អង្គភាពប្រឆាំងអំពើពុករលួយបានបង្ហាញថា អធិការនគរបាលស្រុកនិងអធិការរងស្រុកនៅក្នុងខេត្តកំពតដែលត្រូវបានចាប់ខ្លួនកាលពីសប្តាហ៍មុន រកប្រាក់បានជាង៦៤.០០០ដុល្លារពីការកឹបកេង ស៊ីសំណូកនិងកាត់យកប្រាក់ខែមន្ត្រីក្រោមឱវាទ។
អង្គភាពប្រឆាំងអំពើពុករលួយបានលើកឡើងក្នុងសេចក្តីថ្លែងការណ៍មួយដែលចេញកាលពីថ្ងៃសុក្រថា លោក ស្រ៊ុន ឡាំ អធិការនគរបាលស្រុកបន្ទាយមាស និងលោក ម៉ក់ ហួត អធិការរងស្រុក បានកាត់យកប្រាក់ខែពីមន្ត្រីក្រោមឱវាទរបស់ខ្លួន យកប្រាក់ខែមន្ត្រីដែលឈប់ធ្វើការជានគរបាលដាក់ក្នុងហោប៉ៅ កំហែងយកប្រាក់ពីនគរបាលចរាចរនិងឈ្មួញស្រូវនិងទទួលសំណូកពីជនប្រព្រឹត្តបទល្មើសជាថ្នូរនឹងការមិនបញ្ជូនសំណុំរឿងរបស់ពួកគេទៅកាន់តុលាការ។
យោងតាមអង្គភាពប្រឆាំងអំពើពុករលួយបានប៉ាន់ប្រមាណថា ជាងប្រាំមួយឆ្នាំកន្លងមកនេះ លោក ស្រ៊ុន ឡាំ និងលោក ម៉ក់ ហួត បានកំហែងនិងលួចយកប្រាក់បានសរុប៦៤,៣៦០ដុល្លារ។ សេចក្តីថ្លែងការណ៍របស់អង្គភាពនេះមានខ្លឹមសារដូច្នេះថា “ លទ្ធផលនៃការស៊ើបអង្កេតរបស់យើងបង្ហាញថា លោក ស្រ៊ុន ឡាំ និងថ្នាក់ក្រោមរបស់លោកទទួលបានប្រាក់ប្រហែល២៥៧.៤៤១.២៣៥រៀល [៦៤.៣៦០ដុល្លារ]”។អង្គភាពប្រឆាំងអំពើពុករលួយបានលើកឡើងបន្ថែមទៀតនៅក្នុងសេចក្តីថ្លែងការណ៍របស់ខ្លួនថា “ [ពួកគេ] ទទួលសំណូកពីមេខ្លោងល្បែងស៊ីសងនិងពីជនល្មើសជាថ្នូរនឹងការមិនបញ្ជូនសំណុំរឿងរបស់ពួកគេទៅកាន់តុលាការ”។
កាលពីថ្ងៃអាទិត្យ លោក ឱម យ៉ិនទៀង ប្រធានអង្គភាពប្រឆាំងអំពើពុករលួយបានប្រាប់អ្នកយកព័ត៌មានថា មន្ត្រីនគរបាលស្រុកបន្ទាយមាសប្រហែល៨០ភាគរយបានដាក់ពាក្យបណ្តឹងប្តឹងអធិការនិងអធិការរងរបស់ខ្លួន ហើយបានជួយផ្តល់ភ័ស្តុតាងដាក់បន្ទុកលើពួកគេទាំងពីរ។ លោក ឱម យ៉ិនទៀង មានប្រសាសន៍ថា “ ខណៈសំណុំរឿងនេះកំពុងដំណើរការទៅមុខ គាត់ [លោកឡាំ] បានស្នើឲ្យបញ្ជាក់ពីអត្តសញ្ញាណរបស់អ្នកដែលប្តឹងគាត់ឲ្យបានច្បាស់ ហេតុដូច្នេះគាត់អាចបណ្តេញពួកគេចោល”។
លោក ស្រ៊ុន ឡាំ ក៏បានព្យាយាមអញ្ជើញលោក ឱម យ៉ិនទៀង ឲ្យមកទទួលទានអាហារពេលល្ងាចរួមគ្នាផងដែរ ខណៈលោកកំពុងត្រូវបានគេស៊ើបអង្កេត។
លោក ឱម យ៉ិនទៀង បានមានប្រសាសន៍ថា “ វាគឺជាជម្លោះផលប្រយោជន៍” ។ លោកបានហៅទូរស័ព្ទទៅអធិការស្រុករូបនេះម្តងទៀត ដោយប្រាប់ថា “ ខ្ញុំកំពុងស៊ើបអង្កេតលោកឯង។ ហេតុអ្វីបានជាខ្ញុំត្រូវទៅជួបលោកឯងនៅកន្លែងមួយក្រៅបន្ទប់សាកសួរទៅវិញ? ហេតុអ្វីបានជាខ្ញុំត្រូវចេញទៅក្រៅទទួលទានអាហារជាមួយលោកឯង?”។
លោក ឱម យ៉ិនទៀង បានលើកឡើងថា លោកបានច្រានចោលការអញ្ជើញឲ្យទៅទទួលទានអាហារពេលល្ងាចមួយពេលនេះ។
កាលពីសប្តាហ៍មុន សាលាដំបូងខេត្តកំពត បានចោទប្រកាន់មន្ត្រីនគរបាលទាំងពីររូបនេះពីបទប្រព្រឹត្តអំពើពុករលួយចំនួនប្រាំពីរករណី។ ប្រសិនបើរកឃើញថាមានទោសកំហុស ពួកគេនឹងត្រូវផ្តន្ទាទោសឲ្យជាប់ពន្ធនាគាររយៈពេលប្រាំបួនឆ្នាំ។ លោក ស៊្រុន ឡាំ និងលោក ម៉ក់ ហួត កំពុងត្រូវបានឃុំខ្លួនជាបណ្តោះអាសន្ន៕ ស៊ុយឈាង