កាលពីម្សិលមិញ មជ្ឈមណ្ឌលសិទ្ធិមនុស្សកម្ពុជាបានចេញលិខិតបំភ្លឺមួយបញ្ជាក់ពីលិខិតចំហដែលខ្លួនបានចេញកាលពីថ្ងៃទី១២ ខែធ្នូ ដែលបានចោទលោក សម រង្ស៊ី ប្រធានគណបក្សសង្គ្រោះជាតិថា បាននិយាយប្រមាថ និងរើសអើងចំពោះប្រជាជនវៀតណាម។
លិខិតដំបូងដែលចុះហត្ថលេខាដោយលោក អ៊ូ វីរៈ ប្រធានមជ្ឈមណ្ឌលសិទ្ធិមនុស្សកម្ពុជានេះ បានរិះគន់លោក សម រង្ស៊ី ចំពោះការប្រើពាក្យយួន ដែលជាពាក្យប្រមាថជនជាតិវៀតណាម។ មានការរិះគន់លោក អ៊ូ វីរៈ តាមហ្វេសប៊ុកបន្ទាប់ពីការចេញលិខិតដំបូងនេះ ដោយធ្វើឲ្យលោក ចេញលិខិតបំភ្លឺដើម្បីឆ្លើយតបចំពោះការរិះគន់នេះ កាលពីម្សិលមិញ។
លោក អ៊ូ វីរៈ បានលើកឡើងក្នុងលិខិតបំភ្លឺនោះថា “ខ្ញុំគាំទ្រទាំងស្រុងចំពោះលិខិតដែលមជ្ឈមណ្ឌលសិទ្ធិមនុស្សផ្ញើជូនគណបក្សសង្គ្រោះជាតិ។ ការបន្ទោសជនជាតិវៀតណាម និងប្រទេសវៀតណាម ចំពោះបញ្ហាជាច្រើនដែលប្រទេសកម្ពុជាកំពុងជួបប្រទះនាពេលសព្វថ្ងៃ អាចបង្កគ្រោះថ្នាក់ និងខាតបង់ពេលវេលា”។ លោកបានលើកឡើងថា “គណបក្សនយោបាយ និងមន្ត្រីសាធារណៈទាំងអស់មានការទទួលខុសត្រូវក្នុងការប្រឆាំងនឹងការរើសអើង ជាជាងការចាក់សាំងលើភ្លើង”។
មានការរិះគន់ច្រើនចំពោះលោក អ៊ូ វីរៈ ដោយសារគេគិតថា ‘យួន’ គឺជាពាក្យខ្មែរស្របច្បាប់ប្រើសម្រាប់ជនជាតិវៀតណាម ប៉ុន្តែលោក អ៊ូ វីរៈ បានមានប្រសាសន៍ថា វាមិនមែនដូច្នេះទេ។ លោកបានមានប្រសាសន៍ថា “បញ្ហានេះកំពុងត្រូវបានគេផ្តោតទៅលើប្រវត្តិសាស្ត្រ។ វាមិនពាក់ព័ន្ធនឹងប្រវត្តិសាស្ត្រទេ វាជាការប្រកាន់ពូជសាសន៍។ ការពិតគឺថា ការបញ្ចេញយោបល់ជាច្រើននៅតាមហ្វេសប៊ុកមិននិយាយអំពីបញ្ហាប្រកាន់ពូជសាសន៍ទេ។ គេមិនគួរប្រើពាក្យនេះដើម្បីញុះញង់ឲ្យ មានការស្អប់ខ្ពើមគ្នាឡើយ”។
ការបញ្ចេញយោបល់ដាក់នៅលើទំព័រហ្វេសប៊ុករបស់លោក អ៊ូ វីរៈ ក្នុងរយៈពេលមួយសប្ដាហ៍មកនេះមានការស្នើសុំឲ្យលោកលាឈប់ពីតួនាទីរបស់លោកនៅមជ្ឈមណ្ឌលសិទ្ធិមនុស្សកម្ពុជា និងមានការលើកឡើងថា ខ្លួនគាត់ផ្ទាល់គឺជាវៀតណាម។ ការបញ្ចេញយោបល់ប្រឆាំងវៀតណាមជាចំណុចសំខាន់ក្នុងការធ្វើយុទ្ធនាការឃោសនាបោះឆ្នោត និងការធ្វើបាតុកម្មក្រោយការបោះឆ្នោតរបស់គណបក្សសង្គ្រោះជាតិ ដោយលោក សម រង្ស៊ី បានចោទម្ដងហើយម្ដងទៀតថា យួនលួចការងារ លួចសន្លឹកឆ្នោត និងទន្ទ្រានចូលទឹកដីខ្មែរ។
កាលពីខែសីហា គណបក្សសង្គ្រោះជាតិបានចេញសេចក្ដីប្រកាសមួយប្រាប់ទៅសាធារណជនថា ខ្លួនមិនមែនជាគណបក្សរើសអើង ឬប្រកាន់ពូជសាសន៍ទេ។ សេចក្ដីប្រកាសនោះលើកឡើងថា “គណបក្សសង្គ្រោះជាតិប្រឆាំងនឹងអំពើហិង្សា ការប្រកាន់ពូជសាសន៍ ការស្អប់ខ្ពើម និងការរើសអើង”៕ គឹមហឿន