ក្រសួងសុខាភិបាលបានឲ្យដឹងកាលពីម្សិលមិញថា ខ្លួននឹងបិទគ្លីនិកឯកជនមួយក្នុងរាជធានីភ្នំពេញដែលបានអះអាងថា អាចព្យាបាលជំងឺមួយចំនួនជាដូចជាមហារីក និងទឹកនោមផ្អែមឲ្យជាបានដោយប្រើម៉ាស៊ីនបន្សាបជាតិពុល។
លោក សុខ សុគន្ធ ដែលជាប្រធានមន្ទីរសុខាភិបាលរាជធានីភ្នំពេញ បានឲ្យដឹងថា គ្លីនិក Immanuel Bicom True Healing Center នៅក្នុងខណ្ឌចំការមន មិនមានអាជ្ញាប័ណ្ណ និងមិនបានជួលបុគ្គលិកដែលធ្លាប់ឆ្លងកាត់វគ្គបំពាក់បំប៉នផ្នែកវេជ្ជសាស្ត្រឡើយ។ លោកបានឲ្យដឹងថា ក្រសួងបានសម្រេចបិទគ្លីនិកនេះបន្ទាប់ពីវាបើកសាកល្បងបានបីខែនិងពីរថ្ងៃមុនពេលវាបើកសម្ពោធជាផ្លូវការ។
លោក សុខ សុគន្ធ មានប្រសាសន៍កាលពីម្សិលមិញថា “យើងសម្រេចបិទគ្លីនិក Immanuel Bicom True Healing Center នៅព្រឹកនេះ ព្រោះគ្លីនិកនេះគ្មានអាជ្ញាប័ណ្ណទេ។ប្រសិនបើគេនៅតែបន្តព្យាបាលអ្នកជំងឺទៀតនោះ យើងនឹងចាប់ផ្តើមផាកពិន័យហើយ”។ លោក សុខ សុគន្ធ បានថ្លែងថា “នាយកដ្ឋានរបស់ខ្ញុំបានស៊ើបអង្កេតគ្លីនិកនេះមួយរយៈហើយ ហើយបានរកឃើញថា វាពុំមានបំពាក់ឧបករណ៍ដែលអាចព្យាបាលជំងឺមហារីក ទឹកនោមផ្អែម និងសន្លាក់ដៃជើងឲ្យជាសះស្បើយបានឡើយ។
លោក សុខ សុគន្ធ បានមានប្រសាសន៍ថា “គ្លីនិកឯកជននេះមានបំពាក់ម៉ាស៊ីនតែមួយចំនួនតូចប៉ុណ្ណោះ ហេតុដូច្នេះតើគេអាចផ្តល់ការព្យាបាលជាដោយរបៀបណាទៅ? សូម្បីតែមន្ទីរពេទ្យដែលមានបំពាក់គ្រឿងបរិក្ខាគ្រប់គ្រាន់ក៏ស្ទើរតែមិនអាចផ្តល់ការព្យាបាលបានត្រឹមត្រូវផង ចុះទម្រាំគ្លីនិកនេះទៀតនោះ?”។
លោកបានឲ្យដឹងថា ជំងឺមហារីកគឺជាជំងឺដែលចាំបាច់ត្រូវការការវះកាត់ដោយគ្រូពេទ្យជំនាញ ប៉ុន្តែគ្លីនិក Immanuel Bicom True Healing Center មិនមានផ្តល់ការព្យាបាលបែបបែបនេះឡើយ។ លោកសាំង សារី ប្រធាននាយកដ្ឋានមន្ទីរពេទ្យនៃក្រសួងសុខាភិបាលបានឲ្យដឹងថាគ្លីនិកនេះកំពុងបង្កគ្រោះថ្នាក់ដល់ពលរដ្ឋ។ លោកបានមានប្រសាសន៍ថា “ប្រសិនបើគ្លីនិក Immanuel Bicom True Healing Center ផ្តល់ការព្យាបាលបន្តទៀតនោះវាអាចនឹងបង្កផលប៉ះពាល់ដល់អាយុជីវិតប្រជាពលរដ្ឋ។
អំឡុងកិច្ចសម្ភាសមួយកាលពីដើមសប្តាហ៍នេះអ្នកស្រី ហេលីណា គន្ធលីម ម្ចាស់គ្លីនិក Immanuel Bicom True Healing Center ដែលបានអះអាងថា ខ្លួនត្រូវព្រះជាម្ចាស់ប្រាប់ឲ្យជួយអ្នកជំងឺនោះបានទទួលស្គាល់ថា ខ្លួនពុំមានអាជ្ញាប័ណ្ណពីក្រសួងសុខាភិបាលមែន។ អ្នកស្រីបានអះអាងថា ជំងឺមួយចំនួនដូចជាមហារីក ទឹកនោមផ្អែម និងសន្លាក់ដៃជើងគឺសុទ្ធតែបង្កឡើងដោយជាតិពុលដែលមាននៅក្នុងខ្យល់ ទឹក និងចំណីអាហារ។ ដូច្នេះម៉ាស៊ីនបន្សាបជាតិពុលដែលអ្នកស្រីទិញអស់រាប់រយដុល្លារនេះអាចបន្សាបជាតិពុលនៅក្នុងខ្លួនមនុស្សបានដែរ ហើយក៏អាចព្យាបាលជំងឺទាំងនេះឲ្យជា។អ៊ីចឹងការវះកាត់ឬឧបករណ៍ផ្សេងៗទៀត គឺមិនចាំបាច់ឡើយ។
ប៉ុន្តែ នៅពេលត្រូវបានសួរកាលពីម្សិលមិញថាតើអ្នកស្រីមានបានទទួលដំណឹងពីក្រសួងសុខាភិបាលស្ដីពីការបញ្ជាឲ្យបិទគ្លីនិករបស់អ្នកស្រីដែរ ឬអត់នោះ អ្នកស្រីនិយាយថា ខ្លួនមិនបានដឹងអំពីរឿងនេះឡើយ ហើយបានអះអាងថាតាមពិតទៅអ្នកស្រីមានអាជ្ញាប័ណ្ណ។ អ្នកស្រីបាននិយាយថា “ខ្ញុំមិនបានទទួលដំណឹងអ្វីឡើយ។គ្មាននរណាម្នាក់អាចបិទគ្លីនិករបស់ខ្ញុំបានទេ ព្រោះខ្ញុំមានអាជ្ញាប័ណ្ណត្រឹមត្រូវ”៕ ស៊ុយឈាង