អ្នកភូមិជនជាតិដើមភាគតិចព្នងមួយក្រុមនៅក្នុងខេត្តមណ្ឌលគិរីបានឃាត់ខ្លួនបុរសជនជាតិវៀតណាមមួយក្រុមកាលពីថ្ងៃសៅរ៍ ដែលពួកគាត់សង្ស័យថាកាប់ឈើខុសច្បាប់នៅក្នុងព្រៃសហគមន៍របស់ខ្លួន និងបានប្រគល់បុរសទាំងនោះទៅឲ្យនគរបាលមូលដ្ឋាន។
ឃុត ចាន់រ៉ា បានឲ្យដឹងថា គាត់ស្ថិតក្នុងចំណោមអ្នកភូមិជនជាតិព្នងប្រហែល៦០នាក់ក្នុងស្រុកពេជ្រាដា ដែលបានឮសំឡេងរណារអារឈើនៅក្នុងព្រៃនិងបានប្រមូលគ្នាទៅស៊ើបអង្កេត។ គាត់បានមានប្រសាសន៍ថា ពួកអ្នកភូមិបានប្រទះឃើញអ្នកកាប់ឈើមួយក្រុមមានគ្នាជាង២០នាក់កំពុងធ្វើការនៅចំណុចមួយចំងាយប្រហែល២០គីឡូម៉ែត្រពីព្រំដែនវៀតណាមនិងបានឃាត់ខ្លួន១៥នាក់ក្នុងចំណោមនោះ រីឯនៅសល់បានរត់គេចខ្លួនតាមថ្មើរជើង។
ពួកគាត់ក៏រឹបអូសបានឈើគគី លំដាប់លេខ១ប្រហែលប្រាំបីម៉ែត្រគូប រថយន្តចំនួនបួនគ្រឿង ម៉ូតូប្រាំបួនគ្រឿង រណារអារឈើចំនួនប្រាំពីរ និងកាំភ្លើងវែងមួយដើម។
ចាន់រ៉ា បានឲ្យដឹងថា “ទ្រព្យសម្បត្តិទាំងអស់ដែលយើងរឹបអូសបានពីពួកគេ ត្រូវបានយកទៅរក្សាទុកនៅមន្ទីរបរិស្ថាន ហើយជនសង្ស័យត្រូវបាននំាខ្លួនទៅស្នាក់ការនគរបាលឃុំដើម្បីសាកសួរ”។គាត់ថា អ្នកភូមិបានតាមដានក្រុមអ្នកកាប់ឈើពីរឆ្នាំមកហើយប៉ុន្តែមិនបានឃាត់ខ្លួនពួកគេរហូតពេលនេះពីព្រោះអ្នកកាប់ឈើទាំងនេះមានអាវុធ ហើយអ្នកភូមិមានចំនួនច្រើនជាង។
លោក ខ្លាង ជូ នាយរងនគរបាលប៉ុស្តិ៍ប៊ូស្រា បានឲ្យដឹងថា ក្រុមអ្នកកាប់ឈើត្រូវបាននាំខ្លួនទៅស្នាក់ការនគរបាលកាលពីថ្ងៃរសៀលថ្ងៃសៅរ៍ ប៉ុន្តែមិនអាចសាកសួរទេ ព្រោះពួកគេនិយាយតែភាសាវៀតណាម។ លោកបានមានប្រសាសន៍ថា “ពួកគេជាជនជាតិវៀតណាម ដូច្នេះវាពិបាកយល់ពួកគេនិយាយ។ យប់នោះ នគរបាលខេត្តបាននាំខ្លួនពួកគេទៅស្នងការដ្ឋាននគរបាលខេត្ត”។ នគរបាលមិនអាចទាក់ទងដើម្បីសុំការអត្ថាធិប្បាយបានទេ។
លោក សុខ រដ្ឋា អ្នកសម្របសម្រួលរបស់អង្គការសិទ្ធិមនុស្ស អាដហុក ប្រចាំនៅខេត្តនេះ បានមានប្រសាសន៍ថា លោកកំពុងតែស៊ើបអង្កេតករណីនេះ ហើយលោកបញ្ជាក់ថា ជនសង្ស័យកាប់ឈើ១៥នាក់នេះ កំពុងត្រូវឃាត់ខ្លួនដើម្បីសាកសួរនៅស្នងការដ្ឋាននគរបាលខេត្ត មកត្រឹមរសៀលម្សិលមិញ។
លោកបានឲ្យដឹងថា “កន្លងមក នៅពេលអាជ្ញាធរចាប់ខ្លួនពលរដ្ឋវៀតណាមដោយសារកាប់ឈើ ខ្លះក្នុងចំណោមពួកគេត្រូវបានដោះលែងវិញ បន្ទាប់ពីសាកសួរនៅស្នងការដ្ឋាននគរបាលខេត្ត។ ដូច្នេះ យើងនឹងតាមដានមើលថាតើពួកគេ [១៥នាក់] ត្រូវបានដោះលែង ឬត្រូវបានចោទប្រកាន់” ៕ ប៊ុននី