នគរបាលបានឲ្យដឹងកាលពីម្សិលមិញថា និរទេសជនខ្មែរម្នាក់ អាយុ៣៦ឆ្នាំ ដែលមកពីសហរដ្ឋអាមេរិក ត្រូវបានចាប់ខ្លួនកាលពីថ្ងៃសុក្រ និងត្រូវបានចោទប្រកាន់ពីបទធ្វើឃាតបុរសអាយុ១៩ឆ្នាំម្នាក់នៅក្នុងស្រុកកំរៀង ខេត្តបាត់ដំបង។
លោក ឆែម គឹមហុង អធិការនគរបាលស្រុកបានឲ្យដឹងថា សាកសពជនរងគ្រោះឈ្មោះ ទេព ទិត្យសំអុល ត្រូវបានគេប្រទះឃើញនៅក្នុងបរិវេណអនុវិទ្យាល័យមួយកាលពីថ្ងៃទី១៦ ខែតុលា និងមានរបួសនៅក្បាលដោយសារត្រូវបានកាប់នឹងពូថៅ។
លោក គឹមហុង បានមានប្រសាសន៍ថា “ជនរងគ្រោះត្រូវបានកាប់នឹងពូថៅចំក្បាលចំនួនបីពូថៅ ហើយគាត់បានស្លាប់ក្នុងបរិវេណអនុវិទ្យាល័យ កាលពីយប់ថ្ងៃអង្គារ”។លោកបន្តថា ជនសង្ស័យឈ្មោះ ញឹម សំអាត បានលួងលោមជនរងគ្រោះដោយយកលេសថា គ្រួសារខ្លួនចង់ជួបជនរងគ្រោះ។
លោក គឹមហុង បានមានប្រសាសន៍បន្តថា “ជនសង្ស័យបានបញ្ចុះបញ្ចូលជនរងគ្រោះឲ្យទៅលេងគ្រួសាររបស់ខ្លួននៅឯស្រុក កំរៀង ទាំងយប់។ ជនសង្ស័យបានសារភាពថា ខ្លួនបានបញ្ចាំម៉ូតូរបស់ជនរងគ្រោះបានប្រាក់៣០០.០០០រៀល [ប្រហែល៧៥ដុល្លារ] ដើម្បីទិញគ្រឿងញៀន”។ ម្ចាស់ហាងបញ្ចាំរួមជាមួយសាច់ញាតិពីរនាក់របស់ជនសង្ស័យឈ្មោះ សំអាត ដែលបានជួយគាត់ក្នុងការបញ្ចាំម៉ូតូនេះ ក៏ត្រូវបានចាប់ខ្លួនផងដែរ និងត្រូវបានចោទប្រកាន់ពីបទសមគំនិត។
លោក អឿន ទិត្យ អធិការនគរបាលស្រុកបវេល បានឲ្យដឹងថា ជនសង្ស័យឈ្មោះ ញឹម សំអាត បានរស់នៅក្នុងស្រុករបស់លោកចាប់តាំងពីជននេះត្រូវបាននិរទេសពីសហរដ្ឋអាមេរិក កាលពីប្រាំឆ្នាំមុន ហើយ កន្លងមក ជននេះបានជាប់ពន្ធនាគារនៅប្រទេសកម្ពុជា តាមការចោទប្រកាន់ថា ទាក់ទងនឹងគ្រឿងញៀន៕
ប្រែសម្រួលដោយ ចេវ ប៊ុននី