បន្ទាប់ពីអង្គការពលកម្មអន្តរជាតិប្រកាសថា គម្រោងរោងចក្រកាន់តែប្រសើរនៅកម្ពុជា (BFC) នឹងបញ្ចេញឈ្មោះ ក្រុមហ៊ុនដែលបំពានច្បាប់ការងារនៅកម្ពុជា សមាគមរោងចក្រកាត់ដេរនៅកម្ពុជា (GMAC)បានជំរុញឲ្យភាគីរោងចក្រ បដិសេធមិនឲ្យក្រុមអធិការកិច្ចរបស់អង្គការពលកម្មអន្តរជាតិចូល ប្រសិនបើមន្ត្រីរដ្ឋាភិបាលមិនចូលរួមដែរទេនោះ។
លោក កែន លូ អគ្គលេខាធិការសមាគមGMAC បានឲ្យដឹងថា ភាពស្ទាក់ស្ទើររបស់គម្រោង BFC មិនចង់ឲ្យសមាគមរបស់លោកពាក់ព័ន្ធក្នុងការពិភាក្សា និងភាពរស់រាន់របស់គម្រោងនេះក្នុងការអនុវត្តស្តង់ដារត្រួតពិនិត្យថ្មីនេះ គឺជាមូលហេតុដែលនាំឲ្យគាត់ប្រាប់រោងចក្រនានាថា អធិការកិច្ចនៅតាមរោងចក្រនានា ត្រូវតែមានការចូលរួមរបស់មន្ត្រីរដ្ឋាភិបាល ដែលនេះជាសេចក្តីណែនាំមួយដែលលោកអះអាងថា ជាផ្នែកមួយនៃកិច្ចព្រមព្រៀងដើមរវាងភាគីពាក់ព័ន្ធ។
លោក កែន លូ ថ្លែងថា “BFC ធ្វើហួសសមត្ថកិច្ចរបស់ខ្លួនហើយ។ការងាររបស់ពួកគេគឺត្រូវត្រួតពិនិត្យនិងរាយការណ៍ មិនមែនអនុវត្តទេ ដែលជាការងាររបស់រដ្ឋាភិបាល។ពេលនេះ ពួកគេនឹងបន្ត ហើយកំពុងខិតខំអនុវត្តក្រមប្រតិបត្តិថ្មីៗ ដោយមិនពាក់ព័ន្ធនឹងភាគីពាក់ព័ន្ធពីរក្នុងចំណោមភាគីបី។ យើងគិតដូច្នោះថា វារុញដល់បំពង់ករបស់យើងហើយ។ យន្តការដែលយើងត្រូវសម្តែងការមិនពេញចិត្តរបស់យើងប៉ុណ្ណោះ គឺអំពាវនាវដល់ម្ចាស់រោងចក្រទាមទារឲ្យរដ្ឋាភិបាល និង GMAC មានការពាក់ព័ន្ធនៅពេលណាគម្រោងរោងចក្រកាន់តែប្រសើរមកធ្វើអធិការកិច្ច”។
លោក កែន លូ អះអាងថា អនុស្សរណៈនៃការយល់យោគគ្នាដំបូងស្តីពីការត្រួតពិនិត្យសកម្មភាពក្នុងរោងចក្រដែលត្រូវបានបញ្ចប់ហើយនោះ និងត្រូវបានចុះហត្ថលេខាដោយរដ្ឋាភិបាល GMAC និងអង្គការពលកម្មអន្តរជាតិបានចែងថា ភាគីទាំងអស់នឹងពាក់ព័ន្ធនៅគ្រប់ដំណាក់កាលទាំងអស់នៃកិច្ចពិភាក្សា និងការអនុវត្ត ប៉ុន្តែលោកស្រី ជីល ថាក់ឃ័រ (Jill Tucker) ទីប្រឹក្សាជាន់ខ្ពស់នៅ BFC អះអាងផ្ទុយពីនេះ។
លោកស្រីបន្តថា “[ ការដែលទាញមន្ត្រីរដ្ឋាភិបាលឲ្យចូលពាក់ព័ន្ធក្នុងអធិការកិច្ចនៅតាមរោងចក្រ] មិនសមស្របតាមតួនាទីរបស់យើងជាសា្ថប័នឯករាជ្យ និងអព្យាក្រឹត្យមួយដែលប្រតិបត្តិការដោយគ្មានការជ្រៀតជ្រែកទេ។ រដ្ឋាភិបាលគ្រាន់តែដើរតួនាទីជាអ្នកប្រឹក្សាយោបល់ប៉ុណ្ណោះ”។ លោកស្រីបានបន្តថា “មានមន្ត្រីរដ្ឋាភិបាលពាក់ព័ន្ធក្នុងការអធិការកិច្ច] ល្មើសនឹងអនុស្សរណៈ[ដោយឡែកមួយ] ដែលរោងចក្រនាំចេញសម្លៀកបំពាក់ទាំងអស់បានចុះ
ហត្ថលេខា [ជាមួយ BFC]”។
BFC បានប្រកាសកាលពីសប្តាហ៍មុនថាកាលពីក្នុងខែមករា ខ្លួនបានចាប់ផ្តើមបង្ហាញឈ្មោះជាសាធារណៈ និងសេចក្តីលម្អិតអំពីីទង្វើមិនសមស្របផ្នែកច្បាប់ប្រព្រឹត្តដោយរោងចក្រ ដែលមិនអនុវត្តតាមច្បាប់ការងាររបស់កម្ពុជា និងនិយាមអន្តជាតិ។ ចំណាត់ការនេះត្រូវបានដាក់ចេញ បន្ទាប់ពីអ្នកស្រាវជ្រាវនៅសាលាច្បាប់ ស្ទែនហ្វត កាលពីខែកុម្ភៈ បានចេញរបាយការណ៍មួយដែលបានសន្និដ្ឋានថា BFC មិនបានធ្វើឲ្យប្រាក់ឈ្នួល និងនិយាមសម្រាប់កម្មករក្នុងវិស័យកាត់ដេរកម្ពុជា មានភាពល្អប្រសើរឡើងទេ។
របាយការណ៍របស់ស្ទែនហ្វត ដែលបង្ហាញភាពមិនល្អនេះ បានបង្ហាញថា ការខ្វះតម្លាភាពរបស់ BFC ពិតជាបានធ្វើឲ្យបទដ្ឋានឧស្សាហកម្មសម្រាប់កម្មករកម្ពុជាដើរថយក្រោយ បើធៀបនឹងនិយាមក្នុងប្រទេសចិន ឥណ្ឌូណេស៊ី និងប្រទេសវៀតណាម ។ក្នុងចំណោមប្រទេសទាំងនេះ គ្មានប្រទេសណាមួយមានកម្មវិធីត្រួតពិនិត្យរោងចក្រគាំទ្រដោយអង្គការពលកម្មអន្តរជាតិនៅពេលនោះទេ។
លោក សាត សាមុត អនុរដ្ឋលេខាធិការក្រសួងការងារ បណ្តុះបណ្តាល និងវិជ្ជាជីវៈ បានឲ្យដឹងថា លោកកំពុងតែធ្វើការនាំំ BFC និង CMAC ឲ្យមករកតុចរចា ដើម្បីកំណត់លក្ខខណ្ឌសម្រាប់រោងចក្រជាអទិភាពកំពូលឡើងវិញ។ លោក សាមុត បានថ្លែងថា “ខ្ញុំបានពិគ្រោះជាមួយសហជីព BFC, GMACនិងស្ថានទូតអាមេរិក ហើយបានព្រាងអនុស្សរណៈនៃការយល់យោគគ្នាថ្មីមួយ ហើយបញ្ជូនវាទៅឲ្យភាគីនានា[កាលពីព្រឹកម្សិលមិញ]។
យើងនឹងបង្កើតក្រុមការងារមួយដើម្បីដោះស្រាយបញ្ហា ហើយបន្ទាប់មកគឺរហូតដល់ខែមករា បានយល់ព្រមឲ្យមានដំណោះស្រាយមួយ”។ លោក សាមុត បានបន្ថែមទៀតថា “វាទំនងថា គ្រប់គ្នាចង់ឲ្យមានការបង្ហាញ [ការមិនអនុវត្តច្បាប់របស់រោងចក្រ] ប៉ុន្តែមានការបាត់បង់លទ្ធភាពក្នុងទំនាក់ទំនងគ្នាទៅវិញទៅមក”៕
ប្រែសម្រួលដោយ ចេវ ប៊ុននី