កាលពីម្សិលមិញ កម្មករប្រហែល២០០នាក់ បានតវ៉ានៅខាងក្រៅរោងចក្រកាត់ដេរអេសអិល (SL Garment Factory) នៅខណ្ឌមានជ័យ រាជធានីភ្នំពេញ ដោយទាមទារឲ្យអ្នកគ្រប់គ្រងរោងចក្រនេះកោះហៅតំណាង សហជីព១៩នាក់ ឲ្យចូលធ្វើការវិញ មុនរយៈពេល១៥ថ្ងៃ ដែលរដ្ឋាភិបាលបានកំណត់។
ទីស្តីការគណៈរដ្ឋមន្ត្រីបានចេញបញ្ជាឲ្យរោងចក្រ អេសអិល កោះហៅសមាជិកសហជីពដែលត្រូវបានបញ្ឈប់ពីការងារនោះឲ្យចូលធ្វើការវិញ បើពុំដូច្នេះទេ រោងចក្រនេះនឹងត្រូវក្រសួងការងារ និងបណ្តុះបណ្តាលវិជ្ជាជីវៈ ចាត់វិធានការព្រមាន ហើយនេះជាបទបញ្ជាដែលលោក ចូសិប ឃីលឿង (Joseph Kee Leung) ប្រធានរោងចក្រនេះសន្យាថា នឹងគោរពតាមកាលពីថ្ងៃច័ន្ទ។
ក៏ប៉ុន្តែ អ្នកគ្រប់គ្រងទូទៅនៅរោងចក្រ អេសអិល និងស្ថាបនិករោងចក្រ បានលើកឡើងកាលពីម្សិលមិញថា ការកោះហៅកម្មករឲ្យចូលធ្វើការវិញនោះ មិនត្រូវបានធានាទេ។ លោក រ៉ាយម៉ុន វ៉ុង (Raymond Vong) ស្ថាបនិក ក្រុមហ៊ុននេះ បានមានប្រសាសន៍តាមទូរស័ព្ទ ថា “វាមិនទាក់ទងទៅនឹងថា តើយើងទទួលយកកម្មករឲ្យចូលធ្វើការវិញ ឬក៏យើងមិនទទួលកម្មករវិញនោះទេ។ យើងមិនដែលបាននិយាយបែបនោះទេ។ នោះជាអ្វីដែលរដ្ឋាភិបាលនិយាយ។យើងមិនទាន់បានសន្យាថា នឹងទទួលពួកគេទេ។ មិនទាន់មានលទ្ធផលនៅឡើយទេ។យើងកំពុងពិភាក្សាគ្នា”។
លោក កោះ ចុងហូ (Koh Chong Ho) អ្នកគ្រប់គ្រងទូទៅ បានចុះហត្ថលេខាលើលិខិតរបស់រដ្ឋាភិបាល ដើម្បីបញ្ជាក់ការទទួលបានលិខិត ដែលមានប្រសិទ្ធភាពដោយរាប់រយៈពេល១៥ថ្ងៃចុះមក ក៏ប៉ុន្តែ លោកបានលើកឡើងថា លោកមិនឃើញមានដំណោះស្រាយ នាពេលឆាប់ៗនេះទេ។ លោកបានថ្លែងថា “ យើងទទួលបានលិខិតពីរដ្ឋាភិបាលឲ្យកោះហៅកម្មករឲ្យចូលធ្វើការវិញ ក៏ប៉ុន្តែ ខ្ញុំមិនទាន់ទទួលបានសេចក្តីណែនាំឲ្យធ្វើដូច្នេះនៅឡើយទេ។ មើលទៅ [លោក វ៉ុង] នឹងសម្រេចចិត្តមិនកោះហៅទេ”។
ទោះជាយ៉ាងណា លោក អ៊ុំ មាន រដ្ឋលេខា ធិការក្រសួងការងារ និងបណ្តុះបណ្តាលវិជ្ជាជីវៈបានបញ្ជាក់ថា បទបញ្ជានោះនៅតែមានប្រសិទ្ធភាព លោកបានមានប្រសាសន៍ថា “ប្រសិនបើ រោងចក្រ នេះនៅតែមិនព្រមអនុវត្តតាមបទបញ្ជាទេ យើងនឹងចាត់វិធានការផ្លូវច្បាប់ទៅលើពួកគេ”។ នៅខាងក្រៅរោងចក្រ កម្មករបានប្តេជ្ញាថា នឹងបន្តសកម្មភាពតវ៉ារបស់ខ្លួនរហូតទាល់តែបទបញ្ជារបស់រដ្ឋាភិបាលត្រូវបានអនុវត្តតាម។
លោក សៀង យុត មន្ត្រីផ្នែកច្បាប់នៅ សម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា ដែលមានកម្មករភាគច្រើនជាសមាជិក បានមានប្រសាសន៍ថា “យើងនៅតែបន្តការតវ៉ា រហូតទាល់តែពួកគេទទួលតំណាងទាំង១៩នាក់ឲ្យចូលធ្វើការវិញ។ យើងតវ៉ា ដោយសារតែក្រុមហ៊ុនមិនអនុវត្តតាមបទបញ្ជារបស់រដ្ឋាភិបាល ហើយយើងអំពាវឲ្យក្រុមហ៊ុនយកចិត្តទុកដាក់ ចំពោះលិខិតរបស់ទីស្តីការគណៈរដ្ឋមន្ត្រី”។
លោក សៀង យុត បានមានប្រសាសន៍បន្ត ទៀតថា “នៅពេលពួកគេអនុវត្តតាមសេចក្តី បង្គាប់របស់រដ្ឋាភិបាល និងទទួលកម្មករ១៩នាក់ឲ្យចូលធ្វើការវិញ នោះយើងនឹងចូលធ្វើការជាធម្មតាវិញ ក៏ប៉ុន្តែ ប្រសិនបើពួកគេ នៅតែមិនព្រមទទួលតំណាងទាំងនោះ យើងនឹងអំពាវឲ្យមានការតវ៉ាទូទាំងប្រទេស និងការគាំទ្រពីមជ្ឈដ្ឋានអន្តរជាតិ ពីព្រោះយើងមានលិខិតរបស់ទីស្តីការគណៈរដ្ឋមន្ត្រី”។ សុធា
(រាយការណ៍បន្ថែមដោយ Laure Crothers និង Dene Hern-Chen)