ក្រុមមន្ត្រីបាននិយាយថា នគរបាលរាជធានីភ្នំពេញបានចាប់ខ្លួនសង្ឃពីរអង្គ និងក្មេងវត្តពីរនាក់នៅក្នុងសង្កាត់ដង្កោ ខណ្ឌដង្កោកាលពីម្សិលមិញ ពីបទប្រើប្រាស់ និងជួញដូរគ្រឿងញៀនមេតំហ្វេតាមីន។
នគរបាលបានចាប់ខ្លួនបុរសម្នាក់អាយុ៣៣ឆ្នាំ ឈ្មោះ ហ៊ាង វីត នៅថ្ងៃមុននោះពីបទជួញដូរគ្រឿងញៀន ហើយជននេះបានចែកចាយគ្រឿងញៀននេះទៅឲ្យព្រះសង្ឃនៅវត្តសំបួរមាស ដែលជននេះបាននិយាយថា ជាអតិថិជនរបស់ខ្លួន។
លោក យឹម សារ៉ន អធិការនគរបាលខណ្ឌដង្កោបានមានប្រសាសន៍ថា “យើងបានរកឃើញគ្រឿងញៀនម៉ាទឹកកកចំនួន១៣កញ្ចប់តូចៗ នៅនឹងខ្លួនរបស់គាត់ ហើយគាត់បាននិយាយថា គាត់លក់ទៅឲ្យព្រសង្ឃនៅវត្តនោះ”។ លោក សារ៉ន មានប្រសាសន៍ថា នៅពេលនគរបាលទៅដល់វត្តនេះកាលពីម្សិលមិញ ពួកគេបានរកឃើញគ្រឿងញៀនមេតំហ្វេតាមីន ដប និងបំពង់បឺតនៅក្នុងកុដិរបស់សង្ឃទាំងពីរអង្គនេះ ព្រះនាម ព្រឿង សាវឿន ព្រះជន្ម២៨វស្សា និងប្អូនប្រុសរបស់ព្រះអង្គព្រះនាម ព្រឿង ដូណា ព្រះជន្ម២៤វស្សា។ ក្មេងវត្តពីរនាក់ឈ្មោះ ថន ចាន់សង្គ្រាម អាយុ១៧ឆ្នាំ និងឈ្មោះ ចាន់ សុធា អាយុ១៦ឆ្នាំ ដែលស្នាក់នៅក្នុងកុដិតែមួយនោះ ក៏ត្រូវបានចាប់ខ្លួនផងដែរ។
លោកបានមានប្រសាសន៍ថា “សង្ឃទាំងពីរអង្គនេះបានសារភាពថា ពិតជាបានប្រើប្រាស់គ្រឿងញៀនពិតប្រាកដមែន”។ លោកបានថ្លែងបន្តទៀតថា សង្ឃទាំងនេះត្រូវបានផ្សឹកភ្លាម។ សាវឿន ដូណា និង ចាន់សង្គ្រាម នឹងត្រូវបញ្ជូនទៅតុលាការនៅថ្ងៃនេះ បន្ទាប់ពីការធ្វើតេស្តឃើញថា មានសារធាតុគ្រឿងញៀនណាកូទិក ចំណែក សុធា ត្រូវបានដោះលែង វិញ ដោយសារតែលទ្ធផលធ្វើតេស្តមិនឃើញមានសារធាតុញៀនទេ៕
ប្រែសម្រួលដោយ ចេវ ប៊ុននី