យោងតាមសេចក្តីប្រកាសដែលសាលាក្តីខ្មែរក្រហមបានចេញកាលពីម្សិលមិញឲ្យដឹងថា មានការចាត់តាំងមេធាវីកម្ពុជាឲ្យធ្វើជាតំណាងជនសង្ស័យពីររូបនៅក្នុងសំណុំរឿង០០៤របស់សាលាក្តីនេះ ដែលរដ្ឋាភិបាលជំទាស់។
យោងតាមការិយាល័យកិច្ចការសាធារណៈបានឲ្យដឹងថា ផ្នែកគាំទ្រចុងចោទនៃតុលាការ នេះបានជ្រើសតាំងលោក ប៊ិត ស៊ាងលីន និង លោក ស៊ូ ម៉ូសសេនី ឲ្យធ្វើជាតំណាងជនសង្ស័យពីររូបក្នុងចំណោមជនសង្ស័យបីរូប។ ជនសង្ស័យទាំងបីរូបនោះ មានឈ្មោះ អ៊ឹម ជៀម អតីតគណៈស្រុករបបខ្មែរក្រហម ឈ្មោះ តា ទិត្យ អតីតលេខាធិការរងភូមិភាគពាយព្យ និងឈ្មោះ តា អាន អតីតលេខាធិការរងភូមិភាគកណ្តាល។ គួរបញ្ជាក់ថា ជនសង្ស័យឈ្មោះ តា អាន មានការតំណាងអន្តរជាតិ និងជាតិរួចហើយ។
អត្តសញ្ញាណរបស់ជនសង្ស័យទាំងនេះ ត្រូវបានលាក់ការណ៍ ក៏ប៉ុន្តែធ្វើឲ្យលេចធ្លាយជាសាធារណៈនាពេលកន្លងមក។ សេចក្តីប្រកាសដដែលនេះមានខ្លឹមសារថា “ដំបូងឡើយ ការចាត់តាំងនេះមិនទាន់មានសេចក្តីសម្រេចទេ ដោយមានការអះអាងថា ជនសង្ស័យមានភាពក្រីក្រ និងមានការបញ្ចប់ការរៀបចំឯកសារផ្លូវការរដ្ឋបាលផ្សេងៗ រួមទាំងការចាត់តាំងសហមេធាវីបរទេសផងដែរ។ ក្នុងចំណាត់តាំងនេះ [ផ្នែកគាំទ្រចុងចោទ] បានធ្វើការពិចារណាការពេញ ចិត្តរបស់ជនសង្ស័យ និងការទាមទារដ៏ចម្រូងចម្រាសទាំងអស់”។
លោក យូ ប៊ុនឡេង សហចៅក្រមសាកសួរភាគីជាតិបានមានប្រសាសន៍ថា លោកនឹងមិនពិនិត្យសំុណុំរឿងនេះទៀតទេ ក៏ប៉ុន្តែ សមភាគីអន្តរជាតិរបស់លោក គឺចៅក្រម ម៉ាក ហាម៉ុន (Mark Harmon) នៅតែបន្តធ្វើការស៊ើបអង្កេត៕ ប៊ុននី