ក្រុមមន្ត្រីបានលើកឡើងកាលពីម្សិលមិញថា ស្ថានភាពកំពុងតែយ៉ាប់យ៉ឺនសម្រាប់អ្នកទោសរាប់រយនាក់ ដែលត្រូវបានជម្លៀសដោយសារទឹកជំនន់ចេញពីពន្ធនាគារខេត្តបន្ទាយមានជ័យទៅកាន់ពន្ធនាគារខេត្តសៀមរាបនិងខេត្តបាត់ដំបងដែលមានអ្នកទោសច្រើនរួចទៅហើយ ហើយអង្គការសិទ្ធិមនុស្ស នៅមិនទាន់ច្បាស់នៅឡើយទេ ថាតើស្ថានភាពនេះនឹងបន្តរហូតដល់ពេលណា មុនពេលពន្ធនាគារខេត្តបន្ទាយមានជ័យវិលមករកសភាពធម្មតាឡើងវិញ។
អ្នកទោសចំនួន៨៣៦នាក់នៅក្នុងពន្ធនាគារខេត្តបន្ទាយមានជ័យត្រូវបានជម្លៀស កាលពីថ្ងៃព្រហស្បតិ៍ បន្ទាប់ទឹកជំនន់បានបុកបំបាក់ជញ្ជាំងថ្ម រួចហូរយ៉ាងខ្លាំងចូលទៅក្នុងបរិវេណពន្ធនាគារ។ អង្គការសិទ្ធិមនុស្សបានលើកឡើងថា ការជម្លៀសអ្នកទោសនេះបានធ្វើឲ្យពន្ធនាគារខេត្តសៀមរាបលើសសមត្ថភាពផ្ទុកចំនួន១៧២ភាគរយ រីឯពន្ធនាគារខេត្តបាត់ដំបងវិញក៏លើសសមត្ថភាពផ្ទុកចំនួន២១៦ភាគរយផងដែរ ហើយអ្នកទោសឥឡូវនេះងាយនឹងឆ្លងជំងឺខ្លាំងណាស់ រីឯប្រព័ន្ធពន្ធនាគារក៏អាចមានបញ្ហាដែរ។
លោក សារុន គ្រីតូហ្វ (Sharon Critoph) អ្នកផ្តល់ប្រឹក្សាគម្រោងពន្ធនាគារនៅអង្គការសិទ្ធិមនុស្សលីកាដូបានលើកឡើងថា ”វាគ្រាន់តែជាការជម្លៀសរយៈពេលខ្លីប៉ុណ្ណោះ ប៉ុន្តែយើងកំពុងព្រួយបារម្ភអំពីដំណើរការនៅក្នុងពន្ធនាគារ ច្បាប់និងប្រព័ន្ធតុលាការអំឡុងពេលនេះ”។ លោកបានព្យាករថា វាអាចមានរយៈពេលបួនសប្តាហ៍រឺក៏លើសពីនេះ មុនពេលទឹកជំនន់នៅក្នុងពន្ធនាគារខេត្តបន្ទាយមានជ័យបានស្រកអស់ទៅវិញ។
លោក បានបន្ថែមថា ”អ្នកទោសគួរតែមានសិទ្ធិទទួលបានការបើកសវនាការ ជំនុំជម្រះ រឺក៏ដោះលែងនៅប៉ុន្មានសប្តាហ៍ក្រោយ ប៉ុន្តែដោយសារឥឡូវត្រូវបានជម្លៀស ហេតុដូច្នេះពួកគេកំពុងប្រឈមនឹងការត្រូវគេបំភ្លេចចោល ជាពិសេសប្រសិនបើឯកសាររបស់ពួកគេនៅពន្ធនាគារខេត្តបន្ទាយមានជ័យត្រូវទុកចោល ឬក៏រងការខូចខាតដោយសារទឹកជំនន់នោះ”។
លោក ហ៊ិន សុផល ប្រធានពន្ធនាគារខេត្តបន្ទាយមានជ័យបានមានប្រសាសន៍ថា ឯកសារនៅពន្ធនាគាររបស់លោក គឺមានសុវត្ថិភាពជាធម្មតា។
លោកបានលើកឡើងថា”ឯកសារពាក់ព័ន្ធនឹងអ្នកទោសមិនបានបាត់បង់ឬក៏ខូចខាតនោះឡើយ”។ លោកបានបដិសេធមិនរៀបរាប់ថា តើដំណើរការរបស់តុលាការនឹងបន្តដោយរបៀបណានោះទេ ខណៈពន្ធនាគាររបស់លោកកំពុងនៅមានទឹកជំនន់នៅឡើយ។
វាគឺរឿងសាមញ្ញទៅហើយនៅកម្ពុជាដែលពន្ធនាគារមានអ្នកទោសច្រើននោះ។ របាយការណ៍ដែលចេញដោយអង្គការសិទ្ធិមនុស្សលីកាដូនៅក្នុងឆ្នាំនេះ បានបង្ហាញ ថា មានតែពន្ធនាគារចំនួនពីរប៉ុណ្ណោះក្នុងចំណោមពន្ធនាគារចំនួន១៨ ដែលខ្លួនបានឃ្លាំមើល មានអ្នកទោសក្រោមកម្រិត១០០ភាគរយ ប៉ុន្តែក្រៅពីនេះមានអ្នកទោសលើសពីសមត្ថភាពផ្ទុកទ្វេដង។
លោក រ៉ាន វណ្ណឆន អ្នកស្រាវជ្រាវពីពន្ធនាគារនៅអង្គការសិទ្ធិមនុស្សលីកាដូ បានមានប្រសាសន៍ថា អ្នកទោសជាស្ត្រីនៅក្នុងពន្ធនាគារខេត្តបាត់ដំបង ត្រូវបានជម្លៀសទៅកន្លែងពិនិត្យសុខភាពដែលស្ថិតនៅក្នុងពន្ធនាគារនេះ ដើម្បីទុកកន្លែងទំនេរសម្រាប់ឲ្យអ្នកទោសថ្មីមកពីខេត្តបន្ទាយមានជ័យចំនួន៣៤៤នាក់ដេក។ លោកបានមានប្រសាសន៍ថា ពន្ធនាគារកំពុងតែជួបបញ្ហាក្នុងការស្វែងរកទីកន្លែងឲ្យអ្នកទោសដេក។ ពីមុនមានអ្នកទោសប្រហែល១៣នាក់ក្នុងមួយបន្ទប់ ប៉ុន្តែឥឡូវមានទោស១៨នាក់ ឬក៏១៩នាក់”។
លោក ស វណ្ណារ៉ា អ្នកស្រាវជ្រាវពីពន្ធនាគារនៅអង្គការសិទ្ធិមនុស្សលីកាដូប្រចាំខេត្តសៀមរាប បានលើកឡើងថា ពន្ធនាគារមិនមានកន្លែងទំនេរគ្រប់គ្រាន់សម្រាប់អ្នកទោសទាំងអស់ដេកឡើយ។ លោកបានលើកឡើងថា វាលំបាកណាស់សម្រាប់អ្នកទោសក្នុងការដេកនៅទីនេះ។ គ្រប់ពេលដែលអ្នកទោសភ្ញាក់ ហើយចាកចេញពីកន្លែងរបស់ខ្លួន អ្នកផ្សេងនឹងយកកន្លែង ដេកវិញម្តង”។ លោកបានលើកឡើងបន្តថា ”បញ្ហាអនាម័យគឺមិនមានបញ្ហាអ្វីទេនៅទីនេះ ប៉ុន្តែ ប្រសិនបើអ្នកទោសនៅទីនេះលើ់សពីជាងមួយសប្តាហ៍នោះ នឹងមានបញ្ហាមួយចំនួនកើតឡើង”។
លោក អ៊ែនឌ្រា អាសឺប៊ីស (Andrea Acerbis) ប្រធានការិយាល័យនៃគណៈកម្មការកាកបាទក្រហមអន្តរជាតិប្រចាំប្រទេសកម្ពុជាបានលើកឡើងថា អង្គការរបស់លោកបានចែកមុង ស្បៀងអាហារ អង្រឹង សម្ភារសម្រាប់ការពារអនាម័យ និងថ្មាំពេទ្យទៅកាន់ពន្ធនាគារដែលមានអ្នកទោសយ៉ាងច្រើនចំនួនពីរ។
លោកបានមានប្រសាសន៍ថា “ជាក់ស្តែង វាមិនមែនជាស្ថានភាពល្អនោះទេ ហើយវាអាចមានគ្រោះថ្នាក់ខ្លាំងដល់សុខភាព ប៉ុន្តែ វាគឺជាស្ថានភាពបន្ទាន់ ហើយកំពុងតែខិតខំប្រឹងប្រែងឲ្យអស់ពីសមត្ថភាព”។ លោកបានមានប្រសាសន៍បន្តថា ”អ្នកទោស [ដែលត្រូវបានជម្លៀស] បានដឹងខ្លួនឯងថា ប្រសិនបើនៅក្នុងពន្ធនាគារខេត្តបន្ទាយមានជ័យ ពួកគេនឹងត្រូវលិចលង់ក្នុងទឹកជំនន់កម្ពស់ប្រហែល១,៧ម៉ែត្រ ហេតុដូច្នេះបានស្នាក់នៅពន្ធនាគារដែលខ្លួនត្រូវបានជម្លៀសទៅ វាគឺរឿងដ៏ប្រសើរបំផុត”។
ក្រសួងធនធានទឹក និងឧតុនិយមកាលពីម្សិលមិញបានចេញសេចក្តីប្រកាសមួយដោយព្រមានថា ព្យុះត្រូពិចណារី នឹងបោកបក់មកលើប្រទេសវៀតណាមនៅថ្ងៃពុធ ដោយបង្កឲ្យមានភ្លៀងធ្លាក់ខ្លាំងទូទាំងប្រទេសកម្ពុជា និងធ្វើឲ្យកម្រិតទឹកកើនឡើង៕
ប្រែសម្រួលដោយ ស៊ា ស៊ុយឈាង