27 C
Phnom Penh

បុគ្គលិក​​​មន្ទីរ​​​ពេទ្យ​​​សម្ភព​​​ក្រុង​​​តវ៉ា​​​ប្រឆាំង​​​កិច្ច​​​ព្រមព្រៀង​​​​​​ដោះ​​​ដូរ​​​​​​ទីតាំង​​​

ដោយ ឌឹ ខេមបូឌា ដេលី

បទវិភាគ

កាល​​​ពីម្សិលមិញ​​​ បុគ្គលិក​​​មន្ទីរពេទ្យ​​​បង្អែក​​​​​​រាជធានី​​​ភ្នំពេញ​​​ដែល​​​គេ​​​ស្គាល់​​​ថា មន្ទីរ​​​ពេទ្យ​​​សម្ភព​​​ក្រុង ​​​បាន​​​នាំ​​​គ្នា​​​តវ៉ា​​​ប្រឆាំង​​​នឹង​​​​​​មន្ទីរ​​​សុខា​​​ភិបាល​​​រាជធានី​​​ ដោយ​​​ចោទ​​​ប្រកាន់​​​ថា មន្ទីរ​​​នេះ​​​បាន​​​ប្រគល់​​​​​​អគារ​​​មន្ទីរពេទ្យ​​​របស់​​​ពួក​​​គាត់​​​​​​ឲ្យ​​​ទៅ​​​ក្រុមហ៊ុន​​​ឯកជន​​​មួយ​​​​​​នៅ​​​ក្នុង​​​​​​កិច្ច​​​ព្រមព្រៀង​​​​​​ “ដោះ​​​ដូរ​​​” សម្ងាត់មួយ​​​ទៀត​​​ពាក់ព័ន្ធ​​​នឹង​​​ទ្រព្យសម្បត្តិ​​​រដ្ឋ​​​។​​​

បុគ្គលិក​​​មន្ទីរពេទ្យ​​​បង្អែក​​​រាជធានីភ្នំពេញ​​​​​​ជិត​​​១០០​​​នាក់​​​នាំគ្នា​​​ចេញ​​​មក​​​តវ៉ា​​​កាលពី​​​ម្សិលមិញ​​​ ប្រឆាំង​​​នឹង​​​ការ​​​​​​​​​រើ​​​ចេញ​​​ទៅ​​​អគារ​​​ថ្មីនៅ​​​ក្បែរ​​​នោះ​​​ ដែល​​​ពួក​​​គាត់​​​ជឿថា ជា​​​ផ្នែក​​​នៃ​​​កិច្ច​​​ព្រម​​​ព្រៀង​​​​​​ដោះ​​​ដូរ​​​ដី​​​មន្ទីរពេទ្យ​​​នេះ​​​ជាមួយ​​​ក្រុម​​​ហ៊ុន​​​ឯក​​​ជន​​​។ សីុវ  ចាន់​ណា​
បុគ្គលិក​​​មន្ទីរពេទ្យ​​​បង្អែក​​​រាជធានីភ្នំពេញ​​​​​​ជិត​​​១០០​​​នាក់​​​នាំគ្នា​​​ចេញ​​​មក​​​តវ៉ា​​​កាលពី​​​ម្សិលមិញ​​​ ប្រឆាំង​​​នឹង​​​ការ​​​​​​​​​រើ​​​ចេញ​​​ទៅ​​​អគារ​​​ថ្មីនៅ​​​ក្បែរ​​​នោះ​​​ ដែល​​​ពួក​​​គាត់​​​ជឿថា ជា​​​ផ្នែក​​​នៃ​​​កិច្ច​​​ព្រម​​​ព្រៀង​​​​​​ដោះ​​​ដូរ​​​ដី​​​មន្ទីរពេទ្យ​​​នេះ​​​ជាមួយ​​​ក្រុម​​​ហ៊ុន​​​ឯក​​​ជន​​​។ ស៊ីវ  ចាន់​ណា​

ក្រុម​​​គ្រូពេទ្យ​​​​​​ប្រហែល​​​៨០​​​នាក់​​​បាន​​​ប្រមូល​​​ផ្ដុំ​​​គ្នា​​​នៅ​​​ខាង​​​ក្រៅ​​​មន្ទីរពេទ្យ​​​ ដែល​​​ជា​​​ធម្មតា​​​មាន​​​សភាព​​​អ៊ូអរ​​​ស្ថិត​​​ក្នុង​​​​​​ខណ្ឌ​​​៧មករា​​​ កាល​​​ពី​​​ម្សិលមិញ​​​ ដោយ​​​​​​លើក​​​បដា​​​ដែល​​​មាន​​​សរសេរ​​​ពាក្យ​​​ស្លោក​​​ដូចជា​​​ “ចូលរួម​​​បំបាត់​​​អំពើ​​​ពុក​​​រលួយ​​​ គ្មាន​​​ការ​លក់​​​ដូរ​​​ និង​​​​​​រុះរើ​​​” ជា​​​ដើម​​​។ ការតវ៉ា​​​នេះ​​​បាន​​​ផ្ទុះ​​​ឡើង​​​នៅ​​​ពេល​​​វេជ្ជ​​​បណ្ឌិត​​​ នេត្រ​​​ សុវីរៈ​​​ ប្រធាន​​​មន្ទីរពេទ្យ​​​នេះ​​​បាន​​​ជួប​​​ជាមួយ​​​លោក​​​ សុខ សុឃុន​​​ ប្រធាន​​​មន្ទីរ​​​សុខាភិបាល​​​​​​រាជធានី ដើម្បី​​​ពិភាក្សា​​​គ្នា​​​​​​អំពី​​​បទ​​​បញ្ជា​​​សម្រាប់​​​​​​ឲ្យ​​​បុគ្គលិក​​​មន្ទីរពេទ្យ​​​នេះ​​​រើ​​​ចេញ​​​ទៅ​​​អគារ​​​មួយ​​​ផ្សេង​​​ទៀត​​​ ដែល​​​តូច​​​ជាង​​​នេះ​​​ ស្ថិត​​​នៅ​​​ចម្ងាយ​​​ពី​​​គ្នា​​​​​​ប្រហែល​​​៣០០​​​ម៉ែត្រ។

ពេល​​​ទាក់​​​ទង​​​​​​បាន​​​​​​កាលពីម្សិលមិញ​​​ លោក​​​​​​ សុខ សុឃុន​​​ បាន​​​មានប្រសាសន៍​​​ថា មន្ទីរ​​​ពេទ្យ​​​នេះ​​​ “មិន​​​គ្រប់​​​ស្ដង់ដារ​​​ទេ​​​” ហើយ​​​ថា មន្ទីរ​​​សុខាភិបាល​​​រាជធានី​​​មិន​​​ចង់​​​​​​ជួសជុល​​​​​​ថែ​​​ទាំ​​​វា​​​ទេ​​​ ហើយ​​​ក៏​​​បាន​​​ដោះដូរ​​​វា​​​​​​ឲ្យ​​​ទៅ​​​ក្រុមហ៊ុន​​​ឯកជន​​​មួយ​​​ដែល​​​លោក​​​ “មិន​​​ចាំ​​​ឈ្មោះ​​​”។ លោក​​​បាន​​​មាន​​​ប្រសាសន៍​​​បន្ថែម​​​ទៀត​​​ថា “ពី​​​រ​​​ឬ​​​បី​​​ឆ្នាំ​​​មុន​​​ យើង​​​បាន​​​ធ្វើ​​​កិច្ច​​​ព្រម​​​ព្រៀង​​​​​​ជាមួយ​​​ក្រុមហ៊ុន​​​ឯកជន​​​មួយឲ្យ​​​គ្រប់​​​គ្រង​​​អគារ​​​មន្ទីរពេទ្យ​​​នេះ​​​។ ក្រុមហ៊ុន​​​បាន​​​សាង​​​សង់​​​​​​អគារ​​​ជំនួសមួយ​​​​​​សម្រាប់​​​មន្ទីរពេទ្យ​​​​​​រើ​​​​​​ចូល​​​​​​ទៅ​​​ ហើយ​​​ពេល​​​នេះ​​​​​​គឺ​​​ដល់​​​ពេល​​​ដែល​​​​​​ត្រូ​​​វ​​​រើ​​​ចេញ​​​ហើយ​​​។ ហេតុអ្វី​​​បាន​​​ជា​​​ពួក​​​គាត់​​​ធ្វើ​​​​​​ការ​​​តវ៉ា?”។

វេជ្ជបណ្ឌិត​​​ នេត្រ សុវីរៈ ប្រធាន​​​មន្ទីរ​​​ពេទ្យ​​​នេះ​​​បានបដិសេធ​​​​​​មិន​​​ឆ្លើយ​​​បំភ្លឺ​​​ជុំ​​​វិញ​​​​​​ការ​​​​​​តវ៉ា​​ដោយ​​​បុគ្គលិក​​​របស់​​​លោក​​​​​​ឬ​​​អំពី​​​​​​ការ​​​ដោះ​​​ដូរ​​​មន្ទីរពេទ្យ​​​រដ្ឋ​​​នេះទេ​​​​​​។ ទោះជាយ៉ាង​​​ណា អ្នក​​​តវ៉ា​​​ទាំង​​​នេះ​​​ ដែល​​​​​​រួម​​​មាន​​​ទាំង​​​វេជ្ជបណ្ឌិត​​​ ហុង​​​ លីគួង​​​ អនុ​​​ប្រធាន​​​​​​​​​មន្ទីរពេទ្យ​​​នេះ​​​ដែរ​​​នោះ​​​ បាន​​​លើក​​​ឡើង​ថា អគារ​​​​​​ថ្មី​​​មិន​​​គ្រប់គ្រាន់​​​​​​ទេ​​​។​​​ លោក​​​បាន​​​មាន​​​ប្រសាសន៍​​​ថា “យើង​​​​​​ជួយ​​​សម្រាល​​​ទារក​​​​​​ជាង​​​២០០​​​នាក់ក្នុង​​​មួយ​​​​​​ខែ​​​នៅ​​​ក្នុង​​​មន្ទីរពេទ្យ​​នេះ​​​។​​​ នៅ​​​ក្នុង​​​អគារ​​​ថ្មី​​​គ្មាន​​​ទីធ្លា​​​គ្រប់​​​គ្រាន់​​​សម្រាប់​​​​​​សម្រាល​​​ទារក​​​ទេ​​​”។  លោក​​​ថ្លែង​​​បន្ត​​​ទៀត​​​​​​ថា “ពួកគេ​​​បាន​​​ប្រាប់​​​​​​យើង​​​ថា មន្ទីរពេទ្យ​​​នេះ​​​​​​គ្រោះថ្នាក់​​​​​​ណាស់​​​ ហើយ​​​ថា ពួក​​​គេ​​​ចង់​​​ជួស​​​ជុល​​​វា ប៉ុន្តែ​​​ពួក​​​គេ​​​មិន​​​បាន​​​ប្រាប់​​​យើង​​​ថា តើ​​​យើង​​​នឹង​​​ត្រូវ​​​រើ​​​ចូល​​​មក​​​វិញ​​​ [នៅ​​​មន្ទីរពេទ្យ​​​បង្អែក​​​នេះ] ឬក៏​​​យ៉ាង​​​ណា​​​ទេ​​​។​​ យើង​​​មិន​​​ដឹង​​​ឡើយ”។​​​

វេជ្ជបណ្ឌិត​​​វ័យ​​​៥៦​​​ឆ្នាំ​​​មួយរូប ​​​​​​ដែល​​​ប្រាប់​​​​​​ឈ្មោះ​​​របស់​​​​​​ខ្លួន​​​ត្រឹម​​​តែ​​​ ម៉ាលី ដោយ​​​សារ​​​តែ​​​ភ័យ​​​ខ្លាច​​​ការ​​​ធ្វើ​​​​​​ទុក្ខ​​​បុកម្នេញ បាន​​​លើកឡើង​​​​​​សំដៅ​​​ដល់​​​ករណី​​​ស្រដៀង​​​គ្នា​​​មួយ​​​​​​កាលពី​​​ឆ្នាំ​​​២០១១ថា បុគ្គលិក​​​មន្ទីរពេទ្យ​​​មិន​​​អាច​​​ជឿទុកចិត្ត​​​លើ​​​មន្ទីរ​​​សុខាភិបាល​​​​​​បាន​​​ទេ​​​។​​​ កាលពី​​​ខែ​​​មិថុនា ឆ្នាំ​​​នោះ​​​ លោក​​​ កែប​​​ ជុតិមា អតីត​​​អភិបាល​​​រាជធានីភ្នំពេញ​​​​​​បាន​​​បញ្ជា​​​ឲ្យ​​​បិទ​​​មន្ទីរពេទ្យ​​​បង្អែក​​​​​​ខណ្ឌ​​​ចំការ​​​មន ដែល​​​​​​ស្ថិត​​​នៅ​​​​​​កែង​​​មហាវិថី​​​ព្រះ​​​នរោត្តម​​​ និងផ្លូវ​​​លេខ​​​២៩៤​​​ រយៈ​​​ពេល​​​បី​​​ខែ​​​ ដើម្បី​​​ជួស​​​ជុល​​​។​​​

បច្ចុប្បន្ន​​​មន្ទីរពេទ្យ​​​ក្នុង​​​ខណ្ឌ​​​ចំការ​​​មន​​​នេះ​​​ត្រូវ​​​គេ​​​ទុក​​​ចោល​​​​​​ដោយ​​​គ្រាន់​​​តែ​​​​​​វ៉ៃ​​​សង្កសី​​​​​​បិទ​​​ពី​​​​​​ក្រៅ ហើយ​​​យោងតាម​​​​​​វេជ្ជបណ្ឌិត​​​ ម៉ា​​​លី បានឲ្យ​​​ដឹង​​​ថា បុគ្គលិក​​​ប្រហែល​​​២០​​​នាក់​​​នៅ​​​មន្ទីរពេទ្យ​​​នេះ​​​​​​បាន​​​ចូល​​​បម្រើ​​​ការ​​​ងារ​​នៅ​​​មន្ទីរពេទ្យ​​​បង្អែក​​​រាជធានី​​​ភ្នំពេញ​​​។​

វេជ្ជបណ្ឌិត ម៉ាលី បាន​​​មាន​​​ប្រសាសន៍​​​ថា “​​​គេ​​​បាន​​​ប្រាប់​​​ពួក​​​យើង​​​ឲ្យ​​​សម្រាក​​​រយៈ​​​ពេល​​​​​​បីខែ​​​ [ពីមន្ទីរពេទ្យ​​​បង្អែក​​​ខណ្ឌ​​​ចំការ​​​មន​​​]។​​​ នោះ​​​ជារឿង​​​​​​កាលពី​​​បី​​​ឆ្នាំ​​​មុន​​​។​​​ តើ​​​ឲ្យ​​​យើង​​​​​​ជឿអ្វី​​​ដែល​​​ពួក​​​គេ​​​ប្រាប់យើង​​​​​​ម៉េច​​​នឹង​​​បាន​​​ទៅ​​? យើង​​​ជឿ​​​ថា ពួក​​​គេ​​​បាន​​​​​​ធ្វើ​​​កិច្ចព្រម​​​ព្រៀង​​​ជាមួយ​​​ក្រុមហ៊ុន​​​មួយ​​​របស់​​​វៀតណាម​​​ ហើយ​​​​​​វា​​​ជា​​​រឿង​​​ផល​​​​​​ប្រយោជន៍​​​។​​​ អគារ​​​ថ្មី​​​នេះ​​​​​​ទំនង​​​ជា​​​​​​​​​​​​មិន​​​មែន​​​​​​មន្ទីរពេទ្យ​​​ទេ”។ នៅ​​​ឯអគារ​​​ថ្មី​​​នេះ​​​កាលពី​​​ម្សិលមិញ ច្រក​​​​​​ជណ្ដើរ​​​យន្ត​​​ ដែល​​​មិន​​​ទាន់​​​មាន​​​ទ្វារ​​​បិទ​​​បាំង​​​នៅ​​​ឡើយ កម្មករ​​​សំណង់​​​កំពុង​​​​​​លាប​​​ម្នាង​​​សិលា​​​​​​ និង​​​លាប​​​ថ្នាំ​​​​​​នៅ​​​ឡើយ ហើយ​​​បុរស​​​ម្នាក់​​​​​​ដេក​​​លក់​​​នៅ​​​​​​ខាង​​​ក្រោយ​​​អ្វី​​​ដែល​​​ទំនង​​​ជា​​​តុ​​​ទទួល​​​ភ្ញៀវ។ នៅ​​​ក្នុង​​​អគារ​​​​​​ថ្មី​​​កម្ពស់​​​ប្រាំ​​​ជាន់​​​នេះ​​​គ្មាន​​​បន្ទប់​​​ណាមួយ​​​មាន​​​គ្រឿង​​​បរិក្ខា​​​សម្រាប់​​​ត្រៀម​​​ទទួល​​​ព្យាបាល​​​អ្នកជំងឺ​​​ទេ​​​។

ទោះ​​​បី​​​ជា​​​បែប​​​នេះ​​​ក្ដី​​​ ក៏​​​សេចក្ដី​​​ប្រកាស​​​លាយ​​​លក្ខណ៍​​​អក្សរ​​​​​​មួយ​​​ ដែល​​​មាន​​​ឈ្មោះ​​​​​​របស់​​​​​​លោក​​​ សុខ សុឃុន​​​ ប្រធានមន្ទីរ​​​​​​សុខា​​​ភិ​​​បាល​​​រាជធានី ត្រូវ​​​បាន​​​​​​ចែក​​​ចាយ​​​ឲ្យ​​​ទៅ​​​អ្នក​​​តវ៉ា​​​ទាំង​​​នេះ​​​កាលពី​​​ម្សិលមិញ​​​​​​ ដោយ​​​ព្រមាន​​​​​​ពួក​​​គេ​​​ថា ប្រសិន​​​បើ​​​បុគ្គលិក​​​ផ្នែក​​​រដ្ឋបាល​​​​​​និង​​​​​​បុគ្គលិក​​​ផ្នែក​​​គណនេយ្យ​​​មិន​​​ចាប់​​​ផ្ដើម​​​រើ​​​​​​ចេញ​​​ភ្លាមៗ​​​​​​ទៅ​​​អគារ​​​ថ្មី​​​ទេ​​​នោះ​​​ វេជ្ជបណ្ឌិត​​​ នេត្រ​​​ សុវីរៈ​​​ ប្រធាន​​​មន្ទីរពេទ្យ​​​នេះ​​​​​​នឹង​​​ត្រូវ​​​បណ្ដេញ​​​​​​ចោល​​​។

បុគ្គលិក​​​មន្ទីរពេទ្យ​​​នេះ​​​ មិន​​​ព្រម​​​រើ​​​ចេញ​​​ទេ​​​​​​កាលពី​​​ម្សិលមិញ​​​ ហើយ​​​បាន​​​លើ​​​កឡើង​​​ថា ពួក​​​គាត់​​​នឹង​​​បន្ត​​​​​​ធ្វើ​​​ការ​​​តវ៉ា​​​​​​ត​​​ទៅ​​​ទៀត​​​​​​រហូត​​​ទាល់តែ​​​​​​មន្ទីរ​​​សុខាភិបាល​​​​​​រាជធានី​​​យល់​​​ព្រម​​​​​​សាង​​​​​​សង់​​​​​​អគារ​​​ពីរ​​​បន្ថែម​​​ទៀត​​​​​​នៅ​​​​​​ទីតាំង​​​​​​ថ្មី​​​នេះ​​​។ បុគ្គលិក​​​ពេទ្យ​​​ជាច្រើន​​​ ដែល​​​ធ្វើ​​​​​​ការ​​​តវ៉ា​​​​​​កាល​​​ពី​​​ម្សិលមិញ​​​ ក៏​​​បាន​​​​​​លើក​​​ឡើង​​​សំដៅ​​​ដល់​​​បទ​​​បញ្ជា​​​ឆ្នាំ​​​២០០៧​​​របស់​​​លោក​​​នាយក​​​រដ្ឋ​​​មន្ត្រី​​​ ហ៊ុន​​​ សែន​​​ ដែល​​​បញ្ជាក់​​​ថា ​​​ការ​​​​​​ដោះ​​​ដូរ​​​​​​ដី​​​ និង​​​ទ្រព្យ​​​សម្បត្តិ​​​រដ្ឋ​​​មិន​​​ត្រូវ​​​ពាក់ព័ន្ធ​​​​​​នឹង​​​មន្ទីរពេទ្យ​​​និងសាលា​​​រៀន​​​ឡើយ​​​។

លោក​​​ ហ៊ុន​​​ សែន​​​ បាន​​​លើក​​​ឡើង​​​​​​នៅ​​​ក្នុង​​​សុន្ទរកថា ជា​​​សាធារណៈ​​​នៅពេល​​​នោះ​​​ថា “សូម​​​ឯកឧត្តម​​​​​​ព្យាយាម​​​រក្សា​​​ទុក​​​​​​ទីតាំង​​​ចាស់​​​​​​នៃ​​​សាលា​​​រៀន​​​ និង​​​មន្ទីរពេទ្យ​​​គ្រប់​​​កម្រិត​​​ទាំង​​​អស់​​​…។​​​ មិន​​​ត្រូវ​​​ដោះ​​​ដូរ​​​ទីតាំង​​​​​​ទាំង​​​នេះ​​​​​​ដាច់​​​ខាត”។

លោក​​​ ផៃ ស៊ីផាន​​​ អ្នកនាំពាក្យ​​​ទីស្ដីការ​​​គណៈរដ្ឋ​​​មន្ត្រី​​​បាន​​​មានប្រសាសន៍​​​ថា លោក​​​​​​មិន​​​បាន​​​ដឹង​​​ពីកិច្ច​​​ព្រម​​​ព្រៀង​​​ដោះ​​​ដូរ​​​ដី​​​មន្ទីរ​​​ពេទ្យ​​​ឬ​​​ការ​​​តវ៉ា​​​របស់​​​ក្រុម​​​គ្រូពេទ្យ​​​នេះ​​​ទេ​​​ ហើយ​​​បាន​​​មាន​​​ប្រសាសន៍​​​បញ្ជាក់​​​ថា  សារា​​​ចរ​​​​​​​​​ណែ​​​នាំ​​​របស់​​​លោក​​​ ហ៊ុន​​​ សែន​​​ ហាម​​​ប្រាម​​​​​​មិន​​​ឲ្យ​​​មាន​​​កិច្ច​​​ព្រមព្រៀង​​​​​​បែប​​​នេះ​​​ជាមួយ​​​ក្រុម​​​ហ៊ុន​​​បែប​​​នេះ​​​ នៅ​​​តែ​​​មាន​​​ប្រសិទ្ធិ​​​ភាព​​​នៅ​​​ឡើយ​​​។ លោក​​​ ផៃ ស៊ីផាន​​​ បាន​​​មាន​​​ប្រសាសន៍​​​អំពី​​​​​​បទ​​​បញ្ជា​​​ឆ្នាំ​​​២០០៧​​​ របស់​​​លោក​​​នាយក​​​រដ្ឋ​​​មន្ត្រី​​​ថា “ប្រសិន​​​បើ​​​ [សម្ដេច​​​ ហ៊ុន សែន] មាន​​​ប្រសាសន៍​​​ថាម៉េច​​​ គឺ​​​​​​អ៊ីចឹង​​​​​​ហើយ​​​”។ ប៉ុន្តែ​​​លោក​​​ ផៃ​​​ ស៊ីផាន បាន​​​ព្រមាន​​​​​​ថា “វា​​​​​​អាស្រ័យ​​​លើ​​​ថា តើ​​​កិច្ច​​​ព្រមព្រៀង​​ [ដោះ​​​ដូរ​​​មន្ទីរពេទ្យ​​​​​​ជាមួយ​​​] ក្រុមហ៊ុនធ្វើ​​​ឡើង​​​​​​មុន​​​ ឬ​​​ក្រោយ​​​ [សម្ដេច​​​ ហ៊ុន សែន] មាន​​​ប្រសាសន៍​​​​​​អំពី​​​វា​​​”៕ សុខុម​​​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស