្រី និង​គណៈ​រដ្ឋ​មន្ត្រីរបស់​លោក​។

នៅ​ពេល​ព្រឹក​នោះ​ ព្រះមហាក្សត្រ សីហ​​មុនី បាន​ចេញ​ព្រះ​រាជក្រឹត្យ​​ចាត់​តាំង​លោក​នាយក​​រដ្ឋមន្ត្រី​ ហ៊ុន សែន ឲ្យ​បន្ត​តួនាទី​របស់​លោក​ និង​អញ្ជើញ​ឲ្យ​លោក​បង្កើត​រដ្ឋាភិបាល​ថ្មី​។ នៅ​ក្នុង​លិខិត​ផ្ញើ​ថ្វាយ​ព្រះ​មហាក្សត្រ​ កាលពីម្សិលមិញ​ លោក ហ៊ុន សែន បាន​ទទួល​យក​​ដោយ​ការ​គួរ​សម។

ផ្ទុយ​ទាំង​ស្រុង​ពី​ពិធី​ដែល​ធ្វើ​ឡើង​នៅ​រាជ​ធានី​នេះ គណបក្ស​សង្គ្រោះ​ជាតិ​ បាន​ចេញសេចក្ដី​ថ្លែង​ការណ៍​ខ្លាំងៗ​ពី​ក្រុង​សៀម​រាប ដោយ​ចាត់​ទុក​ការ​បើក​សម័យ​ប្រជុំ​សភា​នេះ​ថា ជា​ការ​ខុស​ច្បាប់​។ គណបក្ស​នេះ​បាន​លើក​ឡើង​ថា “ការ​បើក​សម័យ​ប្រជុំ​សភា​លើក​ដំបូង​ដោយ​គ្មាន​វត្តមាន​របស់​សមាជិក​សភា​​​ជាប់​ឆ្នោត​មក​ពី​គណបក្ស​សង្គ្រោះ​ជាតិ​ គឺ​ជា​ទង្វើ​មួយ​ដែល​បំពាន​រដ្ឋ​ធម្មនុញ្ញ។

រដ្ឋសភា ដែល​បង្កើត​ឡើង​នៅ​ថ្ងៃ​នេះ​ គឹ​ជា​រដ្ឋសភា​ឯក​បក្ស​ដែល​មិន​តំណាង​ឲ្យ​ជាតិ​ខ្មែរ​ទាំង​មូល​ មាន​ន័យ​ថា រដ្ឋសភា​នេះ​បំពាន​គោលការណ៍​លទ្ធិ​ប្រជា​ធិបតេយ្យ​ សេរី ពហុបក្ស ហើយធ្វើ​ឲ្យកម្ពុជា​ត្រឡប់​ទៅ​រក​ភាព​ផ្ដាច់​ការ​ម្ដង​ទៀត​”។

លោក យឹម សុវណ្ណ អ្នក​នាំ​ពាក្យ​គណបក្ស​សង្គ្រោះ​ជាតិ​ ​មាន​ប្រសាសន៍ពី​សៀម​រាប​ថា សមាជិក​សភា​ជាប់​ឆ្នោត​របស់​គណបក្ស​​ប្រឆាំង​នឹង​ចាប់​ផ្ដើម​ធ្វើ​ដំណើរ​បណ្ដើរៗ​​ត្រឡប់​ទៅ​ភ្នំពេញ​វិញ​នៅ​ថ្ងៃ​នេះ​ ប៉ុន្តែ​នៅ​តែ​មិនមាន​​ផែន​​ការ​ទទួល​យក​អាសនៈ​របស់​ខ្លួន​ដដែល​រហូត​ដល់​ពួកគេ​ដោះស្រាយ​ការ​ខ្វែង​គំនិត​គ្នា​​លើ​លទ្ធផល​បោះឆ្នោត​នៅ​តុ​ចរចា​រួច​ហើយ​សិន​។

ការ​ចរចា​រយៈ​ពេល​ពីរ​ថ្ងៃ​រវាង​លោក ហ៊ុន សែន និង​លោក​ សម រង្ស៊ី មេដឹក​នាំ​គណ​​​​​​​បក្ស​ប្រឆាំង​​បាន​ជា​ប់​គាំង​ កាលពី​សប្ដាហ៍​មុន​ បន្ទាប់​​​​ពី​មាន​ការ​វិវឌ្ឍតិច​តួចណាស់​ និង​មិន​បាន​បន្ត​ទៀតទេ​។

លោក យឹម សុវណ្ណ ​មានប្រសាសន៍​អំពី​ការ​បើក​ប្រជុំ​សភា កាលពីម្សិលមិញ​ថា “គ្មាន​ឯក​​​​​​​ភាព​ គ្មាន​សាមគ្គីភាព គ្មាន​យុត្តិធម៌ ដូច្នេះ​គណ​​​បក្ស​ប្រជា​ជន​កម្ពុជា​ត្រូវ​តែ​ពិចារ​ណា​ឡើង​​វិញ​​​នូវ​អ្វី​ដែល​ខ្លួន​បាន​ធ្វើ​រហូត​មក​ទល់​ពេល​នេះ​។​​​ ជម្រើស​ល្អ​បំផុត​​សម្រាប់​គណបក្ស​ប្រជា​ជន​កម្ពុជា​ គឺ​ត្រឡប់​មក​រក​តុ​​ចរចា​វិញ”។

លោក ប្រាក់ សុខុន រដ្ឋលេខាធិការ​នៅ​ទីស្ដីការ​គណៈរដ្ឋមន្ត្រី​មកពី​គណបក្ស​ប្រជា​ជន​កម្ពុជា ដែល​បាន​ចូលរួម​ក្នុង​ការ​ចរចា​កាលពីសប្ដាហ៍​មុន​បាន​មា​ន​ប្រសាសន៍​ថា លោ​ក​មិន​បាន​ដឹង​ពី​ផែន​ការ​ណាមួយ​ក្នុង​ការ​បន្ត​ការ​ចរចា​ជាមួយ​គណបក្ស​ប្រឆាំង​ទេ។ លោក​ក៏​បាន​​ច្រាន​ចោល​​ការ​ជំទាស់​របស់​គណបក្ស​ប្រឆាំង​ចំពោះ​ការ​បើក​សម័យ​ប្រជុំ​សភានេះដែរ។

លោក​ ប្រាក់ សុខុន បាន​សួរ​ថា “ប្រសិន​បើ​​វា​មិន​ស្រប​តាម​ច្បាប់ ឬ​​ស្រប​តាម​រដ្ឋ​ធម្មនុញ្ញ​ទេ ហេតុ​អ្វី​បាន​ជា​ព្រះ​ករុណា​យាង​ធ្វើ​ជា​អធិបតី​បើក​កិច្ច​ប្រជុំនេះ និង​ហេតុ​អ្វី​បាន​ជា​ឯក​អគ្គ​​រដ្ឋទូត​ប្រចាំ​កម្ពុជា​ទាំង​អស់​អញ្ជើញ​ចូល​រួម​ជា​ភ្ញៀវ​កិត្តិ​យស​?”។

ស្ថាន​ទូត​អាមេរិក​​បាន​រិះ​គន់​យ៉ាង​ខ្លាំង​ចំពោះ​ការ​បោះឆ្នោត​នេះ និ​ង​បាន​ចេញ​​សេចក្ដី​ថ្លែង​ការ​ណ៍​មួយ​ភ្លាមៗ បន្ទាប់ពីការ​បើក​ប្រជុំសភា​កាលពីម្សិលមិញ​នេះ ដើម្បី​បញ្ជាក់​ថា កា​រ​ចូល​រួម​របស់​លោក​ វីលៀម ថត ឯក​អគ្គ​រដ្ឋទូត​អាមេរិក​នៅ​ក្នុង​ពិធីនេះ​មិន​មែនជា​ការ​ទទួល​ស្គាល់​លទ្ធផល​ណាមួយ​ឬគណបក្ស​ណាមួយ​ទេ។

ស្ថាន​ទូត​អាមេរិក​បាន​និយាយ​ថា “យើង​ជឿ​ថា ការ​បើក​​រដ្ឋសភា​​តម្រូវ​ឲ្យមាន​កា​រ​ចូល​រួម​ពី​គណបក្ស​នយោបាយ​ធំៗ​ទាំង​ពីរ”។ ហើយលោក​ក៏​បាន​អំពាវ​នាវ​ឲ្យ​គណ​បក្ស​ទាំង​ពីរ​​ត្រឡប់​មក​ចរចា​ផង​ដែរ​ និង​បាន​លើក​​​​​​​ឡើង​ជា​ថ្មី​ម្តង​ទៀត​អំពីការ​អំពាវ​នាវ​របស់​ខ្លួនឲ្យ​មាន​​ការ​ស៊ើប​អង្កេត​ដោយ​តម្លាភាព​លើ​ភាពមិន​ប្រក្រតី​ក្នុងការ​បោះ​ឆ្នោត​​នេះ​។

លោក គល់ បញ្ញា នាយក​គណៈកម្មាធិការ​ដើម្បី​ការ​បោះឆ្នោត​ ដោយ​សេរី និង​យុត្តិ​ធម៌​នៅ​កម្ពុជា បាន​មាន​ប្រសាសន៍​ថា ​លិខិត​របស់​ស្ថាន​ទូត​នេះ​​នឹង​មិន​អាច​រារាំង​រដ្ឋាភិបាល និង​ប្រព័ន្ធ​ផ្សព្វ​ផ្សាយ​ ដែលមាន​ទំនាក់​ទំនង​ជាមួយ​រដ្ឋាភិបាល​ មិន​​ធ្វើ​ឲ្យ​វត្តមាន​របស់​គណៈប្រតិភូ​បរទេស​នៅក្នុងពិធីនេះ​​ដូច​ជា​ការ​ទទួល​ស្គាល់​នោះ​បានទេ។

លោក​បាន​មាន​ប្រសាសន៍​ថា “ប្រព័ន្ធ​ផ្សព្វ​ផ្សា​យ​របស់​គណបក្ស​កាន់​អំណាច​នឹង​ផ្សព្វ​ផ្សាយ​ឲ្យ​ប្រជា​ពល​រដ្ឋ​គិត​ថា ​ពួកគេ​មក​ចូលរួម​ធ្វើ​ឲ្យ​រដ្ឋសភា​ និង​លទ្ធផល​បោះ​ឆ្នោត​នេះ​ស្រប​ច្បាប់​”។ ​លោក​បានមាន​ប្រសាសន៍​​ថា ប្រជា​ពល​រដ្ឋ​ខ្មែរ​ដែល​ឃើញ​ឯក​អគ្គ​រដ្ឋ​ទូត​បរទេស​ចាប់​ដៃ​ជាមួយ​សមាជិក​សភា​គណបក្ស​ប្រជា​ជន​កម្ពុជា​នៅ​តាម​ទូរទស្សន៍​នឹង​ជឿ​ថា ពួកគេ​បាន​ទទួល​ស្គាល់​លទ្ធផល​ដ៏​ចម្រូង​ចម្រាសនេះ​។

អ្នក​វិភាគ​នយោបាយ​ និង​មេធាវី​មិន​យល់​ស្រប​ថា រដ្ឋសភា​នេះ​ជា​ស្ថាប័ន​បង្កើត​ច្បាប់​ស្រប​ច្បាប់​ទេ បើ​គ្មាន​សមាជិក​សភា​ទាំង​៥៥​រូប​របស់​គណបក្ស​​ប្រឆាំង​។

លោក​ គល់ បញ្ញា​ បាន​មាន​ប្រសាសន៍​ថា “យើង​មាន​គណបក្ស​ពីរ​ ប៉ុន្តែ​មានគណ​បក្ស​តែមួយ​ប៉ុណ្ណោះ​ចូល​ប្រជុំ​សភា។ វាមិន​ស្រប​តាម​ស្មារតី​នៃ​រដ្ឋធម្មនុញ្ញទេ។ ចំពោះ​ភាព​ស្រប​ច្បាប់វិញ​ វា​ចម្រូង​ចម្រាស​ណាស់​​”។

លោក ឡៅ ម៉ុង​ហៃ អ្ន​ក​វិភាគ​នយោ​បាយ​ និង​ជា​សាស្ត្រាចារ្យ​ច្បាប់​បាន​ចាត់​ទុក​ថ្ងៃ​នេះ​ថា ជា​ថ្ងៃ​មួយ​ដ៏​ក្រៀម​ក្រំ​បំផុត​នៅ​ក្នុង​ប្រវត្តិសាស្ត្រ​របស់​យើង​”។ លោក​​មាន​ប្រសាសន៍​អំពី​រដ្ឋសភាថ្មីនេះថា “វាមិន​ស្រប​ច្បាប់​ទេ គ្រាន់​តែ​ធ្វើ​ឲ្យ​​ល្អ​មើល​ប៉ុណ្ណោះ​”។

លោក​ ឡៅ ម៉ុងហៃ បាន​មាន​ប្រសាសន៍​អំពី​អាសនៈ​របស់​គណបក្ស​ប្រជា​ជន​កម្ពុជា​នៅ​ក្នុង​ចំណោម​អាសនៈ​ទាំង​១២៣​នេះ​ថា “រដ្ឋសភា​ គឺ​ជា​ឃ្លាំង​អំណាច​របស់​ប្រជា​ពល​រដ្ឋ​ ប៉ុន្តែ​នៅ​ពេល​នេះ​អំណាច​ដែល​​មាន​នៅ​ក្នុង​រដ្ឋសភា​មាន​តែ​៥៥​ភាគ​រយ​ប៉ុណ្ណោះ” ។

លោក​បាន​បន្ថែម​ថា “ច្បាប់​ណាមួយ​ដែល​រដ្ឋសភា​នេះ​អនុម័ត​អាច​ធ្វើ​ទៅ​បាន​ ប៉ុន្តែ​មិន​ស្រប​​តាម​​​ផ្លូវ​ច្បាប់​ទេ​”។ លោក​បាន​មាន​ប្រសាសន៍​ថា លោក​ក៏​ព្រួយ​បារម្ភ​ដែរ​ថា រដ្ឋាភិបាល​ថ្មី​ប្រហែលជា​មាន​ការ​លំបាក​ក្នុងការ​អនុវត្ត​ច្បាប់​បែប​នេះ​ ហើយ​អាច​នាំ​ឲ្យ​មាន​ចលាចល​កាន់​តែ​ខ្លាំង​ ប្រហែល​ជា​មិន​មែន​ពេល​នេះ​ទេ ប៉ុន្តែ​អាច​នៅ​ពេល​ក្រោយ​។

លោក​បាន​ព្រមាន​ថា “ប្រជា​ពល​រដ្ឋ​នឹង​មិន​គោរព​ច្បាប់​ទាំង​នោះទេ ហើយ​ប្រហែល​ជា​ត្រូវ​ប្រើ​កម្លាំង​ដើម្បី​អនុវត្ត​ច្បាប់​ទាំង​នោះ​។ គណបក្ស​ប្រឆាំង​ និង​ប្រជា​ពល​រដ្ឋ​នឹង​បន្ត​តវ៉ា​តាម​វិធី​ផ្សេង​ៗ” ។

លោក កែម ឡី អ្នកវិភាគ​ឯករាជ្យ​បាន​ចាត់​ទុក​រដ្ឋសភា​ថ្មី​នេះ​ថា “ខុស​ច្បាប់​ទាំង​ស្រុង​” ហើយ​ក៏​បាន​ព្យាករដែរ​​ថា អាច​មាន​ចលាចល​​ច្រើនទៀត ​លុះត្រា​តែ​គណបក្ស​ប្រជាជន​កម្ពុជា​ និង​គណបក្ស​សង្គ្រោះ​ជាតិ​ដោះស្រាយ​ជម្លោះ​របស់​ខ្លួន​ឲ្យ​បាន​​មុន​​រដ្ឋ​សភា​ចាប់​ផ្ដើម​អនុម័ត​ច្បាប់​សិន​។ លោក​​មាន​ប្រសាសន៍​ថា “ប្រជា​ពល​រដ្ឋ​នឹង​តវ៉ា​ ហើយ​នឹង​មាន​ការ​ធ្វើ​បាតុកម្ម​ទូទាំង​ប្រទេស​ប្រសិន​បើ​រដ្ឋាភិបាល​មិន​ឲ្យ​គណបក្ស​​ប្រឆាំង​ចូល​រួម​ទេ​នោះ​”។

គណបក្ស​សង្គ្រោះ​ជាតិ បាន​ទាក់ទាញ​អ្នក​គាំទ្រ​រាប់​ម៉ឺន​នាក់​ឲ្យ​មក​ធ្វើការ​តវ៉ា​នៅ​ក្រុង​ភ្នំពេញ​ កាលពី​ប៉ុន្មាន​សប្ដាហ៍ថ្មីៗ​នេះ ដើម្បី​ទាម​ទារ​ឲ្យ​មាន​ការ​ស៊ើប​អង្កេត​ឯក​រាជ្យ​លើការ​បោះឆ្នោត​នេះ​។ គណបក្ស​នេះ​លើក​​​ឡើង​​​ថា ខ្លួន​ប្រហែល​ជា​អំពាវ​នាវ​ឲ្យ​មាន​ការ​ធ្វើ​បាតុកម្ម​ទៀត​នៅ​ពេល​ឆាប់ៗ​នេះ៕​

ប្រែសម្រួល​ដោយ​ មូល គឹមហឿន​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស