ខណៈរាជធានីភ្នំពេញមានសភាពស្ងប់ស្ងាត់កាលពីចុងសប្តាហ៍នេះ ដោយសារតែរដ្ឋាភិបាលលុបចោលពិធីបុណ្យអុំទូកប្រចាំឆ្នាំសម្រាប់ឆ្នាំទី៣នោះ ខេត្តស្វាយរៀង និងខេត្តសៀមរាបបានទាក់ទាញអ្នកទស្សនាជាង១០០.០០០នាក់ទៅទស្សនាការប្រណាំងទូកងជាប្រពៃណីដែលធ្វើឡើងនៅទីនោះ។
លោក រស់ ថារិទ្ធ ប្រធានរដ្ឋបាលសាលាខេត្តស្វាយរៀង ថ្លែងថា មនុស្សជាង១០០ពាន់នាក់បាននាំគ្នាទៅខេត្តនេះដើម្បីចូលរួមពិធីបុណ្យអុំទូក ដែលមានទូកងចំនួន៤៧គ្រឿងផ្សេងៗគ្នាប្រណាំងក្នុងទន្លេវៃ៉កូ។ លោកស្រី ម៉ែន សំអន ឧបនាយករដ្ឋមន្ត្រី និងជាតំណាងរាស្ត្រប្រចាំខេត្តនេះបានអញ្ជើញជាអធិបតីក្នុងពិធីប្រណាំងទូកនេះផងដែរ។
លោក រស់ ថារិទ្ធ បានមានប្រសាសន៍ថា “ យើងមានទូកវែងចំនួន៤០គ្រឿង ដែលមានចំណុះអ្នកអុំចំនួន២២នាក់ក្នុងទូកនីមួយៗ និងទូកតូចៗចំនួនប្រាំពីរមានចំណុះអ្នកអុំពីប្រាំពីរនាក់ទៅប្រាំបីនាក់”។
លោក ថារិទ្ធ បានឲ្យដឹងទៀតថា “ យើងក៏មានការប្រគំុតន្ត្រីសម្រាប់ប្រជាជនទាំងឡាយទស្សនា ហើយពួកគេត្រូវបានស្វាគមន៍ឲ្យឡើងច្រៀងលើឆាក។ យើងពិតជាមានមោទនភាពដែលអាចបន្តប្រពៃណីខ្មែរក្នុងការប្រារព្ធពិធីបុណ្យអំុទូកនេះ”។
លោក អែម ម៉ន មេឃំុចុងឃ្នៀស បានមានប្រសាសន៍ថា ឃុំចុងឃ្នៀសក្នុងខេត្តសៀមរាប មានអ្នកទស្សនាពិធីបុណ្យអុំទូកប្រហែល១០.០០០នាក់មកពីជុំវិញខេត្ត។
លោក អែម ម៉ន បានឲ្យដឹងថា “ យើងបានរៀបចំពិធីបុណ្យអំុទូកមួយសម្រាប់តំបន់របស់យើងដែលមានការចូលរួមពីសំណាក់ភ្ញៀវទេសចរជាតិ និងភ្ញៀវអន្តរជាតិចំនួន១០.០០០នាក់ដែលចូលរួមក្នុងពិធីនេះ”។លោកបន្ថែមថា ការប្រណាំងទូកត្រូវបានធ្វើឡើងកាលពីថ្ងៃសៅរ៍ និងម្សិលមិញ។លោកបានថ្លែងថា “ មានទូកងខ្នាតតូច៣០គ្រឿង និងអ្នកអុំជាង១៦០នាក់ចូលរួមក្នុងពិធីនេះ”។
ពិធីបុណ្យអុំទូកប្រចាំឆ្នាំក្នុងរាជធានីភ្នំពេញធ្លាប់តែទាក់ទាញប្រជាជនកម្ពុជាជាង១លាននាក់មកពីតាមខេត្ត។ ទោះជាយ៉ាងណា សាលារាជធានីភ្នំពេញបានលុបចោលព្រឹត្តិការណ៍នេះរាល់ឆ្នាំចាប់តាំងពីពិធីបុណ្យអុំទូកឆ្នាំ២០១០មក ដែលពេលនោះមនុស្សចំនួន៣៥៣នាក់បានស្លាប់ដោយសារតែការផ្អើលរត់ជាន់គ្នានៅលើស្ពានមួយឆ្ពោះទៅកោះពេជ្រ។
ក្នុងឆ្នាំ២០១១ ពិធីបុណ្យនេះត្រូវបានលុបចោលដោយសារតែទឹកជំនន់ដ៏ស្រួចស្រាវនៅតាមខេត្ត ហើយកាលពីឆ្នាំទៅ សាលារាជធានីបានសម្រេចលុបចោលពិធីបុណ្យនេះ ដោយសារការគោរពដល់ព្រះបរមរតនកោដ្ឋសម្តេចឪ នរោត្តម សីហនុ ដែលចូលទិវង្គតនៅថ្ងៃទី១៥ ខែតុលា។
ឆ្នាំនេះ សាលារាជធានីបានលុបចោលពិធីនេះទៀត ដោយផ្តោតលើការខិតខំប្រឹងប្រែងជួយសង្គ្រោះប្រជាជនរងគ្រោះដោយសារទឹកជំនន់ថ្មីៗនេះ។ទោះជាយ៉ាងណា អ្នករិះគន់ខ្លះ បានរំឭកថា រដ្ឋាភិបាលគ្មានឆន្ទៈនឹងប្រារព្ធមហាព្រឹត្តិការណ៍មួយនៅក្នុងរាជធានីនេះទេ បន្ទាប់ពីការបោះឆ្នោតដ៏មានវិវាទ ដែលមានការតវ៉ាទ្រង់ទ្រាយធំ”៕ ប៊ុននី
(រាយការណ៍បន្ថែមដោយ មិុច ដារ៉ា)