បុរសម្នាក់ត្រូវបានចាប់ខ្លួនកាលពីព្រឹកថ្ងៃសុក្របន្ទាប់ពីប្លន់រថយន្តកុងតឺន័រមួយគ្រឿងដឹកសម្លៀកបំពាក់ពេញបើកបរឆ្ពោះទៅកាន់កំពង់ផែស្វយ័តក្រុងព្រះសីហនុដើម្បីនាំចេញ ចំណែកជនសង្ស័យមួយចំនួនទៀតដែលមិនទាន់ស្គាល់អត្តសញ្ញាណនៅក្នុងអំពើប្លន់នោះដែរ នគរបាលកំពុងស្វែងរកចាប់ខ្លួននៅឡើយ។
លោក សំ សាមាន មេបញ្ជាការកងរាជអាវុធហត្ថស្រុកកំពង់សិលាបានមានប្រសាសន៍ថា កាលពីយប់ថ្ងៃព្រហស្បតិ៍ ជនសង្ស័យឈ្មោះ ជោគ សំអឿន អាយុ៣២ឆ្នាំនិងអ្នកសមគំនិតប្រហែលប្រាំនាក់ទៀតបានក្លែងជាមន្ត្រីនគរបាល ហើយបានដាក់ប៉ុស៌្តិត្រួតពិនិត្យដោយប្រើរថយន្តតូយ៉ូតាកាមរីពីរគ្រឿង ហើយបានឃាត់អ្នកបើកបររថយន្តឈ្មោះ ចុន សុជាតិ ខណៈគាត់កំពុងបើកតាមផ្លូវជាតិលេខ៤ក្នុងខេត្តព្រះសីហនុ។
លោក សាមាន មានប្រសាសន៍ថា “នៅពេលអ្នកបើករថយន្តកុងតឺន័របានឈប់រថយន្តជនសង្ស័យបានចាប់អ្នកបើកនោះរុញគាត់ចូលក្នុងរថយន្តរបស់ពួកគេ ហើយបានឡើងបើករថយន្តកុងតឺន័រដែលដឹកសម្លៀកបំពាក់ពេញបានចម្ងាយប្រហែលប្រាំគីឡូម៉ែត្រទៅតាមផ្លូវក្នុងតំបន់ជនបទ” ជាមួយរថយន្តកាមរីពីរគ្រឿងនោះ។
លោក សាមាន បានបន្ថែមថា ក្រុមអ្នកភូមិរស់នៅតាមផ្លូវក្នុងតំបន់ជនបទនោះមានការសង្ស័យ ហើយបានរាយការណ៍ទៅអាជ្ញាធរពីវត្តមានរថយន្តកុងតឺន័រនោះ ប៉ុន្តែនៅពេលកងរាជអាវុធហត្ថទៅដល់កន្លែងកើតហេតុ ជនសង្ស័យមួយចំនួនបានគេចខ្លួនតាមរថយន្តកាមរីពីរគ្រឿង ដោយនៅសល់តែឈ្មោះ សំអឿន ដែលកំពុងបើកបររថយន្តកុងតឺន័រ ត្រូវបានចោទប្រកាន់។
លោក សុខ រិទ្ធ មេបញ្ជាការអង្គភាពកងរាជអាវុធហត្ថលេខ៤០២ដែលទទួលខុសត្រូវមួយផ្នែកនៅផ្លូវជាតិលេខ៤បានមានប្រសាសន៍ថា ជនសង្ស័យដែលបានគេចខ្លួននោះមានកាំភ្លើងជាប់ខ្លួន។ លោកមានប្រសាសន៍ថា “យើងកំពុងស៊ើបអង្កេតដើម្បីស្វែងរកចាប់ខ្លួនជនសង្ស័យបន្ថែមទៀត”៕ សារុន