26 C
Phnom Penh

លោក​​​ សម រង្ស៊ី ចុះ​​​ជួប​​​កម្មករ​​​កម្មការិនី​​​ធ្វើកូដកម្ម​​​​​​នៅ​​​តំបន់​​​សេដ្ឋកិច្ច​​​ពិសេស​​​ខេត្ត​​​ស្វាយរៀង​​​

ដោយ ឌឹ ខេមបូឌា ដេលី

បទវិភាគ

កាល​​​ពី​​​ម្សិលមិញ លោក​​​ សម រង្ស៊ី មេដឹក​​​នាំ​​​គណបក្ស​​​ប្រឆាំង​​​បាន​​​ចុះ​​​ជួប​​​​​​កម្មករ​​​កម្ម​​​​​ការិនី​​​រាប់​​​ពាន់​​​នាក់​​​មក​​​ពី​​​តំបន់​​​សេដ្ឋកិច្ច​​​ពិសេស​​​ចំនួន​​​ពីរកន្លែង​​​​​​ក្នុង​​​ខេត្ត​​​ស្វាយរៀង​​​ ដែល​​​បាន​​​ធ្វើ​​​កូដ​​​កម្ម​​​ទាមទារដំឡើង​​​ប្រាក់​​​ខែ​​​ និង​​​ទាម​​​ទារ​​​​​​លក្ខខណ្ឌ​​ការ​​​ងារ​​​ល្អ​​​ប្រសើរ​​​ចាប់​​​តាំង​​​ពី​​​ថ្ងៃ​​​ទី​​​១៦ ខែ​​​ធ្នូ​​​ មក​​​។ 

កម្មករ​​​កម្មការិនី​​​ជាង​​​​​​២៥.០០០​​​នាក់​​​​​​មក​​​ពី​​​រោង​​​ចក្រ​​​ចំនួន​​​៣៦នៅ​​​​​​ក្នុង​​​តំបន់​​​សេដ្ឋកិច្ច​​​ពិសេស​​​ ម៉ានហាតាន​​​ និង​​​តំបន់​​​សេដ្ឋកិច្ច​​​ពិសេស​​​តាយសេង​​​បាវិត​​​ បាន​​​ចាប់​​​ផ្ដើម​​​ធ្វើ​​​កូដកម្ម​​​កាល​​​ពី​​​សប្ដាហ៍​​​មុន​​​ ដើម្បី​​​ទាម​​​ទារ​​​​​​ឲ្យ​​​ដំឡើង​​​ប្រាក់​​​ខែ​​​អប្បបរមា​​​​​​ភ្លាមៗ​​​ពី​​​៨០​​​ដុល្លារ​​​ទៅ​​​១៥៤​​​ដុល្លារ​​​ក្នុង​​​មួយ​​​ខែ​​​ និង​​​ទាម​​​ទារ​​​ឲ្យ​​​រោងចក្រ​​​របស់​​​ខ្លួន​​​បញ្ឈប់​​​ការ​​​ពិន័យ​​​កម្ម​​​ករ​​​ចំនួន​​​១៥​​​ដុល្លារ​​​ក្នុង​​​មួយ​​​ថ្ងៃ​​​ នៅ​​​ពេល​​​ពួក​​​គេ​​​អវត្តមាន​​​​​​មិន​​​មក​​​ធ្វើ​​​ការ​​​។

កម្មករ​​​​​​ភាគច្រើនបាន​​​​​​សម្រាក​​​នៅ​​​ផ្ទះ​​​នៅ​​​ឡើយ​​​ចាប់​​​តាំ​​​ង​​​ពី​​​ថ្ងៃ​​​ពុធ​​​មក​​​ ដែល​​​នៅ​​​ពេល​​​​​​នោះ​​​មេដឹកនាំ​​​កូដកម្ម​​​ចំនួន​​​១៣​​​នាក់​​​​​​ត្រូវ​​​បាន​​​​​នគរបាល​​​ឃាត់​​ខ្លួន​​​​​​ព្រោះ​​​ការ​​​​​​គប់​​​ដំ​​​​​​ថ្មទៅ​​​លើ​​​រោង​​​ចក្រ​​​ ដើម្បី​​​ជំទាស់​​​នឹង​​​​​​ការ​​​ព្រម​​​ព្រៀង​​​មួយ​​​​​​រវាង​​​មេដឹកនាំ​​​សហជីព​​​ និង​​​អាជ្ញាធរ​​​ ដើម្បី​​​បញ្ចប់​​​ការ​​​ធ្វើ​​​កូដកម្ម​​​នេះ​​​។

នៅ​​​ពេល​​​ទៅ​​ដល់​​​តំបន់​​​សេដ្ឋកិច្ច​​​ពិសេស​​​​​​ម៉ានហាតាន​​​ ដែល​​​ស្ថិត​​​នៅ​​​ជាប់​​​ព្រំ​​​ដែន​​​វៀត​​​ណាម​​​នៅ​​​ម៉ោង​​​​​​ប្រហែល​​​​​​៧​​​ និង​​​​​​៣០​​​នាទី​​​ព្រឹក​​​ លោក​​​ សម រង្ស៊ី បាន​​​មាន​​​ប្រសា​​​សន៍​​​ទៅ​​​កាន់​​​កម្មករ​​​ពីរ​​បី​​​ពាន់​​​នាក់​​​ ដែល​​​បាន​​​​​​ចេញ​​​មក​​​​​​ខាង​​​ក្រៅ​​​​​​រោង​​​ចក្រ​​​​​​ ដើម្បី​​​ធ្វើ​​​កូដ​​​កម្ម​​​ថា គណ​​​បក្ស​​​សង្គ្រោះជាតិ​​​គាំទ្រ​​​​​​ការ​​​​​​ទាម​​​​​​ទារ​​​របស់ពួក​​​គេ​​​សុំ​​​ដំឡើ​​​ងប្រាក់​​​ខែ​​​អប្បបរមា​​​ភ្លាមៗ​​​សម្រាប់​​​កម្ម​​​ករ​​​កម្មការិនី​​​រោងចក្រ​​​កាត់​​​ដេរ​​​។

លោក​​​​​​បាន​​​​​​មាន​​​ប្រសាសន៍​​​នៅ​​​ក្នុង​​​ខ្សែ​​​វីដេអូ​​​មួយ​​​បង្ហោះ​​​​​​ក្នុង​​​ទំព័រ​​​​​​ហ្វេស​​​បុក​​​របស់​​​​​​លោក​​​ថា “យើង​​​បាន​​​ទាម​​​ទារ​​​​​​ឲ្យ​​​ដំឡើង​​​ប្រាក់​​​ខែ​​​​​​អប្បបរមា​​​នៅ​​​ខែ​​​មករា​​​​​​ឆ្នាំ​​​ក្រោយ ប៉ុន្តែ​​​​​​អាជ្ញា​​​ធរ​​​ និង​​​​​​ម្ចាស់​​​រោងចក្រ​​​បាន​​​​​​ឃុប​​​ឃិត​​​គ្នា​​​​​​យល់​​​ព្រម​​​ដំឡើង​​​ប្រាក់​​​ខែ​​​​​​នេះ​​ទាល់​​​តែ​​​ឆ្នាំ​​​២០១៨ ដូច្នេះ​​​បង​​​ប្អូន​​​​​​ទាំង​​​អស់​​​គ្នា​​​នឹង​​​ស្លាប់​​​​​​ដោយ​​​សារ​​​ដាច់​​​ពោះ​​​”។

លោក​​​បាន​​​បន្ត​​​ទៀត​​​ថា “នៅ​​​ឆ្នាំ​​​២០១៨ នៅ​​​ពេល​​​តម្លៃ​​​ទំនិញ​​​​​​កាន់​​​តែ​​​កើ​​​ន​​​ឡើង​​​​​​ ការ​​​ដំឡើង​​​ប្រាក់​​​ខែ​​​១៦០​​​ដុល្លារ​​​ នឹង​​​មិន​​​គ្រប់​​​គ្រាន់​​​សម្រាប់​​​កម្មករ​​​ទេ​​​ ដូច្នេះ​​ពេល​​​នោះ​​​​​​​បង​​​ប្អូន​​​ទាំង​​​អស់​​​គ្នា​​​​​​ត្រូវ​​​ការ​​​​​​ដំឡើ​​​ង​​​ប្រាក់​​​ខែ​​​ដល់​​​៣០០​​​ដុល្លារ​​​ក្នុង​​​មួយ​​​ខែ​​​​​​”។

ក្រុម​​​ប្រឹក្សា​​​ពិគ្រោះ​​​យោបល់​​​ការងារ​​​គ្រោង​​​​​​នឹង​​​ជួប​​​ប្រជុំ​​​នៅ​​​ថ្ងៃ​​​នេះ​​​ ដើម្បី​​​សម្រេច​​​​​​លើ​​​សំណើ​​​មួយ​​​ចំនួន​​​សុំ​​​ដំឡើ​​​ងប្រាក់​​​ខែ​​​អប្ប​​​​​​បរមា​​​ជួន​​​កម្មករ​​​​​កម្មការិនី​​​រោងចក្រ​​​កាត់​​​ដេរ​​​។

ទីស្ដីការ​​​គណៈរដ្ឋមន្ត្រី​​​បាន​​​ស្នើ​​​ឲ្យ​​​ក្រុម​​​ប្រឹក្សា​​​ពិគ្រោះ​​​យោបល់​​​ការងារ​​​អនុវត្ត​​​ការ​​​ដំឡើ​​​ង​​​ប្រាក់​​​ខែ​​​​​​ប្រចាំ​​​ឆ្នាំ​​​​​​ជា​​​លំដាប់​​​ ហើយ​​​ការ​​​​​​ដំឡើង​​​​​​ប្រចាំ​​​ឆ្នាំ​​​ជា​​​លំដាប់​​​នេះ​​​​​​នឹង​​​​​​ឡើ​​​ង​​​ដល់​​​១៦០​​​ដុល្លារ​​​​​​នៅ​​​ឆ្នាំ ២០១៨​​​។

មុន​​​ពេល​​​អាហារ​​​ថ្ងៃ​​​ត្រង់​​​ លោក សម រង្ស៊ី ក៏​​​បាន​​​ចោទប្រកាន់​​​ម្ចាស់​​​រោងចក្រ​​​នៅ​​​ក្នុង​​​​​​​​​តំបន់​​​សេដ្ឋកិច្ច​​​ពិសេស​​​ម៉ានហាតាន​​​​​​ ចំពោះ​​​ការ​​​ចាត់​​​ទុក​​​កម្មករ​​​របស់​​​ខ្លួន​​​ដូច​​​ជា​​​អ្ន​​​ក​​​ទោស​​​ និង​​​ការ​​​មិន​​​អនុញ្ញាត​​​​​​ឲ្យ​​​ពួក​​​គេ​​​​​​ចូល​​​រួម​​​​​​ជាមួយ​​​ប្រធាន​​​គណបក្ស​​​សង្គ្រោះ​​​ជាតិ​​​រូប​​​នេះ​​​ និង​​​កម្ម​​​ករ​​​កូដកម្ម​​​ ដែល​​​កំពុង​​​​​​តវ៉ា​​​នៅ​​​ខាង​​​ក្រៅ​​​។

លោក​​​ អ៊ូ សុឃឿន អនុប្រធាន​​​មន្ទីរ​​​ការងារ​​​ខេត្ត​​​ស្វាយ​​​រៀង​​​បាន​​​មាន​​​ប្រសាសន៍​​​ថា តាម​​​ពិត​​​ទៅ​​​កម្មករ​​​មក​​​ពីរោង​​​ចក្រ​​​មួយ​​​ចំនួន​​​បាន​​​យល់​​​ព្រម​​​ត្រឡប់​​​ចូល​​​ធ្វើ​​​ការ​​​វិញ​​​ហើយ​​​កាល​​​ពី​​​ព្រឹក​​​ម្សិលមិញ​​​ ប៉ុន្តែ​​​ត្រូវ​​​បាន​​​បញ្ជូន​​​ត្រឡប់​​​ទៅ​​​ផ្ទះ​​​វិញ​​​ពេល​​​អាហារ​​​ថ្ងៃ​​​ត្រង់​​​ បន្ទាប់ពី​​​​​​លោក​​​ សម រង្ស៊ី ធ្វើ​​​ការ​​​អត្ថា​​​ធិ​​​ប្បាយ​​​បែប​​​ញុះញង់​​​រួច​​​។

លោក​​​ អ៊ូ សុឃឿន បាន​​​មាន​​​ប្រសាសន៍​​​ថា “កម្មករ​​​​​​នៅ​​​រោងចក្រ​​​​​ប្រាំ​​​ឬ​​​ប្រាំមួយ​​​នៅ​​​ម៉ាន​​​ហាតាន​​​​​​​​​ ត្រូវ​​​បាន​​​អនុញ្ញាត​​​ឲ្យ​​​វិល​​​ត្រឡប់​​​ទៅ​​​ផ្ទះវិញ​​​បន្ទាប់​​​ពី​​​អាហារ​​​ថ្ងៃ​​​ត្រង់​​​ពីព្រោះ​​​ម្ចាស់​​​រោងចក្រ​​​​​​ព្រួយ​​​បារម្ភ​​​ខ្លាច​​​​​​អ្នក​​​តវ៉ា​​​​​​ចាប់​​​ផ្ដើ​​​ម​​​គប់​​​ដុំ​​​ថ្ម​​​លើ​​​កម្មករ​​​នៅ​​​​​​ខាង​​​ក្នុង​​​”។

លោក​​​ សម រង្ស៊ី បាន​​​បញ្ជាក់​​​ថា  ខណៈ​​​ពេល​​​ដែល​​​កម្មករ​​​​​​ធ្វើ​​​កូដកម្ម​​​​​​មួយ​​​​​​ចំនួន​​​បាន​​​សម្រេច​​​ចិត្ត​​​ចូល​​​ធ្វើ​​​ការ​​​វិញ​​​មុន​​​ពេល​​​លោក​​​ទៅ​​​ដល់​​​ មាន​​​ “ការ​​​បំភិត​​​បំភ័យ​​​” នៅ​​​ក្នុង​​​តំបន់​​​នោះ​​​ ពេល​​​ដែល​​​សន្ដិសុខ​​​​​​បាន​​​រារាំង​​​កម្ម​​​ករ​​​​​​​​​​​​​​​មិន​​​ឲ្យ​​​ចូល​​​​​​រួម​​​ធ្វើ​​​ការ​​​តវ៉ា​​​​​​ម្ដង​​​ទៀត​​​​​​។

លោក​​​បាន​​​មាន​​​ប្រសាសន៍​​​ថា “ខ្ញុំ​​​បាន​​​ព្យាយាម​​​​​​និយាយ​​​ជាមួយ​​​កម្មករ​​​នៅ​​ខាង​​​ក្នុង​​​ទាំង​​​នោះ ហើយ​​​ពួក​​​គាត់​​​មាន​​​ការ​​​ភ័យ​​​ខ្លាច​​​យ៉ាង​​​ខ្លាំង​​​។ ខ្ញុំ​​​បាន​​​សួរ​​​ពួក​​​គាត់​​​ថា ‘តើ​​​បង​​​ប្អូន​​​ចង់​​​ចូល​​​រួម​​​ជាមួយ​​​សហសេវិក​​​របស់​​​បង​​​ប្អូន​​​មក​​​ពី​​​រោងចក្រ​​​ផ្សេង​​​ទៀត​​​​​​ដែល​​​នៅ​​​ខាង​​​ក្រៅ​​​ដែរ​​​ទេ​​​?’ ហើយ​​​ពួក​​​គាត់​​​បាន​​​ឆ្លើយ​​​ថា ‘ចង់​​​ ប៉ុន្តែ​​​ខ្ញុំ​​​ភ័យ​​​ខ្លាច​​​​​​ណាស់​​​’”។

លោក​​​ មីុ ឡី ប្រធាន​​​រដ្ឋបាល​​​នៅ​​​​​​រោង​​​ចក្រ​​សេកូ ខេមបូឌា ខូអិល​​​ធីឌី​​​ ជា​​​រោងចក្រ​​​​​​មួយ​​​នៅ​​​ក្នុង​​​តំបន់​​​សេដ្ឋកិច្ច​​​ពិសេស​​​ម៉ាន​​​ហា​​​តាន​​​​​​បាន​​​លើក​​​ឡើ​​​ង​​​ថា កម្មករ​​​ប្រហែល​​​៣.០០០​​​នាក់​​​ស្ម័គ្រ​​​ចិត្ត​​​យល់​​​ព្រម​​​ត្រឡប់​​​ចូល​​​​​​ធ្វើ​​​ការ​​​នៅ​​​រោង​​​ចក្រ​​​របស់​​​គាត់​​​វិញ​​​ ហើយ​​​បាន​​​បដិសេធ​​​ថា មិន​​​មាន​​​ការ​​​​​​រារាំង​​​​​​​​​ពួក​​​គេ​​​មិន​​​ឲ្យ​​​ចាក​​​ចេញ​​​នោះ​​​ទេ​​​។

លោក​​​បាន​​​លើក​​​ឡើង​​​ទៀត​​​ថា “យើង​​​បាន​​​ចាក់​​​​​​សោ​​​ទ្វារ​​​រោង​​​ចក្រ​​​​​​មិន​​​មែន​​​ដើម្បី​​​​​​ឃាត់​​​​​​ទុក​​​កម្មករ​​​​​​នោះ​​​ទេ​​​​​​ ប៉ុន្តែ​​​ដោយ​​​សារ​​​តែ​​​យើង​​​បារម្ភ​​​ខ្លាច​​​​​​អ្នក​​​តវ៉ា​​​សម្រុក​​​ចូល​​​មក​​​ខាង​​​ក្នុង​​​​​​ ហើយ​​​បំផ្លាញ​​​​​​ទ្រព្យ​​​សម្បត្តិ​​​របស់​​​​​​យើង​​​”។

លោក​​​ លី ហុង​​​សិន​​​ ម្ចាស់​​​តំបន់​​​សេដ្ឋកិច្ច​​​​​​តាយ​​​សេង​​​បាវិត​​​​​​បាន​​​បញ្ជាក់​​​​​​ជា​​​ថ្មី​​​​​​​​​ម្ដង​​​ទៀត​​ថា កូដកម្ម​​​ហិង្សា​​​កាន់​​​តែ​​​ខ្លាំង​​​ឡើ​​​ងៗ​​​នៅ​​​ក្នុង​​​តំបន់​​​សេដ្ឋកិច្ច​​​ពិសេស​​​របស់​​​លោក​​​ និង​​​ការ​​​​​​ធ្វើ​​​ឲ្យ​​​កម្មករ​​​​​​ពាក់​​​ព័ន្ធ​​​នឹ​​​ង​​​សកម្ម​​​ភាព​​​នយោ​​​បាយ​​​កាន់​​​តែ​​​ច្រើន​​​ឡើង​​ៗ ​​​បាន​​​ធ្វើ​​​ឲ្យ​​​ការ​​​ធ្វើ​​​ពាណិជ្ជកម្ម​​​ក្នុង​​​ប្រទេស​​​កម្ពុជា​​​​​​មិន​​​សូវ​​​មាន​​​ការ​​​ចាប់​​​អារម្មណ៍​​​។

លោក​​​បាន​​​​​​លើក​​​ឡើ​​​ងថា “ពេល​​​នេះ​​​រោង​​​ចក្រ​​​មួយ​​​ចំនួន​​​កំពុង​​​​​​ត្រៀម​​​ខ្លួន​​​ចាកចេញ​​​ពី​​​កម្ពុជា​​​​​​ទៅ​​​ភូមា​​​ វៀត​​​ណាម​​​ និង​​​បង់​​​ក្លាដែស​​​ ដោយ​​​សារ​​​តែ​​​ការ​​​ទាមទារ​​​ប្រាក់​​​ខែ​​​ខ្ពស់​​​របស់​​​ពួក​​​គេ​​​ និង​​​កម្មករ​​​ធ្វើ​​​ការ​​​តវ៉ា​​​រាល់​​​ថ្ងៃ​​​ ដែល​​​ធ្វើ​​​ឲ្យ​​​ម្ចាស់​​រោង​​​ចក្រ​​​​​​ខាតបង់​​​ប្រាក់​​​ចំណេញ​​​”។

លោក​​​ ឆេង ឈ័ន មន្ត្រី​​​សហជីពមក​​​ពី​​​សម្ពន្ធ​​​សហជីព​​​ចលនា​​​កម្មករ​​​ បាន​​​​​​លើក​​​ឡើ​​​​​​ង​​​កាល​​​ពី​​​ថ្ងៃ​​​អាទិត្យ​​​ថា រូប​​​លោក​​​បាន​​​បាត់​​​បង់​​​ការ​​​គ្រប់​​​គ្រង​​​កម្មករ​​​ធ្វើ​​​កូដកម្ម​​​ បន្ទាប់​​​ពី​​​​​​បាន​​​ព្រម​​​ព្រៀង​​​​​​ជាមួយ​​​អាជ្ញាធរ​​​កាល​​​ពី​​​សប្ដាហ៍​​​មុន​​​ ដើម្បី​​​បញ្ចប់​​​​​​ការ​​​ធ្វើ​​​កូដកម្ម​​​នេះ​​​។

យោង​​​តាម​​​លោក​​​ សម រង្ស៊ី បាន​​​ឲ្យ​​​ដឹង​​​ថា កូដករ​​​ដែល​​​លែង​​​​​​ទទួល​​​ស្គាល់​​​​​​សហជីព​​​របស់​​​លោក ឆេង​​​ ឈ័ន បាន​​​ចាប់​​​ផ្ដើម​​​ដំណើរ​​​ការ​​​​​​បង្កើត​​​​​​សហជីព​​​ថ្មី​​​ផ្ទាល់​​​ខ្លួន​​​របស់​​​ពួក​​​គេ​​​កាល​​​ពីម្សិលមិញ​​​។
លោក​​​ សម រង្ស៊ី ដែល​​​បាន​​​ត្រឡប់​​​មក​​​កាន់​​​រាជធានីភ្នំពេញ​​​វិញ​​​កាលពី​​​ម្សិលមិញ​​​​​​ ដើម្បី​​​ដឹក​​​នាំ​​​ការ​​​ហែក្បួន​​​ ដែល​​​កំពុង​​​តែ​​​​​បន្ត​​​ធ្វើ​​​​​​របស់​​​គណបក្ស​​​សង្គ្រោះ​​​ជាតិ​​​ បាន​​​មាន​​​ប្រសាសន៍​​​បន្ថែម​​​ទៀត​​​ថា លោក​​​និង​​​មេ​​​ដឹក​​​នាំ​​​ផ្សេង​​​ៗ​​​ទៀត​​​របស់​​​​​​គណបក្ស​​​ប្រឆាំង​​​នឹង​​​ចុះ​​​ជួប​​​​​​កូដ​​​ករ​​​​​​នៅ​​​ក្នុង​​​ខេត្ត​​​ស្វាយរៀង​​​ម្ដង​​​ទៀត​​​នៅ​​​ព្រឹក​​​នេះ​​​៕ សុខុម

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស