កាសែត Jakarta Globe បានរាយការណ៍កាលពីម្សិលមិញថា ស្ត្រីខ្មែរអាយុ២៦ឆ្នាំម្នាក់អាចប្រឈមនឹងទោសប្រហារជីវិត បន្ទាប់ពីត្រូវបានចាប់ខ្លួននៅអាកាសយានដ្ឋានឥណ្ឌូណេស៊ីមួយកាលពីថ្ងៃពុធជាមួយគ្រឿងញៀនមេតំហ្វេតាមីនប្រហែល២០០ក្រាម។
កាសែត The Globe បានរាយការណ៍ថា ស្រ្តីដែលគ្រាន់តែប្រាប់ថាឈ្មោះ ស.ស. បានចូលក្នុងអាកាសយានដ្ឋានអន្តរជាតិបាន់ឌុង នៅចាវ៉ាខាងលិច តាមជើងហោះហើរផ្ទាល់មួយពីប្រទេសសិង្ហបុរី មុនពេលត្រូវបានឃាត់ខ្លួន និងត្រូវបានមន្ត្រីគយឆែកឆេរដែលបានរកឃើញសារធាតុខុសច្បាប់២០៥ក្រាមនៅក្នុងកញ្ចប់ថង់បា្លស្ទីកមួយនៅក្នុងទ្វារធំរបស់គាត់។
យោងតាមកាសែត The Globe បានឲ្យដឹងថា លោក បេណេឌីកទូស ចារ៉ូត ចាមីកា(Benediktus Jarot Chamika) ប្រធានការិយាល័យគយ បានអះអាងថា ស្រីដែលគេមិនបង្ហាញឈ្មោះរូបនេះ គឺជាអ្នករត់ពន្ធគ្រឿងញៀនសម្រាប់ក្រុមជួញដូរគ្រឿងញៀនអន្តរជាតិ ហើយថា ប្តីរបស់គាត់ ជាជនជាតិនីហ្សេរីយ៉ា អាចជាផ្នែកនៃក្រុមនេះដែរ។ កាសែត The Globe ក៏បានរាយការណ៍ដែរថាឮស្ត្រីរូបនេះមានគភ៌បីខែ។ អ្នកដែលត្រូវគេរកឃើញពិរុទ្ធភាពពីការនាំគ្រឿងចិត្តសកម្មចូលប្រទេសឥណ្ឌូណេស៊ី អាចប្រឈមនឹងការប្រហារជីវិត។
លោក មាស វីរិទ្ធ អគ្គលេខាធិការនៃអាជ្ញាធរជាតិកម្ចាត់គ្រឿងញៀន បានមានប្រសាសន៍កាលពីម្សិលមិញថា លោកមិនបានដឹងពីបញ្ហានេះទេ។ លោកបានមានប្រសាសន៍ថា “យើងមានកិច្ចសហការល្អជាមួយប្រទេសឥណ្ឌូណេស៊ី។ យើងគ្មានយុត្តាធិការនៅទីនេះទេ ក៏ប៉ុន្តែយើងនឹងប្រឹងប្រែងអស់ពីលទ្ធភាព ដើម្បីប្រមូលព័ត៌មាន និងជួយស្រ្តីរូបនេះ”៕ ប៊ុននី