អាជ្ញាធរបាននិយាយកាលពីម្សិលមិញថាព្រះមហាក្សត្រ នរោត្តម សីហមុនី បានយាងទៅភូមិមួយដែលរងផលប៉ះបាល់ដោយទឹកជំនន់ដើម្បីប្រទានគ្រឿងឧបភោគបរិភោគ និងថវិកាដល់ប្រជាពលរដ្ឋចំនួន៥១៣គ្រួសារនៅក្នុងស្រុកល្វាឯម ខេត្តកណ្តាល។
លោក លី កុយ មេឃុំបឹងគ្រំ បានមានប្រសាសន៍ថា ព្រះមហាក្សត្រ សីហមុនី បានយាងទៅដល់សហគមន៍នេះដ៏គួរឲ្យភ្ញាក់ផ្អើល កាលពីព្រឹកថ្ងៃពុធ ដើម្បីមានបន្ទូលទៅកាន់ប្រជាពលរដ្ឋដែលបានរងការខូចខាតផលដំណាំរបស់ខ្លួនដោយសារទឹកជំនន់ និងដើម្បីប្រទានអំណោយដោយផ្ទាល់ព្រះហស្ត។ លោក លី កុយ បានមានប្រសាសន៍ថា “អ្នកភូមិរបស់យើងសប្បាយរីករាយជាខ្លាំង ដែលពួកគាត់បានជួបព្រះភ័ក្រ្តព្រះមហាក្សត្រដោយផ្ទាល់ បើទោះជាពួកគាត់រងគ្រោះដោយទឹកជំនន់ក៏ដោយ”។
លោកបានបន្ថែមថា ក្នុងមួយគ្រួសារៗទទួលបានថវិកាចំនួន ១០០.០០០រៀល អង្ករ៥០គីឡូក្រាម មី និងគ្រឿងឧបភោគបរិភោគជាច្រើនទៀត។ លោក លី កុយ បានមានប្រសាសន៍ថា គ្រួសារដែលរងផលប៉ះពាល់នៅក្នុងសហគមន៍របស់លោកបានបាត់បង់ផលដំណាំ និងបន្លែបង្ការលើផ្ទៃដីសរុប២០ហិកតា។ លោកបានមានប្រសាសន៍ថា “ ប៉ុន្តែ មិនមាននរណាម្នាក់ស្លាប់ឡើយ ហើយផ្ទះសំបែងរបស់ពួកគាត់ ក៏មិនបានលិចលង់ដែរ”។
នៅក្នុងសេចក្តីថ្លែងការណ៍មួយកាលពីម្សិលមិញ សមាជិកសភាមកពីគណបក្សប្រជាជនកម្ពុជាបានថ្លែងអំណរគុណដល់ព្រះមហាក្សត្រ នរោត្តម សីហមុនី និងសម្តេចម៉ែ នរោត្តម មុនីនាថ ដែលបានជួយដល់ជនរងគ្រោះដោយទឹកជំនន់នេះ។ សេចក្តីថ្លែងការណ៍ដដែលនេះបានលើកឡើងទៀតថា “ យើងសូមសំដែងអំណរគុណយ៉ាងជ្រាលជ្រៅដល់ព្រះករុណាជាម្ចាស់ជីវិតតម្កល់លើត្បូង”៕
ប្រែសម្រួលដោយ សោម សារុន