នគរបាលបានរាយការណ៍ថា បុរសចំនួនពីរនាក់ត្រូវបានធ្វើឃាតនៅប៉ុន្មានម៉ោងពីគ្នាក្នុងឧបទ្ទវហេតុបាញ់ប្រហារនិងចាក់សម្លាប់ដោយឡែកពីគ្នានៅក្នុងរាជធានីភ្នំពេញកាលពីយប់ថ្ងៃសុក្រ និងព្រលឹមថ្ងៃសៅរ៍។
ឧបទ្ទវហេតុដំបូងបានកើតឡើង កាលពីយប់ថ្ងៃសុក្រ នៅពេលអ្នកបើករថយន្តតាក់ស៊ីម្នាក់ឈ្មោះ ស៊ុន វ៉ាន់ធី ត្រូវបានម៉ូយចំនួនពីរនាក់ចាក់ បន្ទាប់ពីពួកគេឡើងជិះរថយន្តតាក់ស៊ី(Choice Taxi )របស់គាត់នៅក្នុងខណ្ឌទួលគោក។
នៅអំឡុងពេលជិះនោះ អ្នកទាំងបីបានឈ្លោះប្រកែកគ្នា។ ម្នាក់ក្នុងចំណោមអ្នកទាំងបីបានក្របួចកអាវ វ៉ាន់ធី ហើយក្រៀកគាត់ទៅនឹងកៅអី ឯបុរសម្នាក់ទៀតបានយកដែកអង្រូសមួយចាក់គាត់ត្រូវបី ឬបួនកន្លែង។ វ៉ាន់ធី បានស្លាប់ បន្ទាប់ពីបញ្ជូនទៅកាន់មន្ទីរពេទ្យកាល់ម៉ែត។
លោក អេង សុភា នាយនគរបាលព្រហ្មទណ្ឌរាជធានីភ្នំពេញ បានឲ្យដឹងថា នគរបាលកំពុងតាមរកបុរសទាំងពីរនាក់នេះ និងកំពុងតែព្យាយាមកំណត់ពីមូលហេតុដែលនាុំឲ្យកើតមានឧក្រិដ្ឋកម្មនេះ។ គ្មានអ្វីត្រូវបានលួចពីរថយន្តនេះទេ។ លោក សុភា បានមានប្រសាសន៍ថា “គរបាលកំពុងតែស៊ើបអង្កេត ដើម្បីចាប់ខ្លួនជនសង្ស័យ។ ខ្ញុំគិតថា មិនមែនជាអំពើប្លន់ទេមើលទៅដូចជាការសងសឹក”។
លោក គង់ សារ៉ាត់ អ្នកចាត់ការរបស់ក្រុមហ៊ុនតាក់ស៊ី បានឲ្យដឹងថា អ្នកបើកបររថយន្តតាក់ស៊ី Choice Taxi បីនាក់ រាប់ទាំង វ៉ាន់ធី ផង ត្រូវបានម៉ូយជិះរថយន្តតាក់ស៊ីវាយប្រហារក្នុងរយៈពេលបីខែចុងក្រោយនេះ។
នគរបាលកំពុងបន្តការស៊ើបអង្កេតរបស់ខ្លួននិងមានផែនការត្រួតពិនិត្យខ្សែវីដេអូររបស់ហាងមួយ ជាទីដែលជនសង្ស័យហៅរថយន្តតាក់ស៊ីនេះ។ លោក ហម កា នាយនគរបាលសង្កាត់បឹងកក់១ បានមានប្រសាសន៍ថា “គ្មានតម្រុយអំពីជនសង្ស័យទេ ប៉ុន្តែនគរបាលកំពុងធ្វើការតាមរកចាប់ខ្លួនពួកគេ”។
ប៉ុន្មានម៉ោងក្រោយមក នៅព្រលឹមថ្ងៃសៅរ៍ បុរសបីនាក់ត្រូវបានខ្មាន់កាំភ្លើងម្នាក់បាញ់ក្រៅក្រសួងព័ត៌មាន សង្កាត់ស្រះចក។
ឈ្មោះ វ៉ាន់ សុធារ៉ា អាយុ២៦ឆ្នាំបានស្លាប់នៅក្នុងមន្ទីរពេទ្យ។ ឈ្មោះ ថៃ ម៉េង អាយុ២៧ឆ្នាំ និងឈ្មោះ ហួត រ៉ាឌី អាយុ២៧ឆ្នាំបានរងរបួស ប៉ុន្តែរួចផុតពីស្លាប់។
លោក កាន វណ្ណៈនាយនគរបាលសង្កាត់ស្រះចក បានមានប្រសាសន៍ថា “នគរបាលកំពុងសាកសួរអ្នកឃើញហេតុការណ៍ និងជនរងគ្រោះ”៕ប៊ុននី