រដ្ឋមន្ត្រីថ្មីរបស់គណបក្សកំពុងកាន់អំណាចចំនួនប្រាំរូបបានស្បថចូលកាន់តំណែងកាលពីម្សិលមិញ ក្នុងពិធីដែលបានប្រព្រឹត្តទៅក្រោមអធិបតីភាពមន្ត្រីរដ្ឋាភិបាលថ្នាក់កំពូលៗ ក្នុងនោះមានទាំងលោកនាយករដ្ឋមន្ត្រី ហ៊ុន សែន និងឧបនាយករដ្ឋមន្ត្រី សុខ អាន ផងដែរ។
រយៈពេលមួយថ្ងៃ បន្ទាប់ពីលោកនាយករដ្ឋមន្ត្រីបានសន្យាធ្វើការផ្លាស់ប្តូរតាមរយៈការធ្វើកំណែទម្រង់ លោក ហ៊ុន សែន បានធ្វើជាអធិបតីក្នុងពិធីផ្ទេរតំណែងរដ្ឋមន្ត្រីក្រសួងហិរញ្ញវត្ថុ ជូនលោក អូន ព័ន្ធមុនីរ័ត្ន នៅក្រសួងហិរញ្ញវត្ថុក្រោមការឃ្លាំមើលយ៉ាងយកចិត្តទុកដាក់ពីសំណាក់អង្គរក្សផ្ទាល់ខ្លួនរបស់លោក និងនគរបាលបង្ក្រាបកុបកម្មយ៉ាងច្រើនសន្ធឹកសន្ធាប់។
អ្នកយកព័ត៌មានម្នាក់របស់កាសែត ខេមបូឌា ដេលី ត្រូវបានបដិសេធមិនឲ្យចូលទៅយកព័ត៌មានក្នុងពិធីនេះទេ ក្រោយពីបានប្រាប់ឈ្មោះស្ថាប័នរបស់ខ្លួនរួច ដោយត្រូវគេប្រាប់ថា ពិធីផ្ទេរតំណែងនេះមានអ្នកចូលរួម “ពេញ” ហើយ។
យោងតាមសេចក្តីរាយការណ៍ព័ត៌មាននៅលើគេហទំព័រព័ត៌មានដើមអម្ពិលបានឲ្យដឹងថា អំឡុងការថ្លែងសុន្ទរកថានៅក្នុងពិធីនេះលោក ហ៊ុន សែន បានរិះគន់អត្ថបទកាសែតមួយដែលបានចេញផ្សាយកាលពីម្សិលមិញ និងដែលមានសេចក្តីរាយការណ៍ថា សាធារណជនបានសម្តែងការធុញទ្រាន់ចំពោះសុន្ទរកថាតាមទូរទស្សន៍របស់លោក ស្តីពីការធ្វើកំណែទម្រង់ ដោយពួកគេសុខចិត្តទស្សនាភាពយន្តគំនូរជីវចលវិញ។
យោងតាមគេហទំព័រដដែលនេះ លោក ហ៊ុន សែន បានលើកឡើងថា វាជារឿងជៀសមិនផុតទេដែលមានអ្នកស្រឡាញ់លោក និងអ្នកស្អប់លោក ហើយថា លោកមិនបានរំពឹងថា មនុស្សគ្រប់គ្នាមានក្តីរំភើបចំពោះការសន្យាធ្វើកំណែទម្រង់របស់លោកទេ។
លោក ហ៊ុន សែន ត្រូវគេហទំព័រព័ត៌មានដើមអម្ពិលដកស្រង់សម្តីថា “អ្នកណាចង់ស្តាប់ ក៏ស្តាប់ទៅ។ អ្នកណាមិនចង់ស្តាប់ ជារឿងរបស់គេ។ សូម្បីតែព្រះពុទ្ធក៏មិនមែនមានមនុស្សគ្រប់គ្នាស្រឡាញ់ដែរ។ ប្រសិនបើគ្រប់គ្នាស្រឡាញ់ព្រះពុទ្ធមែន មិនចាំបាច់មានមូស្លីម គ្រិស្ត និងហិណ្ឌូទេ។ បើគ្រប់គ្នាស្រឡាញ់ ហ៊ុន សែន ហេតុអ្វីក៏គណបក្សផ្សេងទៀតបានជាប់ឆ្នោត?”។
លោក មឿន ឈានណារិទ្ធ ប្រធានមជ្ឈមណ្ឌលកម្ពុជាសម្រាប់ការសិក្សាផ្នែកប្រព័ន្ធផ្សព្វផ្សាយ បានលើកឡើងថា វាមិនមែនជារឿងចម្លែកទេ ដែលអ្នកកាសែតត្រូវបានគេបដិសេធមិនឲ្យចូលរួមក្នុងពិធីផ្ទេរតំណែងរដ្ឋមន្ត្រី ទោះជាទង្វើបែបនេះកើតមានត្រឹមតែមួយថ្ងៃ បន្ទាប់ពីមានការសន្យាយ៉ាងវែងអន្លាយអំពីការធ្វើកំណែទម្រង់ពីនាយករដ្ឋមន្ត្រីក៏ដោយ។
លោកបានមានប្រសាសន៍ថា “នេះគឺជាការរំលោភសិទ្ធិសេរីភាពក្នុងការទទួលបានព័ត៌មាន ប៉ុន្តែ ការចុះផ្សាយមិនល្អអំពីនាយករដ្ឋមន្ត្រីត្រូវបានចាត់ទុកថា ជាទង្វើព្រហើន អ៊ីចឹងហើយ វាជារឿងធម្មតាទេនៅក្នុងប្រទេសកម្ពុជា”។ ទោះជាយ៉ាងណាលោកបានបន្ថែមថា “ការទទួលបានប្រតិកម្ម ទោះជាវិជ្ជមាន ឬក៏អវិជ្ជ មាន គឺជារឿងល្អ ព្រោះវាមានន័យថា មានការ យកចិត្តទុកដាក់លើអត្ថបទរបស់យើង”។
ក្នុងពិធីដាច់ដោយឡែកកាលពីម្សិលមិញ លោក សុខ អាន បានធ្វើជាអធិបតីក្នុងពីធីផ្ទេរតំណែងរដ្ឋមន្ត្រីក្រសួងអប់រំជូនលោក ហង្ស ជូនណារ៉ុង នៅក្រសួងអប់រំ ខណៈលោក វង្ស សូត្រ បានស្បថចូលកាន់តំណែងនៅក្រសួងសង្គមកិច្ចក្រោមអធិបតីភាពលោក ទៀ បាញ់ លោក ស៊ុន ចាន់ថុល ចូលក្រសួងពាណិជ្ជកម្មក្រោមអធិបតីភាពលោក ហោ ណាំហុង ។ រដ្ឋមន្ត្រីថ្មីក្រសួងការងារ ក្រសួងកសិកម្ម ក្រសួងប្រៃសនីយ៍ និងទូគមនាគមន៍ និងក្រសួង ឧស្សាហកម្មរ៉ែ និងថាមពល នឹងស្បថចូលកាន់តំណែងក្នុងពិធីផ្លូវការនៅថ្ងៃនេះ៕
ប្រែសម្រួលដោយ កង សុធា