ក្មេងស្រីអាយុ២ឆ្នាំម្នាក់នៅក្នុងខេត្តក្រចេះ និង៨ឆ្នាំម្នាក់នៅក្នុងរាជធានីភ្នំពេញបានក្លាយជាជនរងគ្រោះថ្មីបំផុតពីការចាប់រំលោភ កាលពីចុងសប្តាហ៍មុន នៅក្នុងឆ្នាំនេះ ដែលមានករណីរំលោភកុមារជាង១០០ករណីរួចហើយ ដោយជំរុញឲ្យមានការអំពាវនាវធ្វើយុទ្ធនាការទូទាំងប្រទេសដើម្បីបង្ហាញពីការកើនឡើងនៃបទឧក្រិដ្ឋដ៏ឃោរឃៅនេះ។
លោក ហួត លឹមហ៊ាង ប្រធានការិយាល័យនគរបាលព្រហ្មទណ្ឌកម្រិតធ្ងន់ខេត្តបានមានប្រសាសន៍ថា កាលពីម្សិលមិញសាលាដំបូងខេត្តក្រចេះបានចោទប្រកាន់ឈ្មោះ ហោ បញ្ញា អាយុ២១ឆ្នាំជាជាងជួសជុលម៉ូតូពីបទរំលោភក្មេងស្រីអាយុ២ឆ្នាំម្នាក់នៅក្នុងផ្ទះបស់ខ្លួននៅឃុំអូរគ្រៀង ស្រុកសំបូរ កាលពីរសៀលថ្ងៃព្រហស្បតិ៍។ លោក លឹមហ៊ាង បានមានប្រសាសន៍ថា “ជនសង្ស័យរូបនេះបានបដិសេធថា មិនបានរំលោភក្មេងស្រីរូបេនះទេ ហើយបានអះអាងថា គេគ្រាន់តែនាំក្មេងស្រីនេះដើរលេងប៉ុណ្ណោះ”។
លោក ប៊ុន ឈឿន អធិការនគរបាលស្រុកបានមានប្រសាសន៍ថា ជនសង្ស័យរូបនេះ និងក្មេងស្រីរូបនេះ គឺជាអ្នករស់នៅក្នុងភូមិអូរកណ្តៀងជាមួយគ្នា។
លោកបានមានប្រសាសន៍ថា វេជ្ជបណ្ឌិតនៅមន្ទីរពេទ្យបង្អែកសៀមរាបបានបញ្ជាក់ថា ក្មេងស្រីរូបនេះត្រូវបានគេរំលោភ ហើយជនសង្ស័យរូបនេះត្រូវបានចាប់ខ្លួនកាលពីថ្ងៃសុក្រ។
លោក ម៉ក់ ហុង អធិការនគរបាលខណ្ឌបានមានប្រសាសន៍ថា នៅក្នុងករណីដាច់ដោយឡែកមួយទៀត ឈ្មោះ ម៉ោក ចំរើន អាយុ៤៩ឆ្នាំ ជាកម្មករសំណង់រស់នៅក្នុងខណ្ឌសែនសុខ រាជធានីភ្នំពេញ ត្រូវបានចាប់ខ្លួនកាលពីម្សិលមិញ ពីបទរំលោភក្មេងស្រីអាយុ៨ឆ្នាំម្នាក់ ដែលបានដើរកាត់ផ្ទះរបស់ខ្លួន។
លោក ម៉ក់ ហុង បានមានប្រសាសន៍ថា “យើងបានចាប់ខ្លួនជនសង្ស័យរូបនេះហើយ”។ ប៉ុន្តែ លោកបានបដិសេធមិនធ្វើអត្ថាធិប្បាយបន្ថែមអំពីការរំលោភនេះទេ។
អង្គការសិទ្ធិមនុស្សអាដហុក ទទួលបានករណីរំលោភកុមារចំនួន១២០ករណីនៅក្នុងរយៈពេល១១ខែដំបូងនៃឆ្នាំនេះ។ របាយការណ៍មួយដែលអង្គការសហប្រជាជាតិបានចេញកាលពីខែកញ្ញា បានរកឃើញថា បុរសម្នាក់ក្នុងចំណោមបុរសប្រាំនាក់បានរំលោភស្ត្រី ដោយពួកគេជាងពាក់កណ្តាលបានប្រព្រឹត្តអំពើរំលោភជាលើកដំបូង មុនពេលពួកគេមានអាយុ២០ឆ្នាំ។ កាលពីថ្ងៃទី១២ ខែតុលា ក្មេងប្រុសអាយុ១៥ឆ្នាំម្នាក់ត្រូវបានចាប់ខ្លួនពីបទរំលោភបងប្អូនស្រីបង្កើតពីរនាក់ ដែលមានអាយុ៥ឆ្នាំ និង៩ឆ្នាំនៅក្នុងខេត្តបន្ទាយមានជ័យ។
លោកស្រី មូរ សុខហួរ តំណាងរាស្ត្រមកពីគណបក្សសង្គ្រោះជាតិ និងជាអតីតរដ្ឋមន្ត្រីក្រសួងកិច្ចការនារីបានមានប្រសាសន៍ថា “វាជារឿងគួរឲ្យរន្ធត់។ត្រូវមានយុទ្ធនាការដើម្បីការពារជនរងគ្រោះ ដូច្នេះពួកគេអាចនិយាយអំពីការរំលោភ”។ លោកស្រីបានបន្ថែមថា យុទ្ធនាការទូទាំងប្រទេសដែលមានអ្នកកាន់ទង់ធំមួយ គឺជាការចាំបាច់ដើម្បីធានាថា ជនរងគ្រោះ និងគ្រួសាររបស់ពួកគេមានអារម្មណ៍ថា មានសុវត្ថិភាពនៅពេលរាយការណ៍អំពីបទល្មើសនេះ។
លោកស្រីបានមានប្រសាសន៍ថា គួរតែមានការខំប្រឹងប្រែង ដើម្បីផ្តល់ការពិគ្រោះយោបល់ផ្នែកចិត្តសាស្ត្រភ្លាមៗដល់ជនរងគ្រោះពីការរំលោភ។
លោកស្រី ដេនីស សេហ្វឺត ចនសុន ប្រធានផ្នែកទំនាក់ទំនងរបស់អង្គការយូនីសេហ្វកម្ពុជាបានមានប្រសាសន៍ថា បច្ចុប្បន្នមានព័ត៌មានតិចតួចណាស់អំពីការរំលោភកុមារនៅកម្ពុជា។
លោកស្រីបានមានប្រសាសន៍ថា “ខ្ញុំគិតថា ប្រជាជននៅកម្ពុជាមានការរន្ធត់ និងភ័យខ្លាច និងមានកំហឹង ប៉ុន្តែ មានបញ្ហាលំបាកមួយត្រង់ថា ប្រជាជនមិនបានដឹងអំពីបញ្ហាមួយចំនួនដែលបានកើតឡើង ហើយពួកគេមិនដឹងថា ត្រូវការពារកូនៗរបស់ខ្លួនដោយរបៀបណាទេ”។ លោកស្រីបានមានប្រសាសន៍ថា “បញ្ហានេះកើតឡើងនៅទីណា ដោយសារមូលហេតុអី តើវាជាបញ្ហាវប្បធម៌ ឬវាជាបញ្ហាយេនឌ័រ?” ។ លោកស្រីបានបន្ថែមថា របាយការណ៍ថ្មីមួយរបស់អង្គការយូនីសេហ្វ ដែលចេញនៅដើមឆ្នាំក្រោយនឹងឆ្លើយសំណួរទាំងនេះ។ លោកស្រីបានមានប្រសាសន៍បន្តថា “នៅពេលចេញរបាយការណ៍នេះ នឹងមានយុទ្ធនាការធំមួយ”។
លោកស្រី សេហ្វឺត ចនសុន ក៏បានលើកឡើងពីភាពផ្ទុយគ្នារវាងស្ថានភាពនៅកម្ពុជា និងស្ថានភាពនៅប្រទេសឥណ្ឌា និងនៅអាហ្វ្រិកខាងត្បូងផងដែរ ដែលនៅទីនោះករណីរំលោភកុមារនាពេលថ្មីៗនេះបានជំរុញឲ្យមានការថ្កោលទោស និងមហាបាតុកម្មទូទាំងប្រទេស។ លោកស្រីបានមានប្រសាសន៍ថា “ យើងមិនចង់ឲ្យរឿងអាក្រក់កើតឡើងនៅកម្ពុជា មុនពេលមនុស្សគ្រប់គ្នាចាប់អារម្មណ៍លើបញ្ហានោះទេ”៕ គឹម ហឿន