លោក ជាម យៀប សមាជិកសភាគណបក្សប្រជាជនកម្ពុជា បានឲ្យដឹងកាលពីម្សិលមិញថា ការប្រារព្ធទិវាជ័យជម្នះ៧មករាលើរបបខ្មែរក្រហមនៅឆ្នាំនេះគឺនឹងមានទ្រង់ទ្រាយធំជាងឆ្នាំមុនៗ។
ខណៈគណបក្សប្រជាជនកម្ពុជាចាត់ទុកថ្ងៃ៧មករានេះថា ជាថ្ងៃបញ្ចប់ការគ្រប់គ្រងអំណាចរយៈពេលជិតបួនឆ្នាំរបស់ ប៉ុល ពត នោះ គណបក្សប្រឆាំងលើកឡើងថា មិនគួរប្រារព្ធទិវានេះឡើយ គឺគួរចងចាំថ្ងៃនេះថា ជាថ្ងៃចាប់ផ្តើមការគ្រប់គ្រងប្រទេសកម្ពុជារយៈពេល១០ឆ្នាំរបស់វៀតណាមវិញ។ គឺការគ្រប់គ្រងនេះហើយដែលជួយឲ្យលោកនាយករដ្ឋមន្ត្រី ហ៊ុន សែន និងថ្នាក់ដឹកនាំនៃគណបក្សប្រជាជនកម្ពុជាឡើងកាន់អំណាចពីដំបូង។
លោក ជាម យៀប បានមានប្រសាសន៍កាលពីម្សិលមិញថា ការប្រារព្ធខួបលើកទី៣៥នៅថ្ងៃអង្គារនេះ នឹងមានទ្រង់ទ្រាយធំបំផុតគិតចាប់ពីថ្ងៃប្រារព្ធខួបលើកទី៣០ក្នុងឆ្នាំ២០០៩មក។លោកបានឲ្យដឹងថា ការប្រារព្ធពិធីនេះនឹងប្តូរពីទីស្នាក់ការកណ្តាលរបស់គណបក្សប្រជាជនកម្ពុជា ទៅកាន់កោះពេជ្រក្នុងរាជធានីភ្នំពេញវិញ ហើយនឹងមានភ្ញៀវចូលរួមកាន់តែច្រើនជាងមុន។
លោកបានមានប្រសាសន៍ថា “ឆ្នាំនេះគណបក្សប្រជាជនកម្ពុជា នឹងប្រារព្ធខួបដ៏ធំមួយនៅឯកោះពេជ្រ ដែលតាមការរំពឹងថា នឹងមានអ្នកចូលរួមច្រើន”។
ដូចសព្វដងដែរ លោក ជាម យៀប បានលើកឡើងថា ពិធីនេះគឺជាឱកាសមួយដើម្បីថ្លែងអំណរគុណដល់វៀតណាម។ ប្រសិនបើគ្មានអាវុធ និងទ័ពរបស់វៀតណាមទេនោះ ក្រុមអ្នកផ្តាច់ខ្លួនខ្មែរក្រហម ដែលរួមមានទាំងលោក ហ៊ុន សែន ផងដែរនោះ ពិតជាពុំអាចផ្តួលរំលំកងកម្លាំង ប៉ុល ពត បានទេ។
លោក ជាម យៀប បានមានប្រសាសន៍ថា “ប្រសិនបើមិនមានវៀតណាម និងអាវុធ[របស់ពួកគេ] ទេនោះ យើងមិនអាចផ្តួលរំលំខ្មែរក្រហមបានឡើយ។ យើងពុំអាចបំភ្លេចគុណរបស់បក្សកុម្មុយនីស្តវៀតណាមដែលខំជួយយើងបានទេ ហើយយើងតែងប្រារព្ធពិធីនេះរៀងរាល់ឆ្នាំ”។
លោក ជាម យៀប បានមានប្រសាសន៍បន្ថែមទៀតថា លោក ហេង សំរិន ប្រធានរដ្ឋសភា ដែលរួមគ្នាបង្កើតក្រុមឧទ្ទាមដែលបានជួយផ្តួលរំលំ ប៉ុល ពត នៅក្នុងនាមជាអ្នកផ្តាច់ខ្លួនខ្មែរក្រហមម្នាក់នោះ បានទៅដល់ប្រទេសវៀតណាម និងបានចូលរួមក្នុងការប្រារព្ធខួបជ័យជម្នះ៧មករានេះក្នុងទីក្រុងហាណូយ កាលពីថ្ងៃសៅរ៍ រួចហើយ។
លោក ហេង សំរិន ក៏បានជួបពិភាក្សាគ្នាជាមួយសមភាគីវៀតណាមរបស់លោក គឺលោក ង្វៀន ស៊ិញ ហ៊ុង (Nguyen Sinh Hung) និងលោក ទ្រឹង តាន់ សេង (Truong Tan Seng)ប្រធានាធិបតីនៃប្រទេសវៀតណាមផងដែរ នេះបើយោងទៅលើទីភ្នាក់ងារព័ត៌មានរដ្ឋកម្ពុជា អាកាប៉េ។ ទោះបីជាគណបក្សប្រជាជនកម្ពុជាមានផែនការធ្វើឲ្យពិធីនៅឆ្នាំនេះមានទ្រង់ទ្រាយធំបំផុតក៏ដោយ ប៉ុន្តែវាធ្វើឡើងអំឡុងពេលដែលមានការកើនឡើងនូវស្មារតីប្រឆាំងនឹងវៀតណាមក្នុងចំណោមពលរដ្ឋកម្ពុជា ដែលស្មារតីនេះគឺត្រូវបានបញ្ឆេះដោយគណបក្សប្រឆាំងអំឡុងការបោះឆ្នោតជាតិឆ្នាំមុន។
បក្សប្រឆាំងបានយករឿងអន្តោប្រវេសន៍ខុសច្បាប់ និងការចាប់យកដីពីសំណាក់ក្រុមហ៊ុនវៀតណាម មកធ្វើយុទ្ធនាការឃោសនាដែលរឿងនេះបានដក់ជាប់យ៉ាងខ្លាំងក្នុងអារម្មណ៍របស់អ្នកបោះឆ្នោត៕ ប៊ុននី