លោក ទៀ បាញ់ រដ្ឋមន្ត្រីក្រសួងការពារជាតិ នឹងទៅចូលរួមពិនិត្យសកម្មភាពសមយុទ្ធបាញ់គ្រាប់ពិតនៅខេត្តកំពង់ស្ពឺ ក្នុងថ្ងៃនេះ។ នៅក្នុងសមយុទ្ធនោះ កងយោធពលខេមរភូមិន្ទ នឹងសាកល្បងប្រើប្រាស់ជើងទម្រគ្រាប់កាំជ្រួចលើរថយន្តថ្មីមួយ ដែលហៅថា RM-70 ។
តាំងពីថ្ងៃសុក្រមក នៅពេលសមយុទ្ធបានចាប់ផ្តើម កងកម្លាំងយោធាបានធ្វើសមយុទ្ធគ្រាប់ពិត ដោយមានរថពាសដែក កាំភ្លើងធំ កាំភ្លើងយន្ត នេះបើយោងតាមឧត្តមសេនីយ៍ឯក ណុប រតនា មេបញ្ជាការនៅបញ្ជាការដ្ឋានកងរថក្រោះ ACO នៅស្រុកភ្នំស្រួច ខេត្តកំពង់ស្ពឺ ដែលជាទីតាំងធ្វើសមយុទ្ធនេះ។
លោកឧត្តមសេនីយ៍ឯក ណុប រតនា បានមានប្រសាសន៍កាលពីម្សិលមិញថា ថ្ងៃនេះ
“ យើងនឹងបង្ហាញសមត្ថភាពរបស់យើងក្នុងសកម្មភាពសមយុទ្ធប្រចាំឆ្នាំនេះដោយសាកល្បងប្រើជើងទម្រគ្រាប់កាំជ្រួចថ្មីមួយ”។
នេះគឺជាការសាកល្បងបាញ់គ្រាប់ពិតលើកដំបូង ដោយប្រើជើងទម្រគ្រាប់កាំជ្រួច RM-70 ដែលជាជើងទម្ររចនាថ្មីនៅសាធារណរដ្ឋឆេក បន្ទាប់ពីជើងទម្រគ្រាប់កាំជ្រួច BM-21 រចនាដោយប្រទេសរុស្ស៊ី ដែលកងយោធពលខេមរភូមិន្ទបានប្រើប្រាស់អស់រយៈពេលជាច្រើនឆ្នាំមកហើយ។
ជើងទម្រគ្រាប់កាំជ្រួច RM-70 នេះមានសមត្ថភាពបាញ់កាំជ្រួចបាន៤០គ្រាប់ក្នុងរយៈពេល២០វិនាទី និងមានសមត្ថភាពបញ្ចូល គ្រាប់កាំជ្រួចបន្ថែមដោយស្វ័យប្រវត្តិចំនួន
៤០គ្រាប់។
ទោះបីជាកាំជ្រួចនីមួយៗសម្រាប់ប្រើលើជើងទម្រគ្រាប់កាំជ្រួច RM-70 មានតម្លៃចន្លោះពី១.២០០ដុល្លារទៅ៣.៨០០ដុល្លារ មន្ត្រីយោធាជាន់ខ្ពស់នានា មិនបានឲ្យដឹងថា តើពួកគេមានផែនការចំណាយទៅលើការទិញគ្រាប់កាំជ្រួចប៉ុន្មានគ្រាប់ទេសម្រាប់ការធ្វើសមយុទ្ធបាញ់គ្រាប់ពិតដែលនឹងត្រូវប្រព្រឹត្តទៅក្នុងថ្ងៃនេះ។
សមយុទ្ធយោធាប្រាំថ្ងៃដែលកំពុងដំណើរការនេះគឺជាសមយុទ្ធបាញ់គ្រាប់ពិតលើកទី៣ក្នុងឆ្នាំនេះបន្ទាប់ពីមានសមយុទ្ធកាលពីខែមេសា នៅបញ្ជាការដ្ឋាន ACO និងសមយុទ្ធ កងរាជអាវុធហត្ថកាលពីខែតុលា ដែលប្រព្រឹត្តទៅនៅក្នុងខេត្តកំពង់ឆ្នាំង៕ សុធា