យោងតាមបុគ្គលិករបស់ក្រុមហ៊ុន HML បានឲ្យដឹងថា ក្រុមហ៊ុនច្បាប់ និងពិគ្រោះយោបល់ក្នុងស្រុកមួយនេះបានចាប់ដៃគូជាមួយក្រុមហ៊ុន XAT Tax Corp. ដែលមានមូលដ្ឋាននៅទីក្រុងតូក្យូ ដើម្បីបង្កើតក្រុមហ៊ុនពិគ្រោះយោបល់មួយដែលផ្តោតសំខាន់ទៅលើផ្នែកពន្ធដារនៅក្នុងប្រទេសកម្ពុជា។
គួរបញ្ជាក់ថា លោកស្រី ហ៊ុន គឹមឡេង ដែលជាក្មួយស្រីរបស់លោកនាយករដ្ឋមន្ត្រី ហ៊ុន សែន គឺជាប្រធាននិងជាសហស្ថាបនិកក្រុមហ៊ុន HML ហើយថែមទាំងជាភរិយារបស់លោក នេត សាវឿន អគ្គស្នងការនគរបាលជាតិផងដែរ។
ក្រុមហ៊ុនពិគ្រោះយោបល់ ដែលមានឈ្មោះថា HML XAT Consulting Co., Ltd. នឹងប្រារព្វពិធីសម្ភោធក្នុងថ្ងៃនេះ នៅសណ្ឋាគារ អាំងទែកង់ទីណង់តាល់ ក្នុងរាជធានីភ្នំពេញ។ ក្រុមហ៊ុន XAT Tax Corp. បានបើកដំណើរការនៅទីក្រុង តូក្យូ កាលពីខែមករាឆ្នាំ២០០៤ និងទំនងជាក្រុមហ៊ុនតូចល្មមមួយ ដែលមានបុគ្គលិកសរុប៣៣នាក់ និងមានសាខាមួយនៅទីក្រុងបាងកក នេះបើយោងតាមគេហទំព័ររបស់ក្រុមហ៊ុននេះ។
យោងតាមគេហទំព័ររបស់ក្រុមហ៊ុន HML ដែលមានឈ្មោះលោកស្រី គឹមឡេង ជាប្រធាន និងសហស្ថាបនិក បានបង្ហាញថា ពន្ធដារស្ថិតក្នុងចំណោមសេវាកម្មជាង១០នៅក្រុមហ៊ុននេះ។ ក្រុមហ៊ុន HML ក៏ជាដៃគូរបស់ក្រុមហ៊ុនវិនិយោគក្នុងស្រុករបស់លោកស្រី គឹមឡេង ផងដែរ គឺក្រុមហ៊ុន World Investment Group Co. ដែលកាលពីដើមឆ្នាំនេះ បានចុះកិច្ចព្រមព្រៀងនាំយកភោជនីដ្ឋានសហរដ្ឋអាមេរិកឈ្មោះ Hard Rock Cafe មកប្រទេសកម្ពុជា។
លោក អេង មុន្នីរិទ្ធិ ទីប្រឹក្សាជាន់ខ្ពស់ផ្នែកច្បាប់នៅក្រុមហ៊ុន HML បានឲ្យដឹងកាលពីម្សិលមិញថា ក្រុមហ៊ុន HML XAT នឹងផ្តោតសំខាន់ទៅលើផ្នែកពន្ធដារ ។ លោកបានមានប្រសាសន៍ថា“ អាជីវកម្មនេះផ្តោតសំខាន់ទៅ លើផ្នែកពន្ធ”៕ សុធា