កាលពីម្សិលមិញ សាលាដំបូងរាជធានីភ្នំពេញបានបើកសវនាការជំនុំជម្រះក្តីស្រ្តីម្នាក់ ដែលត្រូវបានចោទប្រកាន់ពីបទបរិហារកេរ្តិ៍ឧត្តមសេនីយ៍ឯកនៃកងយោធពលខេមរភូមិន្ទ នឹម ម៉េង មហាសេដ្ឋីជីករ៉ែ ពាក់ព័ន្ធក្នុងជម្លោះដីធ្លីមួយនៅក្នុងខេត្តព្រះសីហនុ។
លោក គឹម ដានី ប្រធានក្រុមប្រឹក្សាជំនុំជម្រះបានមានប្រសាសន៍ថា ឈ្មោះ សុខ នាង ហ្គេក កំពុងត្រូវបានចោទប្រកាន់ពីបរិហារកេរ្តិ៍ និងប្រើភស្តុតាងមិនត្រឹមត្រូវ។ លោក ប៊ុន គង់ មេធាវីរបស់លោក នឹម ម៉េង បានថ្លែងថា កូនក្ដីរបស់លោកបានដាក់ពាក្យបណ្ដឹងប្ដឹងអ្នកស្រី នាង ហ្គេក ក្នុងឆ្នាំ២០១១ បន្ទាប់ពីអ្នកស្រីបានអះអាងថា លោក នឹម ម៉េង បានទន្ទ្រានយកដីរបស់អ្នកស្រីនៅក្នុងខេត្តព្រះសីហនុ និងបានផ្ដល់ភ័ស្តុតាងក្លែងក្លាយដើម្បីគាំទ្រការអះអាងរបស់អ្នកស្រីក្នុងអត្ថបទកាសែតក្នុងស្រុកមួយ។
លោក ប៊ុន គង់ បានឲ្យដឹងថា “ អ្នកស្រី បានបរិហារកេរ្តិ៍កូនក្ដីរបស់ខ្ញុំនៅក្នុងកាសែតនេះ ដោយនិយាយថា កូនក្ដីរូបនេះបានចាប់យកដីរបស់គាត់ប្រហែល១០ហិកតានៅក្នុងខណ្ឌស្ទឹងហាវ ហើយថា លោកបានប្រើកម្លាំងប្រដាប់អាវុធអនាធិបតេយ្យដើម្បីការពារដីមានជម្លោះនេះ”។
លោក ប៊ុន គង់ បានមានប្រសាសន៍ថា កូនក្ដីរបស់លោកដែលភរិយារបស់លោក ជាម្ចាស់ក្រុមហ៊ុនជីករ៉ែ នឹម ម៉េង គ្រុប កំពុងតែទាមទារប្រាក់១០០.០០០ដុល្លារជាការសងជំងឺចិត្តពីអ្នកស្រី នាង ហ្គេក។
អ្នកស្រី នាង ហ្គេក អាយុ៤៦ឆ្នាំ ដែលធ្វើការជាអ្នកបកប្រែឲ្យរោងចក្រកាត់ដេរមួយ ត្រូវបានកាត់ទោសកំបាំងមុខ។
លោកស្រី ពឿង ធីតា មេធាវីការពារក្ដីរបស់អ្នកស្រី នាង ហ្គេក បានឲ្យដឹងថា កូនក្ដីរបស់អ្នកស្រីមានប័ណ្ណកម្មសិទ្ធិដី១០ហិកតា ដែលមានវិវាទនេះ ហើយបានអះអាងថា លោក នឹម ម៉េង យកដីនេះដោយខុសច្បាប់។ លោកស្រី ធីតា លើកឡើងអំឡុងសវនាការជំនុំជម្រះកាលពីម្សិលមិញថា “ កូនក្ដីរបស់ខ្ញុំមានឯកសារផ្លូវការមួយផ្ដល់កម្មសិទ្ធិដីនេះ ហើយខ្ញុំសូមស្នើតុលាការលើកលែងការចោទប្រកាន់ ព្រោះកូនក្ដីខ្ញុំមិនបានបរិហារកេរ្តិ៍ ឬប្រមាថលោក នឹម ម៉េង នោះទេ”។ កាលបរិច្ឆេទសម្រាប់សាលក្រមនេះមិនទាន់ប្រកាសនៅឡើយទេ៕ ប៊ុននី