កាលពីម្សិលមិញ នគរបាលខេត្តក្រចេះបានរុះរើតង់ស្នាក់នៅបណ្ដោះអាសន្នរបស់អ្នកភូមិប្រហែល៣០០គ្រួសារ ដែលជាប់ចោទថា បានរស់នៅលើដីរបស់រដ្ឋស្ថិតនៅក្នុងតំបន់អភិរក្សមួយ គឺមានរយៈពេលពីរសប្ដាហ៍បន្ទាប់ពីពួកគេបានបង្ខំឲ្យគ្រួសារជាច្រើនក្នុងចំណោមគ្រួសារដដែលនេះចេញពីតំបន់នេះ។
គ្រួសារមួយចំនួននិយាយថា ពួកគាត់បានរស់នៅលើដីនេះរយៈពេលជាច្រើនឆ្នាំមកហើយ ប៉ុន្តែពួកគាត់មិនមានប័ណ្ណកម្មសិទ្ធិដីទេ ហើយបានបិទផ្លូវជាតិលេខ៧៦អស់រយៈពេលជាច្រើនម៉ោងកាលពីថ្ងៃទី១២ខែកុម្ភៈបន្ទាប់ពីនគរបាលបានដុតបំផ្លាញផ្ទះរបស់ពួកគាត់អស់ជាច្រើនខ្នង។ ប៉ុន្តែនៅពេលដែលគ្រួសារទាំងនោះវិលត្រឡប់មកវិញ នគរបាលក៏បានត្រឡប់មកចាត់វិធានការម្តងទៀតដែរ។ លោក កែវ ជា មេបញ្ជាការកងរាជអាវុធហត្ថខេត្តក្រចេះបានមានប្រសាសន៍ថា “ យើង បានប្រើកម្លាំងនគរបាល និងកងរាជអាវុធហត្ថជាង៥០នាក់ទៅរុះរើតង់ស្នាក់នៅរបស់អ្នកភូមិ ពីព្រោះពួកគាត់បានត្រឡប់មករស់នៅទីនេះវិញ បន្ទាប់ពីយើងបានបណ្ដេញពួកគាត់ចេញប្រហែលពីរសប្ដាហ៍មុន”។ លោកបានបន្ថែមថា “ យើងបានរុះរើតង់របស់អ្នកភូមិទាំងនោះ ពីព្រោះពួកគាត់មករស់នៅលើដីរបស់រដ្ឋ ហើយនេះជាលើកទី២ហើយដែលយើងបានរុះរើតង់ដោយសារពួកគាត់បានត្រឡប់មកវិញ”។ លោកបានមានប្រសាសន៍ថា“ យើងបានជូនដំណឹងជាច្រើនលើកច្រើនសាមកហើយឲ្យពួកគាត់ចាកចេញពីដីនេះ និងកុំរានដីព្រៃរបស់រដ្ឋទៀត ពីព្រោះនេះជាតំបន់អភិរក្ស ប៉ុន្តែ ពួកគាត់មិនស្ដាប់អាជ្ញាធរឡើយ”។
លោក ចាន់ សុគីម អធិការនគរបាលស្រុកស្នួលបានមានប្រសាសន៍ថា តង់ចំនួន១០០ត្រូវបានរុះរើកាលពីម្សិលមិញ។ អ្នកស្រី ស៊ិន ណារី ដែលតង់របស់គាត់ត្រូវបានរុះរើនោះ បាននិយាយថា នគរបាលបានយករណារអារផ្តាច់បង្គោលតង់របស់ពួកគាត់ផ្ដួលតែម្ដង ហើយអ្នកស្រីបានចោទរដ្ឋាភិបាលថា បានប្លន់យកដីរបស់ពួកគាត់។ អ្នកស្រីបាននិយាយថា “ ខ្ញុំមិនព្រមចាកចេញពីដីនេះទេ ពីព្រោះគ្រួសារខ្ញុំរស់នៅទីនេះរយៈពេលជាង១០ឆ្នាំមកហើយ”។
ដោយមិនខ្លាចបាត់បង់ជម្រក អ្នក ស្រី ណារី បាននិយាយថា អ្នកស្រីនឹងមិនចាកចេញពីកន្លែងនេះទេ ហើយនឹងបន្តធ្វើការងារនៅចម្ការដំឡូងមីរបស់គាត់នៅក្បែរនោះដដែល។
លោក ហេង ភារក្ស អ្នកស៊ើបអង្កេតរបស់អង្គការសិទ្ធិមនុស្សអាដហុក បានមានប្រសាសន៍ថា គ្រួសារជាច្រើនអះអាងថា ពួកគាត់បានរស់នៅលើដីនេះអស់រយៈពេលមួយទសវត្សរ៍ ឬយូរជាងនេះទៅទៀត ប៉ុន្តែតាមពិតពួកគាត់បានផ្លាស់មករស់នៅទីនេះទើបតែបានបីឆ្នាំប៉ុណ្ណោះ។ លោកបានមានប្រសាសន៍ថា ទោះជាដូច្នេះក្ដី សារាចរដែលលោកនាយករដ្ឋមន្ត្រី ហ៊ុន សែន បានប្រកាសកាលពីឆ្នាំមុនឲ្យផ្ដល់ប័ណ្ណកម្មសិទ្ធិដីដល់ប្រជាពលរដ្ឋរាប់ម៉ឺនគ្រួសារនៅទូទាំងប្រទេសដែលរស់នៅលើដីរបស់រដ្ឋគឺសារាចរលេខ០០១នោះគួរផ្ដល់ការការពារដល់ពួកគាត់។ លោកបានមានប្រសាសន៍ថា “ យើងគិតថា ប្រជាពលរដ្ឋដែលរស់នៅលើដីនេះ បានរំលោភច្បាប់ ពីព្រោះពួកគាត់បានរានដីដោយខុសច្បាប់ ប៉ុន្តែប្រសិនបើយើងក្រឡេក ទៅមើលសារាចរលេខ០០១វិញ ពួកគេគួររកដំណោះស្រាយ ពីព្រោះពួកគាត់បានមករស់នៅលើដីនេះមុនពេលមានសារាចរលេខ០០១ទៅទៀត”៕ សារុន