កាលពីម្សិលមិញ សាលាឧទ្ធរណ៍បានតម្កល់ទោសព្រហ្មទណ្ឌជាង១០ករណី ដែលសាលាដំបូងរាជធានីភ្នំពេញបានសម្រេច រួមមានករណីចាប់ជំរិត ការប៉ុនប៉ងមនុស្សឃាត ការវាយប្រហារដោយទឹកអាស៊ីត និងការបើកផ្ទះបន។
លោក ប៉ុល សំអឿន ចៅក្រមប្រធានក្រុមប្រឹក្សាជំនំុជម្រះបានចាប់ផ្តើមបើកសវនាការដោយតម្កល់សាលក្រមដែលចេញដោយសាលាដំបូងរាជធានីភ្នំពេញកាលពីឆ្នាំមុន ផ្តន្ទាទោសបុរសបីនាក់ដែលត្រូវបានរកឃើញពិរុទ្ធភាពពីបទចាប់ជំរិត បង្ខាំងមនុស្សខុសច្បាប់ និងប៉ុនប៉ងមនុស្សឃាត។
ដោយសំដៅដល់ឈ្មោះ លី សំណាង និង ជួន ប៊ុនហ៊ីម ដែលកំពុងអនុវត្តទោសជាប់ពន្ធនាគារអស់មួយជីវិត និង អ៊ឹង តិចស្រេង ដែលត្រូវផ្តន្ទាទោសឲ្យជាប់ពន្ធនាគាររយៈពេល៣០ឆ្នាំ ចំពោះការប្រព្រឹត្តបទឧក្រិដ្ឋនោះ លោកចៅក្រម សំអឿន បានមានប្រសាសន៍ថា “សាលាឧទ្ធរណ៍បានតម្កល់សាលក្រមរបស់សាលាដំបូងរាជធានីភ្នំពេញកាលពីថ្ងៃទី២៦ ខែមីនា ឆ្នាំ២០១២ ហើយបង្គាប់ឲ្យឃំុខ្លួនចុងចោទបន្តទៀត” ។
បុរសទាំងនេះ ក៏ត្រូវបានបង្គាប់ឲ្យបង់ប្រាក់សំណងចំនួន២០០.០០០ដុល្លារដល់ជនរងគ្រោះ ឈ្មោះ អួន ហេងប៊ុន ដែលត្រូវបានចាក់១០កាំបិត អំឡុងជម្លោះ ហើយក្រុមគ្រួសារជនរងគ្រោះបានទាមទារសំណងចំនួន៥០០.០០០ដុល្លារ។ លោក អួន សុខហេង ឪពុករបស់ជនគ្រោះបាននិយាយបន្ទាប់ពីតុលាការអានសាលក្រមថា “ខ្ញុំពេញចិត្តនឹងសេចក្តីសម្រេចរបស់សាលាឧទ្ធរណ៍”។
ការផ្តន្ទាទោសក៏ត្រូវបានតម្កល់ផងដែរ លើជនដៃដល់បីនាក់ដែលពីរនាក់កំពុងរត់គេចខ្លួន បន្ទាប់ពីការវាយប្រហារដោយទឹកអាស៊ីតយ៉ាងសាហាវ កាលពីខែមករា ឆ្នាំ២០០៨ ដែលក្នុងការវាយប្រហារនោះជនរងគ្រោះអាយុ៤៨ឆ្នាំ និងចៅស្រីរបស់គាត់អាយុ៣ឆ្នាំ បានស្លាប់ដោយសាររងរបួស។ មានតែជនដៃដល់ម្នាក់ប៉ុណ្ណោះដែលកំពុងជាប់ពន្ធនាគារ ឈ្មោះ មុំតុន មិនត្រូវបាននាំខ្លួនទៅចូលរួមសវនាការបណ្តឹងឧទ្ធរណ៍របស់ខ្លួនកាលពីឆ្នាំ២០១១ទេ ហើយការផ្តន្ទាទោសជននេះឲ្យជាប់ពន្ធនាគាររយៈពេល១៦ឆ្នាំនោះត្រូវបានតម្កល់ដោយកំបាំងមុខ។
ទោះជាយ៉ាងណា គេផ្តល់ឱកាសឲ្យ មុំ តុនចូលរួមសវនាការបណ្តឹងឧទ្ធរណ៍ម្តងទៀតនៅខែនេះ ដែលក្នុងសវនាការនោះជននេះបានចូលរួម។
លោក សំរឹទ្ធ សុផល ចៅក្រមប្រធានក្រុមប្រឹក្សាជំនុំជម្រះមានប្រសាសន៍ថា “សាលាឧទ្ធរណ៍បានតម្កល់សាលក្រមនេះ ចាប់ពីថ្ងៃទី២៨ ខែមករា ឆ្នាំ២០១១ ដែលបានផ្តន្ទាទោសជនសង្ស័យរូបនេះកំបាំងមុខ”។
អ្នកស្រី ម៉ៅ យ៉ុន ដែលត្រូវជាម្តាយរបស់ មុំតុន កំពុងរត់គេចខ្លួននៅឡើយដោយគេចពីការផ្តន្ទាទោសឲ្យជាប់ពន្ធនាគាររយៈពេល១៨ឆ្នាំ ពីបទជាមេគំនិតនៅក្នុងការវាយប្រហារនេះ។
ចក់ ហេង ត្រូវជាក្មួយប្រុសរបស់គាត់ ក៏កំពុងរត់គេចខ្លួនពីទោសជាប់ពន្ធនាគាររយៈពេល១៦ឆ្នាំផងដែរ។ លោក ចាន់ ម៉ាឌីណា ចៅក្រមប្រធានក្រុមប្រឹក្សាជំនុំជម្រះបានអានសាលក្រមនៃសំណុំរឿងទី៣ ហើយបានតម្កល់សេចក្តីសម្រេចកាលពីថ្ងៃទី១២ ខែមីនា ដែលផ្តន្ទាទោស ចាន់ ស្រីណុច ឲ្យជាប់ពន្ធនាគាររយៈពេលបួនឆ្នាំកន្លះ ដោយព្យួរទោសរយៈពេលមួយឆ្នាំពីបទបើកផ្ទះបន៕ សារុន