មេធាវីកាន់សំណុំរឿងក្រុមហ៊ុន អឹម ហ្វូន (Mfone) បានឲ្យដឹងកាលពីម្សិលមិញថា ទ្រព្យ សម្បត្តិរបស់ក្រុមហ៊ុនប្រតិបត្តិករទូរស័ព្ទចល័តក្ស័យធន និងជំពាក់ប្រាក់ម្ចាស់បំណុលនានា ជាង១៦០លានដុល្លារនេះ ត្រូវបានលក់ឲ្យអតិថិជនម្នាក់មួយក្នុងតម្លៃ ចរចា១០លានដុល្លារ។
លោក ខាន់ សិរិវុទ្ធី ទីប្រឹក្សាច្បាប់របស់អភិបាលតែងតាំងដោយរដ្ឋាភិបាល ដើម្បីគ្រប់គ្រងដំណើរការទិញលក់ទ្រព្យសម្បត្តិរបស់ក្រុមហ៊ុន អឹមហ្វូន បានឲ្យដឹងថា ទ្រព្យសម្បត្តិរបស់ក្រុមហ៊ុននេះ ត្រូវបានលក់កាលពីថ្ងៃទី៤ខែសីហា ឲ្យក្រុមហ៊ុនទើបចុះបញ្ជីមួយឈ្មោះ Khmer Unified Network Communication Ltd. ដែលជាកម្មសិទ្ធិរបស់ក្រុមហ៊ុន ខ្មែរហូលឌីញ គ្រុប (Khmer Holding Group) របស់អ្នកជំនួញជនជាតិចិនមួយរូបឈ្មោះ ខៅ យុនឌី (Khao Yun Dy)។
គិតរហូតមកទល់ពេលនេះ ក្រុមហ៊ុនដែលជាអ្នកទិញទ្រព្យទាំងនេះ បានបង់ប្រាក់២,៥លានដុល្លារ ដោយបានបង់ជាពីរដំណាក់កាល។ ក្នុងនោះមួយលានដុល្លារត្រូវបានប្រើប្រាស់សម្រាប់ទូទាត់ប្រាក់ឈ្នួល៣០ភាគរយ នៃចំនួនប្រាក់ឈ្នួលរបស់អតីតបុគ្គលិក១.០៩២នាក់ ។ គិតត្រឹមម្សិលមិញ ពួកគេទើបតែទទួលបាន១០ភាគរយនៃចំនួនទឹកប្រាក់ដែលក្រុមហ៊ុន អឹមហ្វូន ជំពាក់ពួកគេប៉ុណ្ណោះ។
លោក សិរិវុទ្ធី បានមានប្រសាសន៍បន្ថែមទៀតថា “យើងត្រូវទូទាត់ឲ្យបុគ្គលិកមុនគេ ដោយយោងតាមច្បាប់ការងារ។ ដូច្នេះការទូទាត់នេះត្រូវធ្វើឡើងជាមួយ [អតិតបុគ្គលិក] ឲ្យបាន៤០ភាគរយ”។ លោកបានឲ្យដឹងបន្ថែមទៀតថា ប្រាក់មួយលានដុល្លារនឹងត្រូវបានចំណាយសម្រាប់ ថ្លៃជួលទីតាំងដាក់អង់តែនចំនួន១.០៤០កន្លែង។ លោកបានមានប្រសាសន៍ថា “នៅពេលបុគ្គលិកទទួលបានប្រាក់គ្រប់ចំនួនហើយប្រាក់នៅសល់ពីប្រាក់ [១០លានដុល្លារ] នឹងត្រូវប្រើប្រាស់សម្រាប់ទូទាត់ឲ្យម្ចាស់បំណុលរបស់យើង”។
តាំងពីពេលដែលក្រុមហ៊ុន អឹមហ្វូន បានប្រកាសក្ស័យធន កាលពីឆ្នាំមុន ម្ចាស់បំណុលនានា រួមទាំងក្រុមហ៊ុនបច្ចេកវិទ្យាចិនឈ្មោះ ហួរវៃ (Huawei) និងក្រុមហ៊ុន ថាមពលន័រវែសឈ្មោះ អេលធេក (Eltek ) បានដាក់ពាក្យបណ្តឹងទៅសាលាដំបូងរាជធានីភ្នំពេញ ដើម្បីបង្កកទ្រព្យសម្បត្តិរបស់ក្រុមហ៊ុន អឹមហ្វូន និងដើម្បីទទួលបានប្រាក់ ដែលក្រុមហ៊ុននេះជំពាក់ថ្លៃសេវាតំឡើងបច្ចេកវិទ្យាគមនាគមន៍។
ក្រុមហ៊ុន អឹមហ្វូន ក៏មានកូនបំណុលចំនួនប្រាំ ដែលជាក្រុមហ៊ុនទូរគមនាគមន៍ផងដែរ ពោលគឺក្រុមហ៊ុនទាំងនោះបានជំពាក់ប្រាក់ខ្លួនចំនួន៧៨៧.០០០ដុល្លារ ថ្លៃសេវាកម្មដែលខ្លួនបានផ្តល់ឲ្យក្រុមហ៊ុនទាំងនោះ។ លោក សិរិវុទ្ធី បានឲ្យដឹងថា ចំណាត់ការផ្លូវច្បាប់ ដើម្បីទារប្រាក់ដែលក្រុមហ៊ុនទាំងនោះជំពាក់ខ្លួន កំពុងដំណើរការហើយ។ លោកបានមានប្រសាសន៍ថា “យើងបានដាក់ពាក្យបណ្តឹង ទៅសាលាដំបូងរាជធានីភ្នំពេញ ដើម្បី ប្តឹងក្រុមហ៊ុន មិត្តហ្វូន (Metfone) និងក្រុមហ៊ុន រ៉ូយ៉ាល់ អ៊ីនធ័រណេសិនណល ថេឡេខម (Royal International Telecom) កាលពីខែមុន ហើយយើងនឹងដាក់ពាក្យប្តឹងក្រុមហ៊ុនពីរផ្សេងទៀត [ក្រុមហ៊ុន ឃូថេល (Cootel) និងក្រុមហ៊ុន វ៉ីង ខេមបូឌា (Wing-Cambodia)] ក្នុងសប្តាហ៍នេះ”។
ក្រុមហ៊ុន អេលធេក ដែលត្រូវបានក្រុមហ៊ុន អឹមហ្វូន ជំពាក់ប្រាក់ប្រាំលានដុល្លារ រួមទាំងថ្លៃសេវាកម្មផ្នែកច្បាប់ផង និងដែលជាម្ចាស់បំណុលធំបំផុតលំដាប់ទី២របស់ក្រុមហ៊ុន អឹមហ្វូន នោះ កាលពីម្សិលមិញបានអំពាវនាវឲ្យម្ចាស់បំណុលទាំងអស់ ធ្វើសវនកម្មលើដំណើរការលក់ទ្រព្យសម្បត្តិទាំងនេះ ដោយសារតែមានភាពខុសគ្នាយ៉ាងខ្លាំងរវាងលទ្ធផលវាយតម្លៃរបស់ខ្លួន និងតម្លៃលក់តាមចរចានេះ។
លោក គួយ ធុនណា មេធាវីក្រុមហ៊ុន អេលធេក ប្រចាំប្រទេសកម្ពុជា បានមានប្រសាសន៍ថា “ខ្ញុំគាំទ្រឲ្យលក់ទ្រព្យសម្បត្តិទាំងនេះ ក៏ប៉ុន្តែ ពួកគេត្រូវធ្វើសវនកម្ម ពីព្រោះ ថ្លៃលក់នេះមានគម្លាតយ៉ាងឆ្ងាយ ពីតម្លៃក្នុង បញ្ជី”។ លោកក៏បានលើកសំណួរផងដែរថា តើហេតុអ្វីបានជាលោកអភិបាលមិនបាន ជូនដំណឹង ដល់តំណាងក្រុមហ៊ុន អេលធេក អំពីការលក់កាលពីថ្ងៃទី៤ខែសីហា អំឡុងកិច្ច ប្រជុំជាមួយកាលពីថ្ងៃទី១៩ខែកញ្ញា។
លោក ផាន់ ឌឿន អតីតអ្នកគ្រប់គ្រងទ្រព្យសម្បត្តិរបស់ក្រុមហ៊ុន អឹមហ្វូន បានបញ្ជាក់កាលពីម្សិលមិញថា លោកទទួលបានប្រាក់ទូទាត់ថ្មីបំផុតចំនួន៣០ភាគរយសម្រាប់បំណាច់សរុបរបស់លោក។ លោកបានមានប្រសាសន៍ថា “ខ្ញុំទទួលបានប្រាក់ទូទាត់ក្នុងថ្ងៃនេះ ហើយឥឡូវនេះខ្ញុំសង្ឃឹមថា លោកអភិបាលនឹងបង់ប្រាក់នៅសល់ឲ្យបុគ្គលិកនាពេលឆាប់ៗនេះ”៕ សុធា