អគ្គនាយកដ្ឋានពន្ធនាគារក្រសួងមហាផ្ទៃត្រូវបានផ្តល់យោបល់ឲ្យដោះស្រាយបញ្ហាចំនួនអ្នកទោសលើសចំណុះនៅក្នុងពន្ធនាគារ និងបញ្ហាដឹកជញ្ជូនអ្នកទោសពីពន្ធនាគារទៅកាន់តុលាការ នៅពេលដែលពន្ធនាគារបានចាប់ផ្ដើមធ្វើផែនការយុទ្ធសាស្ត្ររបស់ខ្លួនពីឆ្នាំ២០១៣ដល់ឆ្នាំ២០១៨សម្រាប់ ពន្ធនាគារនៅទូទាំងប្រទេស។
មានការផ្តល់យោបល់នេះនៅពេលចាប់ផ្ដើមសិក្ខាសាលាពិគ្រោះយោបល់រយៈពេលពីរថ្ងៃរវាងរដ្ឋាភិបាល និងតំណាងអង្គការសហប្រជាជាតិ និងអង្គការក្រៅរដ្ឋាភិបាលនៅក្នុងរាជធានីភ្នំពេញ កាលពីម្សិលមិញ ដើម្បីពិនិត្យមើលដំណើរការវិវឌ្ឍ និងបញ្ហាប្រឈមដែលនៅតែកើតមានបន្ទាប់ពីការអនុវត្តផែនការយុទ្ធសាស្ត្រពីឆ្នាំ២០០៨ដល់ឆ្នាំ២០១៣សម្រាប់ពន្ធនាគារ។
ការិយាល័យឧត្តមស្នងការសហប្រជាជាតិទទួលបន្ទុកសិទ្ធិមនុស្សប្រចាំប្រទេសកម្ពុជាបានលើកឡើងថា “ យើងសម្រេចបាន ស្នាដៃសំខាន់ៗនៅក្នុងរយៈពេលប្រាំឆ្នាំកន្លងមកនេះ” ពាក់ព័ន្ធការអនុម័តច្បាប់ស្តីពីពន្ធនាគារឆ្នាំ២០១១សេចក្ដីព្រាងព្រះរាជក្រឹត្យស្ដីពីការធ្វើឲ្យលក្ខខណ្ឌការងាររបស់បុគ្គលិកពន្ធនាគារប្រសើរឡើង អនុក្រឹត្យស្ដីពីរបបអាហារ សុខភាព ការស្ដារនីតិសម្បទា ការបញ្ចូលអ្នកទោសចូលក្នុងសង្គមវិញ កម្មវិធីបណ្ដុះបណ្ដាលវិជ្ជាជីវៈ សេវាសុខភាព និងការប្រឹងប្រែងទប់ស្កាត់កុំឲ្យមានអ្នកទោសលើសចំណុះក្នុងបន្ទប់ឃុំឃាំង។
កម្មវិធីគាំទ្រកំណែទម្រង់ពន្ធនាគាររបស់ការិយាល័យឧត្តមស្នងការសហប្រជាជាតិទទួលបន្ទុកសិទ្ធិមនុស្សនេះ ក៏បានលើកឡើងអំពីការវិវឌ្ឍសំខាន់ៗ” ក្នុងការបណ្ដុះបណ្ដាលបុគ្គលិកពន្ធនាគារ ការពិភាក្សាអំពីការដាក់អ្នកទោសលើសចំណុះ និងការទំនាក់ទំនង បន្ថែមទៀតរវាងពន្ធនាគារ និងតុលាការ។
ការិយាល័យឧត្តមស្នងការសហប្រជាជាតិទទួលបន្ទុកសិទ្ធិមនុស្ស បានរកឃើញថា “ទន្ទឹមនឹងភាពជោគជ័យខាងលើ យើងក៏ប្រឈមបញ្ហាមួយចំនួនផងដែរដូចជាការរំខាននៅពេលដឹកជញ្ជូនអ្នកទោសទៅកាន់សាលាឧទ្ធរណ៍ ចំនួនអ្នកទោសច្រើនហួសនៅក្នុងពន្ធនាគារ និងការអនុវត្តច្បាប់មិនបានទូលំទូលាយ និងស៊ីជម្រៅ”។
ការិយាល័យឧត្តមស្នងការសហប្រជាជាតិទទួលបន្ទុកសិទ្ធិមនុស្ស បានលើកឡើងទៀតថា បញ្ហាប្រឈមក្នុងពន្ធនាគាររួមមានចំនួនអ្នកទោសស្ត្រីកើនឡើងជិតទ្វេដងចាប់ពីឆ្នាំ២០០៨ដល់ឆ្នាំ ២០១៣” ដែលបង្កឲ្យមានការលំបាកដល់មន្ត្រីពន្ធនាគារក្នុងការរកកន្លែងដាក់អ្នកទោស និងគ្រប់គ្រងអ្នកទោសស្ត្រីឲ្យស្របតាមបទដ្ឋានអន្តរជាតិ”។ ចាំបាច់ ត្រូវធ្វើឲ្យប្រសើរឡើងទាក់ទងនឹង “ការបង្ការ កុំឲ្យមានជំងឺឆ្លងនៅក្នុងពន្ធនាគារផងដែរ”។
លោកស្រី វ៉ាន ហ៊ាលី តំណាងប្រចាំប្រទេសនៃការិយាល័យឧត្តមស្នងការសហប្រជាជាតិទទួលបន្ទុកសិទ្ធិមនុស្ស បានមានប្រសាសន៍ថា“ ត្រូវឃ្លាំមើលការប្រព្រឹត្តចំពោះអ្នកទោសឲ្យបានល្អប្រសើរផងដែរ”។ លោកស្រីបានមានប្រសាសន៍ថា “ទោះជាយ៉ាងណាត្រូវប្រឹងប្រែងបន្ថែមទៀតដើម្បីធ្វើឲ្យស្ថានភាពរស់នៅកាន់តែប្រសើរឡើង លើកកម្ពស់ប្រសិទ្ធភាពនៃសេវាសុខភាព បង្កើតយន្តការដាក់ពាក្យបណ្ដឹង និងធ្វើឲ្យពន្ធនាគារទាំងអស់ស្របតាមបទដ្ឋានសិទ្ធិមនុស្សអន្តរជាតិ”៕សារុន