មជ្ឈមណ្ឌលបុប្ផាណា ដែលមានទីតាំងនៅក្នុងរាជធានីភ្នំពេញ នឹងក្លាយជាកន្លែងសម្រាប់ប្រារព្ធខួបឯករាជ្យលើកទី៦០ ក្នុងសប្ដាហ៍នេះ ដោយនឹងមានកិច្ចពិភាក្សាមួយចំនួនពាក់ព័ន្ធនឹងព្រឹត្តិការណ៍នានាអំឡុងទសវត្សរ៍ឆ្នាំ១៩៦០។
កាលពី៦០ឆ្នាំមុននៅថ្ងៃទី៩ ខែវិច្ឆិកា ឆ្នាំ១៩៥៣ ព្រះមហាក្សត្រនរោត្តម សីហនុ ទាមទារបានឯករាជ្យពីប្រទេសបារំាង ដោយបញ្ចប់ការគ្រប់គ្រងរយៈពេល៩ទសវត្សរ៍របស់ប្រទេសបារំាងមកលើប្រទេសកម្ពុជា។ រីឯកិច្ចព្រមព្រៀងទីក្រុងហ្សឺណែវវិញក៏បានធ្វើឲ្យការគ្រប់គ្រងរបស់ប្រទេសបារំាងលើតំបន់ឥណ្ឌូចិនត្រូវរលាយជាផ្លូវការ កាលពីខែកក្កដា ឆ្នាំ១៩៥៤ផងដែរ។
នៅវេលាម៉ោង១០ព្រឹកនេះនៅឯមជ្ឈមណ្ឌលបុប្ផាណា តាមបណ្ដោយផ្លូវលេខ២០០ លោក ពេជ្រ ទុំក្រវឹល អតីតតារាសម្ដែងអំឡុងទសវត្សរ៍ឆ្នាំ១៩៦០ ដែលបានដើរតួយ៉ាងសំខាន់ក្នុងការស្រោចស្រង់នៃវិស័យសិល្បៈ ក្រោយសម័យខ្មែរក្រហមនោះនឹងនិយាយអំពីការរីកចម្រើននៃវិស័យសិល្បៈ និងវប្បធម៌ក្នុងរយៈពេលប៉ុន្មានឆ្នាំដំបូង ក្រោយទទួលបានឯករាជ្យ។ នៅ ម៉ោងប្រាំមួយល្ងាចថ្ងៃ ពុធ លោក ជីនមីឆែល ហ្វីលីពី (Jean-Michel Filippi) ជាអ្នកស្រាវជ្រាវ និងជាភាសាវិទូ នឹងនិយាយអំពីសម្ដេចឪនរោត្តម សីហនុ និងនយោបាយ។ ហើយនៅថ្ងៃព្រហស្បតិ៍ វេលាម៉ោង៦ល្ងាចដដែល លោក វណ្ណ ម៉ូលីវណ្ណ ស្ថាបត្យករដ៏ល្បី ដែលបានគូរប្លង់សម្រាប់រាជធានីភ្នំពេញនៅទសវត្សរ៍ឆ្នាំ១៩៦០នោះ នឹងពន្យល់អំពីចលនាស្ថាបត្យកម្មខ្មែរថ្មីនៅសម័យក្រោយទទួលបានឯករាជ្យ។
នៅថ្ងៃព្រហស្បតិ៍វេលាម៉ោងប្រាំមួយល្ងាច លោក ឌេត សុខឧត្តម ដែលធ្វើការនៅដេប៉ាតឺម៉ង់ទំនាក់ទំនងអន្តរជាតិនៅសាកលវិទ្យាល័យហ្សាម៉ាន់ (Zaman) ក្នុងរាជធានីភ្នំពេញ នឹងធ្វើបទបង្ហាញអំពីគោលនយោបាយការបរទេសរបស់ប្រទេសកម្ពុជា។ លោកបានមានប្រសាសន៍កាលពីម្សិលមិញថា “ ខ្ញុំនឹងនិយាយអំពីភាពតានតឹងនៃសង្គ្រាមត្រជាក់ក្នុងតំបន់និងទូទាំងពិភពលោក ជាពិសេសសង្គ្រាមនៅប្រទេសវៀតណាម ដែលបានជះឥទ្ធិពលយ៉ាងខ្លាំងលើការសម្រេចពាក់ព័ន្ធនឹងគោលនយោបាយការបរទេសរបស់អតីតព្រះអង្គម្ចាស់ នរោត្តម សីហនុ”។
លោក សុខ ឧត្តម ក៏នឹងនិយាយពីជម្លោះរវាងប្រទេសថៃ និងកម្ពុជាផងដែរទាក់ទិននឹងប្រាសាទព្រះវិហារ និងការអះអាងសិទ្ធិកាន់កាប់ទឹកដី ដែលបានធ្វើឲ្យប្រទេសកម្ពុជាដាក់ពាក្យបណ្ដឹងកាលពីឆ្នាំ១៩៥៩ទៅតុលាការយុត្តិធម៌អន្តរជាតិក្រុងឡាអេ ដែលកាត់ក្ដីឲ្យប្រទេសកម្ពុជាឈ្នះកាលពីឆ្នាំ១៩៦២ផងដែរ។
តុលាការនេះបានសើរើសេចក្ដីសម្រេចទាក់ទិននឹងដីនៅជាប់ប្រាសាទព្រះវិហារនេះឡើងវិញ ហើយត្រូវបានរំពឹងថា នឹងសេចក្ដីសម្រេចនៅថ្ងៃទី១១ ខែវិច្ឆិកា។
លោក ជា សុភាព អ្នកសម្របសម្រួលគម្រោងនៅមជ្ឈមណ្ឌលបុប្ផាណាបានមានប្រសាសន៍ថា “បន្ទាប់ពីទទួលបានឯករាជ្យ ប្រទេសកម្ពុជាត្រូវបានគេចាត់ទុកថា បានឈានដល់សម័យដ៏រុងរឿងបំផុត។ យើងចង់ចែករំលែកអ្វីៗដែលបានកើតឡើងពិតប្រាកដទាំងអស់នេះដល់ប្រជាពលរដ្ឋខ្មែរក្នុងប្រទេសកម្ពុជាទាំងអស់ឲ្យបានដឹង”៕ ស៊ុយឈាង