សំណើមួយត្រូវបានផ្ញើទៅគណៈកម្មាធិការសិទ្ធិមនុស្សរបស់រដ្ឋាភិបាល ក្រសួងមហាផ្ទៃ និងក្រសួងការបរទេសនិង សហប្រតិបត្តិការអន្តរជាតិ ដើម្បីស្វែងរកការបញ្ជាក់ច្បាស់អំស្ថានភាព និងកន្លែងស្ថិតនៅរបស់សេចក្តីព្រាងច្បាប់មួយដែលនឹងគ្រប់គ្រងសមាគម និងអង្គការក្រៅរដ្ឋាភិបាល។ គួរបញ្ជាក់ថា នេះគឺសំណើសុំពិនិត្យមើលកំណែថ្មីចុងក្រោយនៃច្បាប់នេះ មុនពេលត្រូវបានបញ្ជូនទៅរដ្ឋសភាជាតិដើម្បីអនុម័ត។
ដើម្បីដោយពន្យល់អំពីសំណើនេះ លោក សឿង សារឿន នាយកប្រតិបត្តិនៃគណៈកម្មាធិការសហប្រតិបត្តិការសម្រាប់កម្ពុជា ហៅកាត់ថា CCC បានលើកឡើងពីសុន្ទរកថាដែលលោក ម៉ក់ សម្បត្តិ អនុប្រធានគណៈការសិទ្ធិមនុស្ស បានថ្លែងនៅក្នុងទីក្រុងហ្សឺណែវកាលពីខែមុន ហើយលោកបានប្រាប់អង្គប្រជុំរបស់អង្គការសហប្រជាជាតិថា ច្បាប់នេះត្រូវបានអនុម័តជាឯកច្ឆន្ទដោយ គណៈរដ្ឋមន្ត្រី។
ទាក់ទងនឹងសុន្ទរកថារបស់លោក សម្បត្តិនៅក្នុងទីក្រុងហ្សឺណែវ លោក សារឿន បានមានប្រសាសន៍ថា “ យើងព្យាយាមទាក់ទងប្រភពផ្សេងៗគ្នា រាប់ទាំងការអំពាវនាវដល់ក្រសួងមហាផ្ទៃ ក្រសួងការបរទេស និងស្ថាប័នផ្សេងទៀត ប៉ុន្តែព័ត៌មាននៅមិនច្បាស់នៅឡើយទេ”។
លោកបានមានប្រសាសន៍បន្តថា “អ្នកខ្លះបានលើកឡើងថា វានៅទីស្តីការគណៈរដ្ឋមន្ត្រី ប៉ុន្តែភាគច្រើនបានលើកឡើងថា ពួកគេមិនដឹងច្បាស់ ឬមិនដឹងថា សេចក្តីព្រាងច្បាប់នេះនៅទីណាទេ ពេលនេះ”។
នៅក្នុងលិខិតមួយច្បាប់ផ្ញើជូនលោក សម្បត្តិ លោក ស ខេង រដ្ឋមន្ត្រីក្រសួងមហាផ្ទៃ និងលោក ហោ ណំាហុង រដ្ឋមន្ត្រីក្រសួងការបរទេស គណៈកម្មាធិការសហប្រតិបត្តិការសម្រាប់កម្ពុជា បានលើកឡើងអំពីសុន្ទរថាមួយដែលថ្ងៃទី២៤ ខែធ្នូឆ្នាំ២០១១ដោយដែលលោកនាយករដ្ឋមន្ត្រី ហ៊ុន សែន បានថ្លែង និងសន្យាថានឹងជំរុញឲ្យមានការផ្សព្វ
សាយសេចក្តីសម្រេចឲ្យប្រើប្រាស់នូវសេចក្តីព្រាងច្បាប់ឲ្យបានទូលំទូលាយ ដោយសហការជាមួយអង្គការក្រៅរដ្ឋាភិបាល។ លិខិតដែលចុះហត្ថលេខារួមគ្នាដោយអង្គការត្រួតពិនិត្យផ្សេងទៀត មាន អង្គការវេទិកាក្រៅរដ្ឋាភិបាល និងគណៈកម្មាធិការសកម្មភាពសិទ្ធិមនុស្សកម្ពុជា មានខ្លឹមសារថា “យើងសុំស្នើឲ្យមានកិច្ចប្រជុំមួយ…និងសូមឲ្យឯកឧត្តមសម្របសម្រួល និងសូមផ្តល់ឲ្យយើងខ្ញុំនូវសេចក្តីព្រាងច្បាប់បច្ចុប្បន្ន…ដើម្បីសិក្សា មុនពេលត្រូវបានអនុម័ត និងដើម្បីពិភាក្សា បញ្ចេញមតិ និងផ្តល់យោបល់ដល់រដ្ឋាភិបាលកម្ពុជា”។
ពេលសុំឲ្យបញ្ជាក់ច្បាស់អំពីសេចក្តីអត្ថាធិប្បាយរបស់លោកនៅក្រុងហ្សឺណែវ ទាក់ទងនឹងច្បាប់ស្តីពីអង្គការក្រៅរដ្ឋាភិបាល លោក សម្បត្តិ បានបដិសេធមិនធ្វើអត្ថាធិប្បាយ និងបានបង្វែរសំណួរទៅលោក មាស សារិម អគ្គនាយករងអគ្គនាយកដ្ឋានក្រសួងមហាផ្ទៃ។
លោក សារិម បានមានប្រសាសន៍ថា “កាលបរិច្ឆេទនៃកិច្ចប្រជុំមួយជាមួយអង្គការក្រៅរដ្ឋាភិបាល ឬការបញ្ជូនសេចក្តីព្រាងច្បាប់ទៅរដ្ឋសភា នៅមិនទាន់កំណត់នៅឡើយទេ”។ លោកបានមានប្រសាសន៍បន្តថា “យើងកំពុងរង់ចាំបទបញ្ជាឲ្យធ្វើកិច្ចការបន្ទាប់”។ លោកបានបន្ថែមថា ច្បាប់នេះទំនងជានឹងចូលជាធរមានក្នុងរយៈពេលប្រាំមួយខែដំបូងនៃឆ្នាំនេះ។
លោក ប៉ុល លឹម រដ្ឋលេខាធិការនៃក្រសួងមហាផ្ទៃបានលើកឡើងថា គណៈរដ្ឋមន្ត្រីបានចុះហត្ថលេខាលើសេចក្តីព្រាងច្បាប់ស្តីពីអង្គការក្រៅរដ្ឋាភិបាលកាលពីឆ្នាំទៅ មុនការបោះឆ្នោតកាលពីខែកក្កដា។ លោក ប៉ុល លឹម បានអះអាងថា “ យើងនៅតែបើកចំហសម្រាប់បញ្ចេញយោបល់” ប៉ុន្តែ លោកបានបដិសេធមិនឲ្យដឹងថា តើពេលណាទើបអាចមានការបញ្ចេញយោបល់អំពីច្បាប់នេះ។
សេចក្តីព្រាងច្បាប់ដែលមាន១១ចំពូកនិងមាន៥៨មាត្រានេះ នឹងដាក់បញ្ចូលនូវលក្ខខណ្ឌថ្មីសម្រាប់ការបង្កើត និងការចុះបញ្ជីឈ្មោះអង្គការក្រៅរដ្ឋាភិបាល និងតម្រូវឲ្យអង្គការទាំងនោះធ្វើរបាយការណ៍ប្រចាំឆ្នាំស្តីពីសកម្មភាពនិងហិរញ្ញវត្ថុស្របតាមបទដ្ឋានផ្អែក។
អង្គការក្រៅរដ្ឋាភិបាល ដែលមានប្រវត្តិយូរអង្វែងក្នុងការចូលរួមក្នុងដំណើរការអភិវឌ្ឍន៍ក្នុងវិស័យសង្គម សុខាភិបាល អប់រំ និងហេដ្ឋារចនាសម្ព័ន្ធនៅក្នុងប្រទេសកម្ពុជា ព្រួយបារម្ភថា ច្បាប់នេះនឹងត្រូវបានប្រើប្រាស់សម្រាប់ផ្តោតគោលដៅទៅលើអង្គការដែលរដ្ឋាភិបាលដឹងថាជាអ្នករិះគន់គណបក្សប្រជាជនកម្ពុជា៕ ប៊ុននី