អ្នកស្រី យ៉ោម បុប្ផា ដែលជាសកម្មជនប្រឆាំងការបណ្តេញចេញ ដែលត្រូវបានដោះលែងឲ្យមានសេរីភាពកាលពីពេលថ្មីៗនេះ ហើយកាលពីម្សិលមិញមានជម្លោះក្នុងគ្រួសារមួយបានកើតឡើងដោយបើកចំហជាមួយស្វាមីរបស់អ្នកស្រី ហើយកាលពីម្សិលមិញនេះក្រុមអ្នកសារព័ត៌មានត្រូវបានតំណាងអង្គការក្រៅរដ្ឋាភិបាលមួយរូបអញ្ជើញទៅកាន់លំនៅដ្ឋានរបស់ពួកគាត់នៅក្នុងតំបន់បឹងកក់ ហើយតំណាងរូបនោះបានអះអាងថា ស្វាមីរបស់អ្នកស្រី បុប្ផា កំពុងព្យាយាមសម្លាប់អ្នកស្រី។
លោក សៀ ភារម្យ ប្រធានក្រុមការងារពិសេសសិទ្ធិលំនៅដ្ឋាន បានឲ្យដឹងថា លោកបានប្រកាសជូនដំណឹងដល់ប្រព័ន្ធផ្សព្វផ្សាយ ពីព្រោះលោកបារម្ភថា អ្នកស្រី បុប្ផា ដែលត្រូវបានដោះលែងចេញពីពន្ធនាគារកាលពីឆ្នាំមុន បន្ទាប់ពីជាប់ពន្ធនាគាររយៈពេលមួយឆ្នាំ នឹងធ្លាក់ក្នុងល្បិចកលដ៏កខ្វក់របស់អាជ្ញាធរមូលដ្ឋាន។ គួរបញ្ជាក់ថា អង្គការសិទ្ធិមនុស្សនានាបានលើកឡើងថា បទចោទប្រកាន់អ្នកស្រី យ៉ោម បុប្ផា មានគោលបំណងបញ្ចប់សកម្មនិយមរបស់អ្នកស្រី។
លោក ភារម្យ បានថ្លែងថា “លោក [លួស សុខន អាយុ៥២ឆ្នាំ] ដែលជាប្តីរបស់អ្នកស្រី បុប្ផា បានចាក់សោឲ្យអ្នកស្រីនៅក្នុងផ្ទះ ហើយគ្មានរណាម្នាក់ក្នុងសហគមន៍ដែលអាចឮអ្នកស្រី ស្រែក អាចចូលក្នុងផ្ទះនេះបានឡើយ”។ លោកបានថ្លែងថា “[លោក សុខន] មានភាពស្និទ្ធស្នាលខ្លាំងជាមួយអាជ្ញាធរមូលដ្ឋានហើយយើងបារម្ភថា នេះជាល្បិច កលមួយរបស់ពួកគេក្នុងការបង្កអំពើហិង្សានៅក្នុងសហគមន៍នេះ ដើម្បីអាចឲ្យពួកគេចាប់ខ្លួន និងបង្ក្រាបអ្នកតវ៉ានៅក្នុងពេលអនាគត”។
សារព័ត៌មានដែលគាំទ្ររដ្ឋាភិបាលចំនួនបី គឺសារព័ត៌មាន កម្ពុជាថ្មី កោះសន្តិភាព និងដើមអម្ពិល កាលពីម្សិលមិញក៏បានចេញផ្សាយរឿងរ៉ាវនេះដែរ ដោយអះអាងថា អ្នកស្រី បុប្ផា មានសាហាយស្មន់ជាមួយអ្នកភូមិបឹងកក់ម្នាក់ទៀត។ នៅពេលក្រុមអ្នកយកព័ត៌មានទៅដល់លំនៅដ្ឋានរបស់អ្នកស្រី បុប្ផា កាលពីម្សិលមិញ បន្ទាប់ពីលោក ភារម្យ បានប្រកាស អ្នកស្រី បុប្ផា កំពុងត្រូវវេជ្ជបណ្ឌិតម្នាក់ព្យាបាលស្នាមរលាត់លើកែងដៃ និងដៃរបស់អ្នកស្រី។
តំណាងក្រុមការងារសិទ្ធិលំនៅដ្ឋាន នឹងមិនអនុញ្ញាតឲ្យក្រុមអ្នកសារព័ត៌មានសម្ភាសអ្នកស្រី បុប្ផា នៅក្នុងផ្ទះរបស់អ្នកស្រីឡើយ ប៉ុន្តែនៅពេលទាក់ទងនាពេលក្រោយមក អ្នកស្រីបុប្ផា បានឲ្យដឹងថា ជម្លោះបង្ករបួសស្នាមជាមួយស្វាមីរបស់អ្នកស្រី បានចាប់ផ្តើម បន្ទាប់ពីអ្នកស្រីបានត្អូញត្អែរថា ស្វាមីរូបនេះមានបញ្ហាល្បែងស៊ីសង។
អ្នកស្រី បុប្ផា បានមានប្រសាសន៍ថា “គាត់បានប្រាប់ខ្ញុំថា គាត់ចង់លក់ផ្ទះ ហើយមិនត្រូវ រស់នៅក្នុងតំបន់បឹងកក់ទៀតទេ”។ អ្នកស្រី បុប្ផា បានច្រានចោលការចោទប្រកាន់នៅក្នុងទំព័រសារព័ត៌មានក្នុងស្រុក ថា អ្នកស្រីមានសាហាយស្មន់នោះ ដោយអះអាងថា សារព័ត៌មានទាំងនោះ “មានបំណងបរិហាកេរ្តិ៍” អ្នកស្រី ពីព្រោះពួកគេមានរបៀបវារៈនយោបាយមួយ។ អ្នកស្រីឲ្យដឹងទៀតថា “អ្នកទាំងនោះ មិនមែនជាអ្នកសារព័ត៌មានទេ ពួកគេគ្មានមនសិការទេ។ ពួកគេចេញផ្សាយរឿងគ្មានខ្លឹមសារនៃរឿងពិត”។
អ្នកស្រី យ៉ោម បុប្ផា បានអះអាងកាលពីយម់មិញថា អ្នកស្រីបានលែងលះស្វាមីរបស់ អ្នកស្រីកាលពីថ្ងៃទី២៣ ខែវិច្ឆិកា មួយថ្ងៃបន្ទាប់ពីអ្នកស្រីត្រូវបានដោះលែងឲ្យនៅក្រៅឃុំជាបណ្តោះអាសន្នពីពន្ធនាគារ។ ទោះជាយ៉ាងណា លោក សុខន បានបដិសេធថា អ្នកទាំងពីរមិនបានលែងលះគ្នាទេ ក៏ប៉ុន្តបានទទួលស្គាល់ថា លោកបានស្នាក់នៅជាមួយក្មួយប្រុសរបស់លោកអស់រយៈពេលយ៉ាងតិចមួយខែមកហើយ ហើយលោកចង់ឲ្យ អ្នកស្រី បុប្ផា ឈប់ពីសកម្មនិយមរបស់អ្នកស្រី។
លោកឲ្យដឹងទៀតថា “រយៈពេលបីឆ្នាំដែលពួកគេឈរស្រែកនៅមុខសាលារាជធានី ពួកគេមិនបានទទួលអ្វីសោះ។ វាគ្រប់គ្រាន់ហើយ។ ប្រសិនគាត់ [សកម្មជន ទេព វន្នី] ព្យាយាមនាំប្រពន្ធរបស់ខ្ញុំទៅតវ៉ាទៀត ខ្ញុំនឹងវាយគាត់ ហើយចាក់សោទុកនៅក្នុងផ្ទះគ្រប់ពេល”។ អ្នកស្រី បុប្ផា បានមានប្រសាសន៍កាលពីយប់មិញថា អ្នកស្រីមិនប្តឹងនគរបាលអំពីជម្លោះបង្ករបួសស្នាមនេះទេ៕ ប៊ុននី