នគរបាលបានឲ្យដឹងថា អាជីវករលក់ត្រីប្រហែល១២នាក់បានបិទផ្លូវជាតិលេខ៦នៅ ក្នុងខេត្តសៀមរាបអស់រយៈពេលជាងមួយម៉ោងកាលពីព្រឹកម្សិលមិញ បន្ទាប់ពីរថយន្តនគរបាលមួយគ្រឿងមកពីនាយកដ្ឋាននគរបាល សេដ្ឋកិច្ច របស់ក្រសួងមហាផ្ទៃបានបុកអាជីវករលក់ត្រីម្នាក់ ដែលកំពុងដឹកត្រីពីភ្នំពេញ។
លោក នួន បូរ៉ា នាយនគរបាលសេដ្ឋកិច្ចបានព្យាយាមបញ្ឈប់អាជីវករឈ្មោះ ផុន សុផល នៅក្នុងឃុំសសរស្តំ ក្នុងស្រុកពួក ខណៈដែល អាជីវកររូបនេះបើកបរទៅកាន់ផ្សារមួយនៅក្នុងក្រុងសៀមរាប ប៉ុន្តែលោក សុផល មិន ព្រមឈប់។ លោក ទេព ព្រំសែន អធិការនគរបាលស្រុកបានឲ្យដឹងថា “លោក បូរ៉ា បាន បើកដេញតាម និងបានបុកពីក្រោយរថយន្តរបស់អាជីវកររូបនេះ ពីព្រោះពួកគេសង្ស័យថា គាត់ធ្វើសកម្មភាពខុសច្បាប់”។
បន្ទាប់ពីការបុកនោះ លោក បូរ៉ា ដកយកសោរថយន្តរបស់ សុផល ប៉ុន្តែ អាជីវករលក់ត្រីរូបនេះបានហៅអាជីវករផ្សេងទៀតនៅក្រុងសៀមរាប ដែលបានមកដល់ទីកន្លែង កើតហេតុ និងចតរថយន្តរបស់ខ្លួនពេញផ្លូវ។
លោក ម៉ៅ វិសុទ្ធ អភិបាលរងស្រុកបានមានប្រសាសន៍ថា នគរបាលបានសុំឲ្យអាជីវករ ទាំងនោះបើកផ្លូវវិញ ពីព្រោះពួកគេបិទផ្លូវភ្ញៀវទេសចរទៅកាន់ក្រុងសៀមរាប។ លោក បានបន្ថែមទៀតថា អាជីវករបានបើកផ្លូវវិញ ប្រហែលជា៩០នាទីក្រោយ៕ ប៊ុននី