កាលពីម្សិលមិញ អង្គការសិល្បៈខ្មែរអមតៈបានផ្តល់អាហារូបករណ៍តម្លៃ៣០.០០០ដុល្លារសម្រាប់ឆ្នាំសិក្សាខាងមុខនេះដល់សិស្សចំនួន២៥នាក់ដែលមានអាយុចាប់ពី១៦ឆ្នាំ មកពីគ្រួសារមានប្រាក់ចំណូលទាប។
កញ្ញា អៀម សូលីដា អ្នកសម្របសម្រួលកម្មវិធីអាហារូបករណ៍នៅអង្គការសិល្បៈខ្មែរអមតៈបាននិយាយថា “ជារឿយៗ ពួកគេមិនមានឱកាសបន្តការសិក្សាទេ ហើយទោះបីជាលុយនេះតិចតួចក៏ដោយ ក៏វាច្រើនសម្រាប់សិស្សទាំងនេះដែរ ហើយលុយនេះអាចជួយពង្រីកចំណេះដឹងផ្នែកសិល្បៈរបស់ពួកគេបាន និងជួយឲ្យពួកគេមានសមត្ថភាពរកការងារបានធ្វើ”។
កញ្ញាបានបន្ថែមថា សិស្សម្នាក់ៗទទួលបានថ្លៃសាលាចំនួន៦០០ដុល្លារនិងថ្លៃចំណាយផ្សេងៗប្រចាំខែចំនួន៥០ដុល្លារ។
គណៈកម្មាធិការមួយដែលជាមន្ត្រីមកពីក្រសួងវប្បធម៌និងវិចិត្រសិល្បៈ វិចិត្រករអាជីព និងគ្រូបង្រៀនបានជ្រើសរើសសិស្សជាប់ឈ្មោះដំណាក់កាលដំបូង ហើយបន្ទាប់មកពួកគេត្រូវបង្ហាញគណៈវិនិច្ឆ័យថា អាហារូបករណ៍នេះអាចជួយឲ្យពួកគេរកការងារបានធ្វើនៅក្នុងផ្នែកសិល្បៈ។
កញ្ញា សូលីដា បាននិយាយថា “ ប្អូនៗត្រូវសរសេរអត្ថបទមួយបង្ហាញថា តើប្អូនៗត្រូវដោះស្រាយដូចម្តេចចំពោះអាហារូបករណ៍នេះ និងថា តើប្អូនៗគិតដូចម្តេចចំពោះសិល្បៈ។ ប្រសិនបើសិស្សទាំងអស់មានផែនការច្បាស់លាស់ ពួកគេនឹងត្រូវយកមកពិចារណា”។
សិស្សអាហារូបករណ៍ទាំង២៥នាក់នេះត្រូវរៀនប្រើឧបករណ៍តន្ត្រីផ្សេងៗ រៀនរបាំនិងស្មូត៕គឹមហឿន