ក្រុមយុវជនដែលទើបនឹងបង្កើតថ្មី បានឲ្យដឹងកាលពីម្សិលមិញថា ខ្លួននឹងដាក់ញត្តិជូនក្រសួងប្រៃសណីយ៍ និងទូរគមនាគមន៍ ក្នុងគោលបំណងជំរុញឲ្យក្រសួងនេះឈប់អនុវត្តបទបញ្ជារបស់រដ្ឋាភិបាលឆ្នាំ២០០៩ ពីព្រោះបទបញ្ជានេះកំណត់ថ្លៃអប្បបរមាសម្រាប់ការហៅទូរស័ព្ទ និងកំណត់ចំនួនដងនៃការផ្តល់ទឹកប្រាក់បន្ថែម ដែលក្រុមហ៊ុនប្រតិបត្តិករទូរស័ព្ទផ្តល់ឲ្យអតិថិជនរបស់ខ្លួន។
ក្រសួងប្រៃសណីយ៍ និងទូរគមនាគមន៍បានបញ្ជាឲ្យមានការអនុវត្តបទបញ្ជា ឬក៏ប្រកាសកាលពីដើមខែនេះ ដោយលើកឡើងថា រដ្ឋាភិបាលបានបាត់បង់ប្រាក់ចំណូលពន្ធ ដោយសារកម្មវិធីផ្តល់ទឹកប្រាក់បន្ថែមទាំងនេះ ពីព្រោះកម្មវិធីទាំងនេះនាំឲ្យអតិថិជនហៅទូរស័ព្ទចេញក្នុងតម្លៃទាប។
លោក ភិន សាវៃ តំណាងក្លឹបយុវជនខ្មែរមហានគរ ដែលបានជំរុញឲ្យមានសកម្មភាពតស៊ូមតិក្នុងចំណោមយុវជនជុំវិញទិដ្ឋភាពយុត្តិធម៌សង្គម បានឲ្យដឹងថា ក្រុមយុវជននេះមានគម្រោងបន្ថែមហត្ថលេខា១.០០០ទៀតលើហត្ថលេខាដែលប្រមូលបានរួចរាល់ ចំនួនប្រហែល៤០០នៅក្នុងញត្តិនេះ។ លោកបាននិយាយសំដៅទៅលើការមិនអនុវត្តថ្លៃអប្បបរមា និងការកំណត់ទឹកប្រាក់បន្ថែមថា “យើងចង់ឲ្យក្រសួងទូរគមនាគមន៍អនុវត្តគោលនយោបាយចាស់វិញ។ យើងនឹងដាក់ញត្តិរបស់យើងនាសប្តាហ៍ក្រោយ”។
ក្រៅពីទាក់ទងទៅនឹងរដ្ឋាភិបាលបានកំណត់ថ្លៃនៃការហៅទូរស័ព្ទ ដែលបង្កផលប៉ះពាល់ដល់ថវិការបស់ប្រជាជនក្រីក្រ ញត្តិនេះក៏បានលើកឡើងផងដែរថា បទបញ្ជានេះ “ ផ្ទុយពីស្មារតីរដ្ឋធម្មនុញ្ញដែលមានគោលបំណងលើកកម្ពស់ជីវភាពរស់នៅរបស់ប្រជាជន ហើយប្រកាសនេះមិនស្របតាមគោលការណ៍សេដ្ឋកិច្ចទីផ្សារសេរី”។
ក្រសួងប្រៃសណីយ៍ និងទូរគមនាគមន៍ បានឲ្យដឹងថា ការកំណត់ថ្លៃលើការហៅទូរស័ព្ទ និងកំណត់កម្មវិធីផ្តល់ទឹកប្រាក់បន្ថែមរបស់ក្រុមហ៊ុនប្រតិបត្តិករទូរស័ព្ទ គឺជាចំណាត់ការបណ្តោះអាសន្ន ក៏ប៉ុន្តែ មិនបានបញ្ជាក់ថា តើការកំណត់ទាំងនេះនឹងអាចបញ្ចប់នៅពេលណាទេ៕ សុធា