ក្រុមហ៊ុនស្ករសថៃចំនួនពីរបានច្រានចោលសំណើស្នើសុំឲ្យពួកគេមកជួបប្រជុំជាមួយអង្គការមិនមែនរដ្ឋាភិបាល និងតំណាងសហគមន៍ដែលបានចោទប្រកាន់ក្រុមហ៊ុនទាំងពីរនេះថា បានបណ្តេញអ្នកភូមិរាប់រយគ្រួសារដោយខុសច្បាប់ និងជួនកាលដោយហិង្សាចេញពីដីធ្លីរបស់ពួកគាត់នៅកម្ពុជា។
ក្រុមហ៊ុនស្ករស Mitr Phol Sugar និងក្រុមហ៊ុន Khon Kaen Sugar កំពុងប្រឈមនឹងបណ្តឹងដែលគេបានប្តឹងទៅគណៈកម្មាធិការសិទ្ធិមនុស្សជាតិរបស់ប្រទេសថៃថា ចម្ការរបស់ពួកគេនៅក្នុងខេត្តឧត្តរមានជ័យ និងខេត្តកោះកុងបានបង្ខំឲ្យអ្នកភូមិរាប់រយគ្រួសារចេញពីដីរបស់ពួកគាត់។
តំណាងមកពីសហគមន៍ចំនួនពីរ និងអង្គការមិនមែនរដ្ឋាភិបាលដែលជួយពួកគាត់កំពុងស្ថិតក្នុងប្រទេសថៃនៅសប្តាហ៍នេះ ដើម្បីស្នើសុំឲ្យបញ្ចេញរបាយការណ៍ស្តីពីការចោទប្រកាន់មកលើក្រុមហ៊ុនទាំងពីរនេះឡើងវិញ ហើយកាលពីសប្តាហ៍មុនបានសុំជួបជាមួយក្រុមហ៊ុនមួយក្នុងចំណោមក្រុមហ៊ុនទាំងពីរនៅថ្ងៃនេះ ឬថ្ងៃសៅរ៍។ តំណាងក្រុមហ៊ុន KSL បានលើកឡើងនៅក្នុងអ៊ីម៉េលថា “យើងសោកស្តាយណាស់ដែលប្រាប់លោកអ្នកថា យើងមិនអាចចូលរួមប្រជុំបាន ដោយសារមានការងារមមាញឹកពេក”។
តំណាងរូបនេះបាននិយាយទៀតថា “ទោះជាយ៉ាងណា ក្រុមហ៊ុនរបស់យើងមិនមែនមិនអើពើនឹងបញ្ហានេះទេ ដោយសារថា យើងបានសហការជាមួយដៃគូរបស់យើងដើម្បីប្រមូលភ័ស្តុតាង និងស៊ើបអង្កេតរកការពិតដែលពាក់ព័ន្ធទាំងអស់ដើម្បីដោះស្រាយបញ្ហានេះ”។
ក្រុមហ៊ុនជាដៃគូតូចមួយរបស់ក្រុមហ៊ុន KSL នៅក្នុងខេត្តកោះកុង គឺក្រុមហ៊ុន តៃវ៉ាន់ឈ្មោះ Ve Wong។ ក្រុមហ៊ុន Mitr Phol បានច្រានចោលសំណើសំុជួបប្រជំុដោយមូលហេតុថា របាយការណ៍ថ្មីបំផុតរបស់អង្គការមិនមែនរដ្ឋាភិបាលដែលបានចេញផ្សាយនៅក្នុងប្រទេសកម្ពុជា កាលពីខែកញ្ញានោះ មិនមានព័ត៌មានថ្មីពាក់ព័ន្ធរឿងនេះទេ។
លោក អ៊ីនទីរ៉ា ប៉ាក (Intira Park) ប្រធានផ្នែកទំនាក់ទំនងរបស់ក្រុមហ៊ុននេះបានលើកឡើងតាមអ៊ីម៉េលថា “ បន្ទាប់ពីពិនិត្យមើលឯកសាររួចហើយ យើងមិនឃើញមានព័ត៌មានថ្មីណាមួយឡើយ ហេតុដូច្នោះយើងសូមឲ្យអស់លោកងាកទៅរកសេចក្តីប្រកាសដែលយើងប្រកាសជាសាធារណៈកាលពីដំបូងនោះវិញ”។
នៅក្នុងសេចក្តីប្រកាសកាលពីខែកក្កដា ឆ្នាំ២០១២ ក្រុមហ៊ុន Mitr Phol បានលើកឡើងថា ក្រុមហ៊ុនមិនបានគាំទ្រការចាប់យកដីធ្វើជាកម្មសិទ្ធិឯកជន ឬបានបណ្តេញអ្នកភូមិចេញពីដីធ្លីឡើយ ហើយក្រុមហ៊ុនគោរពតាមច្បាប់ក្នុងស្រុកទាំងអស់ ក្នុងការទទួលបានចម្ការអំពៅនៅក្នុងខេត្តឧត្តរមានជ័យ។
សេចក្តីប្រកាសនេះបានបន្ថែមថា ក្រុមហ៊ុនមិនបានចូលរួមនៅក្នុងការពិគ្រោះយោបល់ដ៏តឹងតែងរបស់រដ្ឋាភិបាលជាមួយអ្នកភូមិក្នុងមូលដ្ឋានជាច្រើនគ្រួសារទេ ប៉ុន្តែបានកោតសរសើរចំពោះការផ្តល់ការងារ និងការបណ្តុះបណ្តាល។
ប៉ុន្តែ កសិករក្នុងមូលដ្ឋានដូចជា អ្នកស្រី សុង រ៉ាន់ បាននិយាយថា ការងារនៅតាមចម្ការអំពៅដែលទទួលបានប្រាក់កម្រៃតាមរដូវ និងបន្តិចបន្តួចនោះគឺតិចពេកមិនអាចជំនួសដីស្រែដែលពួកគាត់ធ្លាប់បានកាន់កាប់បានទេ។ អ្នកស្រី សុង រ៉ាន់ បាននិយាយថា អ្នកស្រីព្រមទាំងប្តីគាត់បានបាត់បង់ដីស្រែទំហំពីរហិកតា ដែលពួកគាត់ធ្លាប់ដាំដើមស្វាយចន្ទី និងដើមខ្នុរ។ អ្នកស្រីបាននិយាយថា “បន្ទាប់ពីឮថា ក្រុមហ៊ុនទាំងពីរនេះបានបដិសេធមិនព្រមមកចូលរួមប្រជុំនោះ ខ្ញុំមានការខកចិត្តខ្លាំងណាស់។ ក្រុមហ៊ុនទាំងពីរនេះបានយកដីរបស់យើង ហើយទុកឲ្យយើងកាន់តែក្រទៅៗ។នេះគឺជាលើកទី២ហើយដែលក្រុមហ៊ុនទាំងពីរនេះបានបដិសេធមិនព្រមមកជួបប្រជុំជាមួយពួកយើង។ វាបង្ហាញថា ក្រុមហ៊ុនស្ករសទាំងពីរនេះមិនចង់ដោះស្រាយវិវាទដីធ្លីដែលកំពុងតែកើតមាននេះតែម្តង”។
លោក អ៊ាង វុទ្ធី នាយកប្រតិបត្តិអង្គការសមធម៌កម្ពុជា ជាអង្គការក្រៅរដ្ឋាភិបាលមួយដែលជួយដល់គ្រួសារទាំងនេះបានអះអាងថា នេះជាលើកទី២ហើយដែលក្រុមហ៊ុនទាំងពីរនេះបានបដិសេធមិនមកជួបពួកគាត់។ លោកបានមានប្រសាសន៍ថា “នេះគឺជាការឆ្លើយតបដ៏គួរឲ្យខកចិត្តបំផុតរបស់ក្រុមហ៊ុនទាំងនេះ។ យើង និងជនរងគ្រោះបានធ្វើដំណើរពីប្រទេសកម្ពុជាដោយមានជំនឿមុតមាំថា នឹងលើកយកបញ្ហាទាំងនេះទៅពិភាក្សាជាមួយក្រុមហ៊ុនទាំងពីរ ប៉ុន្តែជាអកុសល ក្រុមហ៊ុនបានច្រានចោលសំណើរបស់យើងទៅវិញ”។
អ្នកភូមិជាច្រើនគ្រួសារដែលរងផលប៉ះពាល់ដោយសារចម្ការអំពៅរបស់ក្រុមហ៊ុន KSL នៅក្នុងខេត្តកោះកុង បច្ចុប្បន្ននេះកំពុងដាក់ពាក្យបណ្តឹង ដើម្បីប្តឹងក្រុមហ៊ុនស្ករសអង់គ្លេសឈ្មោះ Tate & Lyle ជាសាខារបស់ក្រុមហ៊ុនស្ករសអាមេរិកនៅក្នុងទីក្រុងឡុងដ៍។ពួកគាត់អះអាងថា ក្រុមហ៊ុនបានជំពាក់ប្រាក់ពួកគាត់ ពីព្រោះក្រុមហ៊ុននេះ បានទិញស្ករសពីចម្ការអំពៅទាំងនេះ ហើយលក់យកចំណេញ។ ក្រុមហ៊ុន Tate & Lyle បដិសេធមិនទទួលខុសត្រូវឡើយ។ គេរំពឹងថា រឿងនេះនឹងឡើងតុលាការនៅដើមឆ្នាំក្រោយ៕ សារុន
(រាយការណ៍បន្ថែមដោយ គុច ណារ៉េន)