នគរបាលបានឲ្យដឹងកាលពីម្សិលមិញថាសាកសពអ្នកបើកបររថយន្តតាក់ស៊ីម្នាក់ ត្រូវគេប្រទះឃើញនៅក្នុងខេត្តព្រះវិហារកាលពីថ្ងៃសុក្រ រយៈពេលមួយសប្តាហ៍ បន្ទាប់ពីគាត់បានចេញពីផ្ទះរបស់ខ្លួននៅក្នុងខេត្តកំពង់ធំដឹកអ្នកដំណើរជាបុរសចំនួនពីរនាក់ទៅកាន់ក្រុងសៀមរាប។
យោងតាមលោក ស៊ឹម សាយ អធិការនគរបាលស្រុក ឆែប នៅក្នុងខេត្តព្រះវិហារបានឲ្យដឹងថា ជនរងគ្រោះឈ្មោះ មុយ គីអាយុ៣២ឆ្នាំ បានចាកចេញពីផ្ទះកាលពីថ្ងៃទី២៤ ខែមករា ដើម្បីដឹកបុរសដែលគេមិនស្គាល់ឈ្មោះទៅកាន់ខេត្តសៀមរាប ហើយមិនដែលទាក់ទងមកគ្រួសារទៀតឡើយ។
សាកសពស្អុយរលួយរបស់គាត់ត្រូវបានអ្នកភូមិប្រទះឃើញនៅក្នុងតំបន់ព្រៃមួយក្នុងឃុំ ឆែប២ កាលពីថ្ងៃសុក្រ ដោយបាត់នាឡិកាដៃមួយគ្រឿង និងចិញ្ចៀនមួយវង់ដែលគាត់ពាក់ជាប្រចាំ ហើយមិនបានឃើញរថយន្តម៉ាកតូយ៉ូតា កាំរី របស់គាត់នៅទីនោះឡើយ។
លោក ស៊ឹម សាយ បានមានប្រសាសន៍ថាមូលហេតុនៃការស្លាប់នេះ មិនអាចសន្និដ្ឋានបានភ្លាមៗទេ។ លោកបានបន្ថែមថា នគរបាលកំពុងសន្មតថា ឧក្រិដ្ឋកម្មនេះចេញពីអំពើប្លន់ ហើយកំពុងតាមរកចាប់ខ្លួនអ្នកដំណើរពីរនាក់ជាប់ពាក់ព័ន្ធក្នុងឃាតកម្មនេះ។
លោកថ្លែងថា “យើងមិនបានរកឃើញអ្វីសោះនៅកន្លែងដែលយើងបានរកឃើញសាកសព បើទោះជាស្នាមកង់រថយន្តទៅដល់កន្លែងកើតហេតុនោះ បញ្ជាក់ថា រថយន្តមួយគ្រឿងបានបើកទៅទីនោះក៏ដោយ”៕ប៊ុននី