មន្ត្រីសហជីពម្នាក់ និងនគរបាលនិយាយថា នគរបាលបានឃាត់ខ្លួនកម្មកររោងចក្រកាត់ដេរ១៣នាក់រយៈពេលខ្លីកាលពីម្សិលមិញ បន្ទាប់ពីកម្មករប្រហែល២០.០០០នាក់ ដែលពួកគេមួយចំនួនបានគប់ដុំថ្មនោះ បានបន្តធ្វើកូដកម្ម ដែលបានចាប់ផ្តើមកាលពីថ្ងៃច័ន្ទក្នុងក្រុងបាវិត ខេត្តស្វាយរៀងជុំវិញប្រាក់ខែ និងលក្ខខណ្ឌការងារ។
កាលពីល្ងាចថ្ងៃពុធ មេដឹកនាំសហជីពបានយល់ព្រមបញ្ឈប់ការធ្វើកូដកម្មរបស់កម្មករមកពីរោងចក្រចំនួន៣៦នៅតំបន់សេដ្ឋកិច្ចពិសេសពីរក្នុងខេត្តជាប់ព្រំដែននេះ។
លោក ឆេង ឈាន់ អគ្គលេខាធិការសម្ព័ន្ធសហជីពចលនាកម្មករ បានមានប្រសាសន៍ថា ទោះជាយ៉ាងណា បន្ទាប់ពីកម្មករបានត្រឡប់ទៅធ្វើការវិញកាលពីព្រឹកម្សិលមិញហើយស្រាប់តែពួកគេបានត្រឡប់មកធ្វើកូដកម្មវិញភ្លាមៗ ក្រោយពីពួកគេដឹងពីព័ត៌មានលម្អិតនៃកិច្ចព្រមព្រៀងដែលបានធ្វើហើយនោះ។
លោក ឆេង ឈាន់ បានមានប្រសាសន៍ថា “ ពួកគេមានកំហឹងបន្ទាប់ពីខ្ញុំបានប្រកាសថា កិច្ចព្រមព្រៀងនេះមិនបានរាប់បញ្ចូលការដំឡើងប្រាក់ខែអប្បបរមានោះ”។
កម្មករដែលធ្វើកូដកម្មសង្ឃឹមថា នឹងមានការដំឡើងប្រាក់ខែរបស់ខ្លួនដល់ ១៥៤ដុល្លារ។ ទោះជាយ៉ាងណា តំណាងសហជីពរបស់ខ្លួនបានយល់ព្រមរង់ចាំលទ្ធផលនៅ កិច្ចប្រជុំថ្នាក់ជាតិស្តីពីការដំឡើងប្រាក់ខែអប្បបរមានេះ ដែលគ្រោងធ្វើនៅសប្តាហ៍ក្រោយក្នុងរាជធានីភ្នំពេញ។
លោក អ៊ូ សុខឿន អនុប្រធានមន្ទីរការងារខេត្តមានប្រសាសន៍ថា បើទោះណាជា កម្មករភាគច្រើនក្នុងចំណោមកម្មករធ្វើកូដកម្មទាំង២០.០០០នាក់មកពីតំបន់សេដ្ឋកិច្ចពិសេសម៉ានហាតតាន និងតំបន់សេដ្ឋកិច្ចពិសេសតាយសេងបាវិត មានវត្តមាននៅពេលធ្វើកូដកម្មកាលពីម្សិលមិញក៏ដោយ ក៏ពួកគេមួយចំនួនធំបានព្យាយាមត្រឡប់ទៅធ្វើការវិញដែរ។
លោកបានមានប្រសាសន៍ថា “ កម្មករភាគច្រើនចង់ត្រឡប់ទៅធ្វើការវិញ ប៉ុន្តែកម្មករមួយចំនួនតូចបានរារាំងពួកគេ ពីព្រោះពួកគេចង់ឲ្យកម្មករទាំងនោះចូលរួមធ្វើកូដកម្ម…។ យើងមានការព្រួយបារម្ភដោយសារពួកគេគប់ដុំថ្មដាក់អគាររោងចក្រ”។
លោក កៅ ហន អធិការរងនគរបាលក្រុងបាវិតបានមានប្រសាសន៍ថា នគរបាលបានចាប់ខ្លួនកម្មករធ្វើកូដកម្ម១៣នាក់ បន្ទាប់ពីម្ចាស់រោងចក្របានប្រាប់ថា ពួកគេបាននាំអាទិ៍ឲ្យមានការគប់ដុំថ្ម។
លោក កៅ ហន បានមានប្រសាសន៍បន្ថែមទៀតថា “ យើងទទួលបានជនល្មើស១៣នាក់មែន ប៉ុន្តែពួកគេត្រូវបានដោះលែងវិញហើយនៅម៉ោង១រសៀល បន្ទាប់ពីធ្វើការអប់រំរួច”។
លោក លី ហុងស៊ីន ប្រធានតំបន់សេដ្ឋកិច្ចពិសេសតាយសេងបាវិត បានអះអាងថា កម្មករធ្វើកូដកម្ម បានគប់ដុំថ្មដាក់បង្អួចអគាររោងចក្រពីរនៅតំបន់សេដ្ឋកិច្ចពិសេសនេះ។
លោកបានមានប្រសាសន៍ថា “ កូដកម្មនេះខុសច្បាប់ទាំងស្រុង…រោងចក្រទាំងអស់ស្ថិតក្នុងតំបន់សេដ្ឋកិច្ចពិសេសតាយសេង ត្រូវបិទទាំងស្រុង ដោយសារយើងព្រួយបារម្ភថា អំពើហិង្សាអាចធ្ងន់ធ្ងរជាងនេះទៀត”។លោកបានលើកឡើងម្តងទៀតថា កូដកម្មអាចធ្វើឲ្យវិនិយោគិនរត់ចេញពីប្រទេសយើង។
លោកបានសួរថា “ យើងវិនិយោគដើម្បីរកប្រាក់ចំណេញ ប៉ុន្តែ ប្រសិនបើការវិនិយោគទាំងនេះគ្មានប្រយោជន៍នោះ តើយើងធ្វើដើម្បីអ្វី?”។
លោក កែន លូ អគ្គលេខាធិការសមាគមរោងចក្រកាត់ដេរនៅកម្ពុជាមានប្រសាសន៍ថា លោកពេញចិត្តចំពោះការឃាត់ខ្លួនកម្មករដែលបានគប់ដុំថ្មនោះ។
លោក កែន លូ បានមានប្រសាសន៍ថា “ការធ្វើដូច្នេះត្រឹមត្រូវហើយ។នេះគឺជាលើកទី១ហើយដែលនគរបាលបានឃាត់ខ្លួនបាតុករ”។
ទោះជាយ៉ាងណា ថ្វីបើមានការឃាត់ខ្លួនក៏ដោយ ក៏ សេង យៀកម៉ី អាយុ២២ឆ្នាំ ជាកម្មករម្នាក់ដែលបានចូលរួមក្នុងសកម្មភាពកាលពីម្សិលមិញនិយាយថា នឹងបន្តធ្វើកូដកម្មរាល់ថ្ងៃតែម្តងរហូតទាល់តែមានការដំឡើងប្រាក់ខែអប្បបរមាដល់១៥៤ដុល្លារ។ សេង យៀកម៉ី និយាយថា “ យើងនឹងបន្ត តវ៉ារហូតទាល់តែយើងទទួលបានដំណោះស្រាយសមរម្យ”៕សារុន