កិច្ចខិតខំប្រឹងប្រែងបានបន្តទៅទៀត កាលពីម្សិលមិញ ដើម្បីដាក់សម្ពាធទៅលើក្រុមប្រឹក្សាសិទ្ធិមនុស្សដែលមានសមាជិកចំនួន៤៧របស់អង្គការសហប្រជាជាតិឲ្យប្រទេសកម្ពុជាទទួលខុសត្រូវ នៅពេលការធ្វើបច្ចុប្បន្នភាពរបស់ខ្លួនចំពោះក្រុមប្រឹក្សានេះ ត្រូវបានវាយតម្លៃនៅក្នុងទីក្រុងហ្សឺណែវនាថ្ងៃនេះ។
នៅក្នុងសេចក្តីថ្លែងការណ៍ដោយឡែក មជ្ឈមណ្ឌលសិទ្ធិមនុស្សកម្ពុជា និងអង្គការតាមឃ្លាំមើលសិទ្ធិមនុស្សបានលើកឡើងថា រដ្ឋសមាជិករបស់អង្គការសហប្រជាជាតិត្រូវតែថ្កោលទោសរដ្ឋាភិបាលរបស់លោក ហ៊ុន សែន ចំពោះការបង្ក្រាបបាតុកម្មដែលនាំឲ្យមានការបាត់បង់ជីវិត និងការដាក់ពន្ធនាគារសកម្មជន។
លោក ជូ ឡេត ដឺ រីវើរ៉ូ (Juliette de Rivero) នាយកអង្គការតាមឃ្លាំមើលសិទ្ធិមនុស្សនៅក្រុងហ្សឺណែវបានមានប្រសាសន៍ថា “ រដ្ឋាភិបាលរបស់លោក ហ៊ុន សែន រំលោភសិទ្ធិមនុស្សដោយសារការទប់ស្កាត់ដោយហិង្សាទៅលើបក្សប្រឆាំង សហជីពកម្មករ សកម្មជន និងអ្នកផ្សេងទៀតមិនឲ្យប្រមូលផ្តុំគ្នាទាមទារការផ្លាស់ប្តូរនយោបាយ”។
មជ្ឈមណ្ឌលសិទ្ធិមនុស្សកម្ពុជាសហការជាមួយអង្គការសិទ្ធិមនុស្សបីទៀតបានឲ្យដឹងថា “ ប្រទេសនានានៅឯក្រុមប្រឹក្សាសិទ្ធិមនុស្សគួរតែថ្កោលទោសការបង្ក្រាបដ៏ព្រៃផ្សៃនេះ និងទទូចឲ្យរដ្ឋាភិបាលកម្ពុជាធ្វើការកែទម្រង់ឲ្យបានប្រាកដប្រជា។ ស្ថានភាពសិទ្ធិមនុស្សនៅក្នុងប្រទេសនេះកាន់តែទ្រុឌទ្រោមគួរឲ្យកត់សម្គាល់ចាប់តំាងពីឆ្នាំ២០០៩មក” ដែលពេលនោះខ្លួនបានចូលរួមចុងក្រោយក្នុងដំណើរការពិនិត្យស្ថានភាពសិទ្ធិមនុស្សជាសាកល។
លោក អ៊ូ វីរៈ ប្រធានមជ្ឈមណ្ឌលសិទ្ធិមនុស្សកម្ពុជាបានមានប្រសាសន៍ថា ដើម្បីឲ្យដំណើរការមានប្រសិទ្ធភាព “ សហគមន៍អន្តរជាតិត្រូវតែអនុវត្តតាមអនុសាសន៍របស់ខ្លួន” ចំពោះកម្ពុជា៕ ប៊ុននី