លោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈបានលើកឡើងក្រោយកិច្ចប្រជុំកាលពីម្សិលមិញ ជាមួយភាគីរោងចក្រ និងសហជីព អំពីការដំឡើងប្រាក់ខែ៨០ដុល្លារក្នុងមួយខែនាពេលបច្ចុប្បន្នថា រដ្ឋាភិបាលកំពុងពិចារណាអំពីការដំឡើងប្រាក់ឈ្នួលអប្បបរមា សម្រាប់កម្មករកម្មការិនីរោងចក្រកាត់ដេរក្នុងប្រទេសកម្ពុជា សម្រាប់រយៈពេលប្រាំឆ្នាំខាងមុខ។
លោក អ៊ិត សំហេង បានធ្វើជាអធិបតីក្នុងកិច្ចប្រជុំជាមួយក្រុមការងារបច្ចេកទេសបួន ដែលមានភារកិច្ចកំណត់ប្រាក់ឈ្នួលអប្បបរមាថ្មី សម្រាប់កម្មករដែលមានជាង៣៥០.០០០នាក់ ដែលធ្វើការនៅក្នុងវិស័យកាត់ដេរ ដែលមានតម្លៃសរុបបួនពាន់លានដុល្លារ។ ប្រាក់ឈ្នួលនេះគ្រោងនឹងត្រូវបានដំឡើងនៅខែមករា ក៏ប៉ុន្តែ ចំនួនដំឡើងមិនទាន់ត្រូវបានបញ្ជាក់នៅឡើយទេ។
លោក អ៊ិត សំហេង បានមានប្រសាសន៍ថា “យើងនឹងរៀបចំរបាយការណ៍អំពីការដំឡើងប្រាក់ឈ្នួលកម្មករកាត់ដេរ រៀងរាល់ឆ្នាំ សម្រាប់រយៈពេលប្រាំឆ្នាំក្នុងអាណត្តិរបស់រដ្ឋាភិបាល។ ប្រសិនបើសេដ្ឋកិច្ចមានបញ្ហាផ្នែកអតិផរណា យើងនឹងពិភាក្សាគ្នាម្តងទៀត”។ លោកបានថ្លែងបន្ថែមទៀតថា “យើងមិនបដិសេធចំពោះការដំឡើងប្រាក់ឈ្នួលអប្បបរមាសម្រាប់កម្មករទេ ក៏ប៉ុន្តែ ខ្ញុំចង់អំពាវដល់កម្មករទាំងអស់ ឲ្យរក្សាចិត្តអត់ធ្មត់ ពីព្រោះយើងនឹងដំឡើងប្រាក់ឈ្នួលនេះ ក្នុងខែមករាឆ្នាំក្រោយ ក៏ប៉ុន្តែ យើងគ្រាន់តែមិនដឹងថា តើនឹងដំឡើងប៉ុន្មានប៉ុណ្ណោះ”។
លោក សោម អូន ប្រធានក្រុមប្រឹក្សាសហជីពជាតិកម្ពុជា ដែលជាសម្ព័ន្ធសហជីពក្នុងបក្សសម្ព័ន្ធរដ្ឋាភិបាល បានគាំទ្រសំណើរបស់លោក អ៊ិត សំហេង ស្នើឲ្យមានការដំឡើងជារៀងរាល់ឆ្នាំ សម្រាប់រយៈពេលប្រាំឆ្នាំខាងមុខ។ លោកបន្ថែមថា ការទាមទាររបស់សហជីពឯករាជ្យនាពេលបច្ចុប្បន្នឲ្យមានការដំឡើងប្រាក់ឈ្នួលដល់១៥៤ដុល្លារក្នុងមួយខែ មិនមានភាពប្រាកដនិយមទេ។ លោក សោម អូន ថ្លែងថា “ចំនួនទឹកប្រាក់ដែលសហជីពដំឡើងនោះមើលទៅខ្ពស់បន្តិច ហើយខ្ញុំមិនដឹងថា តើ[រដ្ឋាភិបាល] អាចធ្វើបានដែរឬក៏អត់ទេ”។
ទោះបីជាយ៉ាងណា លោក អុំ វិសាល មន្ត្រីផ្នែកច្បាប់នៅសម្ព័ន្ធសហជីពប្រជាជាធិបតេយ្យកម្មករកាត់ដេរកម្ពុជា បានលើកឡើងថា រដ្ឋាភិបាលគួរតែប្តេជ្ញាចំពោះការដំឡើងប្រាក់ឈ្នួលឲ្យបានច្រើន។ លោកបានមានប្រសាសន៍ថា “ លោករដ្ឋមន្ត្រីបានលើកឡើងថា ប្រាក់ឈ្នួលអាចត្រូវបានដំឡើងដល់១៧០ដុល្លារ នៅដំណាច់ប្រាំឆ្នាំខាងមុខ ប្រសិនបើយើងសិក្សាអំពីរឿងនេះ នោះយើង [រក]ឃើញថា វាអាចទៅរួច។ ខ្ញុំចង់ជំរុញឲ្យមានការដំឡើងប្រាក់ឈ្នួលឲ្យដល់១៧០ដុល្លារ សម្រាប់ការដំឡើងលើកដំបូង [ក្នុងខែមករា]”។
ក្រុមហ៊ុន អេជអេនអឹម (H&M) ដែលជាក្រុមហ៊ុនលក់រាយដ៏ធំមួយរបស់ប្រទេសស្វីស ក្នុងសប្តាហ៍នេះ បានអំពាវឲ្យរដ្ឋាភិបាលនៃប្រទេសមានប្រភពផ្គត់ផ្គង់របស់ខ្លួន បង្កើត “ប្រាក់ឈ្នួលសមរម្យសម្រាប់ការរស់នៅ” សម្រាប់កម្មករយ៉ាងយូរក្នុងឆ្នាំ២០១៨។ នៅពេលអ្នកសារព័ត៌មានសួរថា តើក្រុមហ៊ុន អេជអេនអឹម នឹងចាត់ទុកប្រាក់ឈ្នួលសមរម្យសម្រាប់ការរស់នៅជាអ្វីនោះ អ្នកស្រី អាន់ឌ្រា រូស (Andrea Roos) មន្ត្រីព័ត៌មាន ក្រុមហ៊ុន អេជអេនអឹម បានលើកឡើងកាលពីម្សិលមិញថា កម្មករ និងរដ្ឋាភិបាលគួរតែឯកភាពគ្នាលើចំនួននេះដោយខ្លួនឯង។
អ្នកស្រី អាន់ឌ្រា បានលើកឡើងនៅក្នុងអ៊ីម៉េលថា “យើងជឿថា រដ្ឋាភិបាលកម្ពុជា គួរតែពិនិត្យប្រាក់ឈ្នួលអប្បបរមាជារៀងរាល់ឆ្នាំ ដោយពិចារណាអំពីអតិផរណាក្នុងសេដ្ឋកិច្ចជាតិ និងសន្ទស្សន៍ថ្លៃទំនិញប្រើប្រាស់។ យើងមិនជឿជាក់ថា នឹងមានការកំណត់កម្រិតប្រាក់ឈ្នួល។ យើងជឿជាក់លើកិច្ចចរចា ដែលកម្មករខ្លួនឯងសម្រេចថា តើប្រាក់ឈ្នួលប៉ុន្មានសមរម្យសម្រាប់ពួកគេ”។ ក្រុមហ៊ុន អេជអេនអឹម ក៏បានអំពាវនាវឲ្យក្រុមហ៊ុនបរទេស អនុវត្តតាមគំរូរបស់ខ្លួន ក្នុងការចំណាយប្រាក់បន្ថែម ដល់រោងចក្រផ្គត់ផ្គង់ ដើម្បីឲ្យផ្តល់លទ្ធភាពក្នុងការដំឡើងប្រាក់ឈ្នួល សម្រាប់កម្មករ។
ក្រុមហ៊ុន ពូម៉ា (Puma) ដែលជាក្រុមហ៊ុនកីឡាអាល្លឺម៉ង់ បានឲ្យដឹងថា បច្ចុប្បន្ន ក្រុមហ៊ុន មិនមានផែនការបែបនេះទេ ខណៈដែលអ្នកស្រី ឡូរ៉ា វីគីនសុន (Laura Wilkinson) អ្នកនាំពាក្យក្រុមហ៊ុនសម្លៀកបំពាក់អាមេរិកឈ្មោះ ហ្គេប អ៊ីញ (Gap Inc.) បានលើកឡើងថា ក្រុមហ៊ុន ហ្គេប គាំទ្រកិច្ចខិតខំប្រឹងប្រែងនេះ “ជាគោលការណ៍”។ អ្នកស្រី វីគីនសុន បានលើកឡើងនៅក្នុងអុីម៉េលថា “ យើងមិនមានយោបល់អំពីគោលនយោបាយរបស់ក្រុមហ៊ុនផ្សេងៗ ទៀតទេ ក៏ប៉ុន្តែ ក្រុមហ៊ុន ហ្គេប អ៊ីញ បានគាំទ្រជាគោលការណ៍ជាយូរមកហើយថា កម្មកររោងចក្រកាត់ដេរ គួរតែទទួលបានប្រាក់ឈ្នួលដែលឆ្លើយតបទៅនឹងតម្រូវការមូលដ្ឋានរបស់ខ្លួន”។
លោក សឺជីអូ អូឌ្រីអូហ្សូឡា (Sergio Odriozola) នាយកគ្រប់គ្រងក្រុមហ៊ុនសម្លៀកបំពាក់អេស្ប៉ាញឈ្មោះ ម៉េងហ្គោ (Mango) បានលើកឡើងថា ក្រុមហ៊ុនធំៗត្រូវតែសហការគ្នា ដើម្បីឲ្យសំណើរបស់ក្រុមហ៊ុន អេជអេនអឹម មានប្រសិទ្ធភាព។ លោកបានលើកឡើងនៅក្នុងអ៊ីម៉េលថា “មិនគួរមានតែក្រុមហ៊ុនតែមួយ ស្នើឲ្យមានប្រាក់ឈ្នួលខ្ពស់ជាងមុនទេ គឺត្រូវមានក្រុមហ៊ុនច្រើនធ្វើបែបនេះ ក្នុងពេលតែមួយ។ ម្យ៉ាងទៀត ដោយសារតែមានប្រាក់ឈ្នួលខ្ពស់ជាងមុន ផលិតភាព[របស់កម្មករ]គួរតែកើតឡើងផងដែរ”៕ សុធា