យុវជនជាអ្នកគាំទ្រគណបក្សប្រឆាំងមួយក្រុមមានគ្នាប្រាំបីនាក់ បានច្រៀងចម្រៀងមួយបទនៅជិតទីលានប្រជាធិបតេយ្យក្នុងរាជធានីភ្នំពេញមុនពេលនគរបាលដែលបានដាក់ពង្រាយក្បែរនោះមានឱកាសបំបែកពួកគេកាលពីម្សិលមិញ។នេះជាការសាកល្បងបម្រាមថ្មីមិនឲ្យមានការជួបជុំគ្នាបន្ទាប់ពីមានការតវ៉ាប្រឆាំងរដ្ឋាភិបាលទ្រង់ទ្រាយធំមក។
កាលពីល្ងាចថ្ងៃពុធ អ្នកគាំទ្រគណបក្សសង្គ្រោះជាតិមួយក្រុមនេះបានប្រកាសអំពីគម្រោងទៅច្រៀងចម្រៀងអហិង្សានៅឯទីលានប្រជាធិបតេយ្យ និងថ្កោលទោសការបាញ់សម្លាប់អ្នកតវ៉ាយ៉ាងហោចណាស់ប្រាំនាក់កាលពីថ្ងៃសុក្រសប្តាហ៍មុនក្រោមស្នាដៃរបស់មន្ត្រីកងរាជអាវុធហត្ថ។
ក៏ប៉ុន្តែ ដោយសារមាននគរបាលប្រដាប់ដោយឧបករណ៍បង្ក្រាបកុបកម្ម និងកងរាជអាវុធហត្ថប្រដាប់អាវុធដើរល្បាតទីលានប្រជាធិបតេយ្យច្រើនពេក ដោយបានទាំងដេញអ្នកកាសែតមិនឲ្យទៅក្បែរផងនោះយុវជនទាំងនេះមិនទាំងបានព្យាយាមចូលទៅទីលាននេះផងទេ។
ផ្ទុយមកវិញ យុវជនទាំងនេះបានសម្រេចចិត្តច្រៀងចម្រៀងតែមួយបទនៅជាប់ស្ពាននាគក្បែរនោះវិញ ដោយចម្រៀងរបស់ពួកគេបានបញ្ចប់មុនពេលនគរបាលមកដល់។
កញ្ញា លឹម គឹមសួ ជាយុវតីគណបក្សសង្គ្រោះជាតិដែលបានរៀបចំកម្មវិធីនេះបាននិយាយថា “ យើងមានគម្រោងច្រៀងនៅទីលានប្រជាធិបតេយ្យ ប៉ុន្តែដោយសារអាជ្ញាធរដាក់កម្លាំងច្រើនពេក យើងក៏បានសម្រេចចិត្តច្រៀងនៅស្ពាននាគវិញ”។
យុវតីរូបនេះបាននិយាយបន្តថា“ យើងរៀបចំព្រឹត្តិការណ៍នេះឡើងដើម្បីផ្ញើសារទៅអាជ្ញាធរសាលារាជធានីថា ពួកគេកំពុងអនុវត្តច្បាប់ខុសហើយ ហើយថា វាជាការរំលោភលើច្បាប់រដ្ឋធម្មនុញ្ញរបស់ប្រទេសកម្ពុជា និងជាការគាបសង្កត់សិទ្ធិមនុស្ស”។
ក្រោយពេលពួកគេច្រៀងចប់ នគរបាលក៏បានមកដល់ជាមួយនឹងកងសន្តិសុខខណ្ឌពេញមួយរថយន្តដែលសុទ្ធតែពាក់មួកសុវត្ថិភាពពណ៌ខ្មៅ ដោយនៅក្នុងដៃមានកាន់ដំបងហើយបានបញ្ជាឲ្យមានការយកម៉ូតូចតតាមចិញ្ចើមផ្លូវចេញ។
កញ្ញា គឹមសួ បានឲ្យដឹងថា សន្តិសុខក្នុងសម្លៀកបំពាក់ពាក់ស៊ីវិលបាននាំគ្នាដេញតាមក្រុមខ្លួនដែលបានចាកចេញពីទីកន្លែងនោះ ហើយបានសម្រេចចិត្តចូលក្នុងទីស្នាក់ការការិយាល័យឧត្តមស្នងការសហប្រជាជាតិទទួលបន្ទុកសិទ្ធិមនុស្ស។
លោកស្រី វ៉ាន-ហៀលី (Wan-Hea Lee) នាយិកាប្រចាំប្រទេសរបស់ស្ថាប័ននេះបានអះអាងថា លោកស្រីមិនបានដឹងពីវត្តមានរបស់ពួកគេទេ។
ការច្រៀងចម្រៀងរយៈពេលខ្លីនៅជិតទីលានប្រជាធិបតេយ្យនេះធ្វើឡើងបន្ទាប់ពីមានបទបញ្ជាពីក្រសួងមហាផ្ទៃកាលពីថ្ងៃទី៤ ខែមករាឲ្យព្យួរដោយពុំកំណត់ពេលនូវមាត្រាក្នុងរដ្ឋធម្មនុញស្តីពីសេរីភាពក្នុងការជួបជុំ និងឲ្យហាមឃាត់មិនឲ្យមានការប្រមូលផ្តុំគ្នានៅកន្លែងសាធារណៈចាប់ពី១០នាក់ឡើងទៅ។
រដ្ឋាភិបាលដឹកនាំដោយគណបក្សប្រជាជនកម្ពុជារបស់លោកនាយករដ្ឋមន្ត្រី ហ៊ុន សែន បានលើកហេតុផលថា ការព្យួរមាត្រារដ្ឋធម្មនុញ្ញស្តីពីសិទ្ធិសេរីភាពក្នុងការជួបជុំនេះគឺជារឿងចាំបាច់សម្រាប់ការឆ្លើយតបចំពោះការតវ៉ាទាមទារឲ្យលោក ហ៊ុន សែន ចុះចេញពីតំណែង និងការតវា៉របស់កម្មកររោងចក្រកាត់ដេរទាមទារសុំដំឡើងប្រាក់ខែខ្ពស់ជាងមុន។
អង្គការសហប្រជាជាតិ និងអង្គការសិទ្ធិមនុស្សមួយចំនួនបានថ្កោលទោសទង្វើរបស់គណបក្សកាន់អំណាច ដែលអ្នកជំនាញលើកឡើងថា មិនស្របតាមច្បាប់និងរដ្ឋធម្មនុញ្ញ។
ការបោសសម្អាតទីលានប្រជាធិបតេយ្យ និងតំបន់នៅជុំវិញនោះបានរងការរិះគន់ពីអង្គការអាដហុក ដែលបានចេញសេចក្តីថ្លែង
ការណ៍នាពេលក្រោយមកក្រោមចំណងជើងថា “ គ្មានកន្លែងសម្រាប់អនុវត្តសេរីភាពនៃការជួបជុំនៅសួនសេរីភាព”។
អង្គការសិទ្ធិមនុស្សនេះបានលើកឡើងថា “ នៅក្នុងប្រទេសកម្ពុជាសព្វថ្ងៃនេះ សូម្បីតែការជួបជុំគ្នាតូចបំផុតក៏មិនត្រូវបានអត់ឱនដែរ។ អង្គការអាដហុកសូមក្រើនរំឭកដល់រាជរដ្ឋាភិបាលថា សិទ្ធិក្នុងការជួបជុំគ្នាដោយសេរី ជាគោលការណ៍មូលដ្ឋាននៃលទ្ធិប្រជាធិបតេយ្យ ដែលមានចែងក្នុងច្បាប់កម្ពុជា និងច្បាប់អន្តរជាតិ”។
លោក រ័ត្ន ស៊្រាង មេបញ្ជាការកងរាជអាវុធហត្ថរាជធានីភ្នំពេញ បានអះអាងថា មន្ត្រីកងរាជអាវុធហត្ថគ្រាន់តែធ្វើតាមបទបញ្ជាតែប៉ុណ្ណោះ។
លោកបានមានប្រសាសន៍បន្តថា “ យើងគ្រាន់តែអនុវត្តទៅតាមបទបញ្ជារបស់សាលារាជធានីភ្នំពេញប៉ុណ្ណោះ”៕ សារុន