យោងតាមសេចក្តីប្រកាសព័ត៌មានចេញផ្សាយកាលពីថ្ងៃសៅរ៍ បានឲ្យដឹងថា គណបក្សសង្គ្រោះជាតិ នឹងរៀបចំសមាជមហាជននៅនៅទីលានប្រជាធិបតេយ្យ ថ្ងៃទី ៦ ខែ តុលាមុនពេលគណបក្សនេះធ្វើមហាបាតុកម្មមួយផ្សេងទៀតនៅថ្ងៃទី ២៣ ខែ តុលា ស្របគ្នានឹងថ្ងៃរំឭកខួបពិធីចុះហត្ថលេខាលើកិច្ចព្រមព្រៀងទីក្រុងប៉ារីស។
សេចក្តីប្រកាសព័ត៌មាននោះមានខ្លឹមសារថា “មហាបាតុកម្មនៅទីលានប្រជាធិបតេយ្យនៅថ្ងៃទី២៣ ខែ តុលា ឆ្នាំ២០១៣ វេលាម៉ោង៣ដល់ម៉ោង៦ល្ងាច ដើម្បីយកញត្តិជូនអង្គការនៅកម្ពុជា”។
លោក យ៉ែម ប៉ុញ្ញារិទ្ធ អ្នកនំាពាក្យគណបក្សសង្គ្រោះជាតិ បានឲ្យដឹងថា គណបក្សប្រឆាំងនេះសង្ឃឹមថា នឹងប្រមូលបានស្នាមផ្តិតមេដៃជាងបីលាននាក់ មុនពេលដាក់ញត្តិនេះជូនអង្គការសហប្រជាជាតិ។ លោកបានលើកឡើងបន្ថែមទៀតថា មហាបាតុកម្មនៅថ្ងៃទី៦ ខែតុលា នឹងត្រូវបានប្រើប្រាស់សម្រាប់វាស់ស្ទង់អារម្មណ៍របស់ប្រជាជន ដែលគាំ ទ្រគណបក្សសង្គ្រាះជាតិ នៅពេលគណបក្សនេះសម្រេចចិត្តថាតើខ្លួននឹងឆ្លើយតបទៅនឹងការបង្កើតរដ្ឋាភិបាលរបស់គណបក្សប្រជាជនកម្ពុជា ទោះបី ជាគណបក្សប្រឆាំងបានធ្វើពហិការកិច្ចប្រជុំដំបូងនៃរដ្ឋសភាកាលពីពេលថ្មីៗនេះក៏ដោយ។
លោក ប៉ុញ្ញារិទ្ធ បានមានប្រសាសន៍ថា “សមាជមហាជនដែលត្រូវបានគ្រោងនឹងធ្វើនៅថ្ងៃទី៦ ខែ តុលា ខាងមុខនេះ នឹងត្រូវបានរៀបចំក្នុងគោលបំណងបញ្ជាក់ឲ្យច្បាស់អំពីគោលជំហរនយោបាយរបស់គណបក្សសង្គ្រោះជាតិ និងសុំសេចក្តីសម្រេចពីប្រជាជន ដែលគាំទ្រគណបក្សនេះ។ យើងត្រូវការពេលវេលាបន្ថែមទៀត ដើម្បីធ្វើញត្តិមួយពីព្រោះយើងត្រូវការស្នាមផ្តិតមេដៃជាងបីលាននាក់ ភ្ជាប់ជាមួយញត្តិនោះ មុនពេលដែលយើងផ្ញើវាចេញ”។
លោកស្រី កឹម មនោវិទ្យា អនុប្រធានទទួលកិច្ចការសាធារណៈនៃគណបក្សសង្គ្រោះជាតិបានឲ្យដឹងថា គណបក្សប្រឆាំងរំពឹងថា ប្រជាជនយ៉ាងតិច១០.០០០នាក់នឹងចូលរួមក្នុងមហាបាតុកម្មនៅថ្ងៃទី២៣ ខែតុលា។
លោក ឡុង ឌីម៉ង់ អ្នកនាំពាក្យសាលារាជធានីភ្នំ ពេញ និងលោក ខៀវ សុភ័គ អ្នកនាំពាក្យក្រសួងមហាផ្ទៃ បានលើកឡើងថា លោកទាំងពីរ មិនមានមតិទាក់ទងទៅនឹងផែនការសកម្មភាពរបស់គណបក្សសង្គ្រោះជាតិទេ ពីព្រោះលោកទាំងពីរ មិនទាន់ទទួលបានសេចក្តីប្រកាសជាផ្លូវការណាមួយពីគណបក្សនេះ នៅឡើយ។
លោក សម រង្ស៊ី មេដឹកនាំគណបក្សប្រឆាំងបានលើកឡើងថា ផ្លូវតែមួយគត់ដែលអាចធ្វើឲ្យបាតុកម្មនេះត្រូវបានលប់ចោលវិញ គឺប្រសិនបើគណបក្សប្រជាជនកម្ពុជាយល់ព្រមបង្កើតការស៊ើបអង្កេតភាពមិនប្រក្រតី ក្នុងការបោះឆ្នោត។ លោកបានអះអាងថា គណបក្សប្រជាជនបានប្លន់យកជ័យជម្នះរបស់គណបក្សសង្គ្រោះជាតិ។
លោកបានមានប្រសាសន៍ថា “[គណបក្សប្រជាជន] ហាក់ដូចជាបដិសេធការទាមទាររបស់យើង ដោយឈរលើមូលដ្ឋានថា យើងបានទទួលបរាជ័យក្នុងការបោះឆ្នោត ដូច្នេះការស៊ើបអង្កេតណាក៏ដោយ គឺផ្អែកលើការសន្និដ្ឋានមិនពិត។ យើងនឹងទទួលបរាជ័យ [ក្នុងការចរចា] ប្រសិនបើយើងយល់ព្រមទទួលស្គាល់ថា យើងទទួលបរាជ័យក្នុងការបោះឆ្នោត។ ដូច្នេះប្រសិនបើពួកគេគិតថា ទទួលជ័យជម្នះក្នុងការបោះឆ្នោត ពួកគេគួរតែទទួលយកការស៊ើបអង្កេតណាមួយ”។
ប្រសិនបើគណបក្សសង្គ្រោះជាតិធ្វើបាតុកម្មបន្ថែមទៀត លោកនាយករដ្ឋមន្ត្រី ហ៊ុន សែន បានលើកឡើងនៅក្នុងសុន្ទរកថាកាលពីថ្ងៃពុធសប្ដាហ៍មុនថា គណបក្សប្រជាជនកម្ពុជា នឹងចាក់ផ្សាយសំឡេងថតក្នុងកិច្ចចរចាកាលពីពេលមុនៗរវាងគណបក្សទាំងពីរ នៅលើគេហទំព័រហ្វេសប៊ុក (Facebook) ដើម្បីបង្ហាញអ្នកគំាទ្រគណបក្សប្រឆាំងថា មេដឹកនាំគណបក្សសង្គ្រោះជាតិបោះបង់ចោលការទទូចរបស់ខ្លួនឲ្យមានការស៊ើបអង្កេតការបោះឆ្នោត ដោយប្ដូរយកតំណែងនានានៅក្នុងរដ្ឋសភាវិញ។
លោកស្រី មនោវិទ្យា បានស្វាគមន៍ចំណាត់ការរបស់លោក ហ៊ុន សែន។ លោកស្រីបានមានប្រសាសន៍ថា “យើងចង់ឲ្យសាធារណជនដឹងអំពីកិច្ចចរចាទាំងនោះ ដូច្នេះគណបក្សប្រជាជនអាចធ្វើបែបនេះ និងចេញខ្សែអាត់ថតសំឡេងនោះបាន ក៏ប៉ុន្តែគណបក្សប្រជាជនកម្ពុជាគួរតែចាក់ផ្សាយខ្សែអាត់សំឡេងនោះទាំងស្រុង”។
លោក កែម ឡី អ្នកវិភាគនយោបាយឯករាជ្យបានលើកឡើងថា ប្រសិនបើគណបក្សសង្រោះជាតិសង្ឃឹមថា នឹងជំរុញឲ្យគណបក្សប្រជាជនកម្ពុជាធ្វើសម្បទានសំខាន់ៗនោះ ខ្លួនត្រូវបង្កើនសកម្មភាពបាតុកម្មរបស់ខ្លួន ឲ្យមានវិសាលភាពរហូតដល់ក្រៅទីក្រុង និងផ្ដោតសំខាន់ទៅលើ “អំណាចប្រជាជន” ជាជាងបញ្ចុះបញ្ចូលសហគមន៍អន្តរជាតិឲ្យជួយ។ លោកបានមានប្រសាសន៍ថា “ប្រសិនបើគណបក្សសង្គ្រោះជាតិនៅតែរៀបចំការជួបជុំគ្នាតាមរូបភាពដដែល [តែក្នុងរាជធានីភ្នំពេញ] នោះនឹងមិនមានប្រសិទ្ធភាពទេ។ ប្រសិនបើពួកគេសាកល្បងធ្វើមហាបាតុកម្ម [នៅតាមបណ្ដាខេត្ត] ដែលមានប្រជាជនរស់នៅ នោះការធ្វើបែបនេះអាចជាយុទ្ធសាស្ត្រដ៏ល្អមួយសម្រាប់គណបក្សសង្គ្រោះជាតិទទួលបានអំណាចចរចា”។
លោក កែម ឡី បានលើកឡើងបន្ថែមទៀតថា គណបក្សសង្គ្រោះជាតិក៏ត្រូវមានភាពជាក់លាក់អំពីអ្វីដែលខ្លួនសង្ឃឹមថានឹងសម្រេចបានតាមរយៈសកម្មភាពបាតុកម្មរបស់ខ្លួនផងដែរ។ លោកបានមានប្រសាសន៍ថា “ពួកគេត្រូវកំណត់គោលដៅឲ្យបានច្បាស់ និងលទ្ធផលរំពឹងទុក ដែលនឹងទទួលបានពីការធ្វើបាតុកម្មទាំងនេះ។ ពួកគេត្រូវតែផ្តោតសំខាន់ទៅលើរបៀបប្រើប្រាស់អំណាចប្រជាជន”។ លោកបានបន្ថែមថា ការអំពាវនាវឲ្យមានសម្ពាធអន្តរជាតិ ឬក៏ទណ្ឌកម្មលើរដ្ឋាភិបាល មិនទំនងជាមានប្រសិទ្ធភាពទេ។
ប៉ុន្តែលោក ឡៅ ម៉ុងហៃ អ្នកវិភាគនយោបាយម្នាក់ទៀតបានលើកឡើងថា លោកនៅតែមានសុទិដ្ឋិនិយមថា ប្រទេសជាហត្ថលេខីនៃកិច្ចព្រមព្រៀងទីក្រុងប៉ារីស ប្រហែលជាទទួលយកសេចក្ដីអំពាវនាវពីប្រជាជនកម្ពុជា ឲ្យមានការការពារសិទ្ធិលទ្ធិប្រជាធិបតេយ្យមូលដ្ឋានរបស់ពួកគេ ដែលត្រូវបានចែងនៅក្នុងកិច្ចព្រមព្រៀងសន្ដិភាពនេះ។
លោកបានមានប្រសាសន៍ថា “មួយក្នុងចំណោមពាក្យបណ្ដឹងសំខាន់ៗរបស់គណបក្សប្រឆាំង ក៏ដូចជាអ្នកគំាទ្ររបស់ខ្លួន គឺពាក្យបណ្ដឹងអំពីភាពមិនប្រក្រតីក្នុងការបោះឆ្នោត ហើយបញ្ហានេះមិនទាន់ត្រូវបានដោះស្រាយឲ្យបានសមស្របនៅឡើយទេ។ ដូច្នេះនៅក្នុងច្រកមួយនៅតែមានសំណួរទាក់ទងនឹងសិទ្ធិមូលដ្ឋានរបស់ប្រជាជនកម្ពុជា ពោលគឺសិទ្ធិបោះឆ្នោត សិទ្ធិជ្រើសរើសមេដឹកនាំ”។
លោក ឡៅ ម៉ុងហៃ បានមានប្រសាសន៍បន្តទៀតថា “រដ្ឋជាហត្ថលេខីនៃកិច្ចព្រមព្រៀងទីក្រុងប៉ារីសមានកាតព្វកិច្ចអន្តរជាតិ ចំពោះប្រជាជនកម្ពុជា បាននិយាយពីលទ្ធិប្រជាធិបតេយ្យនីតិរដ្ឋបែបប្រជាធិបតេយ្យ និងសិទ្ធិមនុស្សនៅប្រទេសកម្ពុជា។ ប្រទេសទាំងនោះ ឬក៏យ៉ាងហោចណាស់មួយចំនួនក្នុងចំណោមពួកគេ អាចនឹងពិចារណាអំពីកាតព្វកិច្ចរបស់ពួកគេ និងធ្វើអ្វីមួយ”៕
ប្រែសម្រួលដោយ កង សុធា