លោក អង្គ វង្សវឌ្ឍានា បានឲ្យដឹងកាលពីម្សិលមិញថា ឥឡូវនេះចៅក្រមត្រូវបានតម្រូវឲ្យសរសេរសេចក្តីពន្យល់ពីមូលហេតុឲ្យបានត្រឹមត្រូវ នៅពេលឃុំខ្លួនជនសង្ស័យបណ្តោះអាសន្ន មិនមែនគ្រាន់តែសម្រេចចិត្តដូចពេលកន្លងមកទេ។ លោកបានឲ្យដឹងទៀតថា ក៏ប៉ុន្តែ ក្រសួងយុត្តិធម៌ក៏កំពុងពិចារណាអំពីការកែប្រែក្រមនីតិវិធីព្រហ្មទណ្ឌ ដើម្បីផ្ទេរអំណាចបែបនេះឲ្យទៅចៅក្រម។
លោក អង្គ វង្សវឌ្ឍានា បានមានប្រសាសន៍នៅក្នុងអង្គសិក្ខាសាលាស្តីពីការឃុំខ្លួនបណ្តោះអាសន្នរៀបចំនៅក្នុងរាជធានីភ្នំពេញថា “ ចៅក្រមត្រូវបានតម្រូវឲ្យបញ្ជាក់អំណះអំណាងសមស្រប ឬក៏សេចក្តីបញ្ជាក់មូលហេតុដែលនាំឲ្យមានការឃុំខ្លួនបណ្តោះអាសន្ត”។
លោកបានបន្ថែមទៀតថា “លោកអ្នកត្រូវមានមូលហេតុ ឬអំណះអំណាងសម្រាប់គាំទ្រសេចក្តីសម្រេចរបស់លោកអ្នក។ លោកអ្នកមិនមែនគ្រាន់តែសម្រេចចិត្តឃុំខ្លួនគេដោយងាយៗនោះទេ”។ លោក អង្គ វង្សវឌ្ឍានា បានលើកឡើងបន្តទៀតថា លោកបានធ្វើការកែប្រែបែបនេះ ដោយសារតែមានបញ្ហាខ្វះតម្លាភាពនៅក្នុងតុលាការ ទាក់ទងនឹងការធ្វើសេចក្តីសម្រេចចិត្តឃុំខ្លួនជនណាម្នាក់។
កាលពីថ្ងៃទី២២ ខែមករា លោក អង្គ វង្សវឌ្ឍានា បានចុះហត្ថលេខា និងចាប់ផ្តើមផ្សព្វផ្សាយសារាចរបី ដែលជំរុញឲ្យចៅក្រមពិចារណាជម្រើសផ្សេង ក្រៅពីការឃុំខ្លួនបណ្តោះអាសន្ន។ ជម្រើសទាំងនោះរួមមានការពិនិត្យប្រព័ន្ធតុលាការ បញ្ញត្តិនៃការផ្តន្ទាទោសដែលមានការព្យួរទោស និងការអនុវត្តបទបញ្ជាសេវាសហគមន៍។
លោកបានមានប្រសាសន៍បន្ថែមទៀតថា “ សារាចរទាំងនេះអាចជួយចៅក្រមក្នុងការលើកយកមូលហេតុត្រឹមត្រូវសម្រាប់គាំទ្រការសម្រេចចិត្តឃុំខ្លួនជនណាម្នាក់” ។ លោកបានលើកឡើងបន្តទៀតថា ក្រមនីតិវិធីព្រហ្មទណ្ឌចែងថា “ចុងចោទត្រូវមានសេរីភាពនៅឡើយ”។
សេចក្តីសម្រេចចិត្តធ្វើឡើងចំពេលអ្នកតវ៉ា២១នាក់ដែលត្រូវបានចាប់ខ្លួនអំឡុងបាតុកម្មកាលពីខែមករា ដែលមានគោលបំណងទាមទារប្រាក់ឈ្នួលអប្បបរមា១៦០ដុល្លារនៅក្នុងវិស័យកាត់ដេរ នៅជាប់ឃុំបណ្តោះអាសន្ននៅឡើយ នៅពន្ធនាគារដែលមានការយាមកាមតឹងរឹុងនៅខេត្តកំពង់ចាម។
កាលពីថ្ងៃច័ន្ទ មេដឹកនាំសហជីពឈ្មោះ វន់ ពៅ ដែលស្ថិតក្នុងចំណោមអ្នកជាប់ឃុំទាំងនោះ ត្រូវបានសាលាឧទ្ធរណ៍បដិសេធមិនឲ្យនៅក្រៅឃុំជាលើកទី២។ ចៅក្រមបានផ្តល់មូលហេតុថា ការដោះលែងឲ្យនៅក្រៅឃុំនោះអាចប៉ះពាល់នីតិវិធីរបស់សាលាដំបូងរាជធានីភ្នំពេញ ដែលកំពុងតែរៀបចំដំណើរការផ្តន្ទាទោសមេដឹកនាំសហជីពរូបនេះ។
លោក អុិត រ៉ាឌី អនុលេខាធិការក្រសួងយុត្តិធម៌បានលើកឡើងនៅក្នុងបទបង្ហាញកាលពីម្សិលមិញថា វិធីសាស្ត្រចាស់ក្នុងការសម្រេចថា តើចាំបាច់ត្រូវឃុំខ្លួនបណ្តោះអាសន្ន ឬយ៉ាងនោះបានបង្កបញ្ហាកើតឡើង ដោយសារតែមានខ្លឹមសារមិនច្បាស់លាស់ជុំវិញសេចក្តីសម្រេចចិត្តរបស់ចៅក្រម។
លោក រ៉ាឌី ក៏បានទទួលស្គាល់ផងដែរថា ការមិនដោះលែងនៅក្រៅឃំុមានទំនាក់ទំនងដោយផ្ទាល់ជាមួយនឹងបញ្ហាចំនួនអ្នកទោសច្រើនជ្រុលក្នុងពន្ធនាគារនៅប្រទេសកម្ពុជា។ គួរបញ្ជាក់ថា បញ្ហានេះត្រូវបានអង្គការសិទ្ធិមនុស្សនានាលើកឡើងជាយូរមកហើយ។
ឯកសារនៃទម្រង់ឃុំខ្លួនបណ្តោះអាសន្នដែលត្រូវបានចែកជូនអ្នកចូលរួមសិក្ខាសាលាកាលពីម្សិលមិញ បង្ហាញពីការតម្រូវឲ្យចៅក្រមស៊ើបសួរបញ្ជាក់មូលហេតុថា តើមូលហេតុអ្វីបានជាចាំបាច់ត្រូវឃុំខ្លួនបណ្តោះអាសន្ន ដោយលើកឡើងនូវមូលដ្ឋានផ្សេងៗ មាត្រាច្បាប់ពាក់ព័ន្ធ និងរយៈពេលដែលចុងចោទត្រូវជាប់ឃុំ។
ឯកសារទាំងនោះក៏បានបង្ហាញបន្តទៀតថា ការឃុំខ្លួនបណ្តោះអាសន្នគួរតែចាំបាច់ត្រូវធ្វើ តែនៅពេលគ្មានសេចក្តីបង្គាប់គ្រប់គ្រាន់សម្រាប់ដោះលែងឲ្យនៅក្រៅឃុំ ដើម្បីធានាថា ភាពចាំបាច់ទាំងនេះមានមូលដ្ឋានគ្រប់គ្រាន់ សម្រាប់រក្សាការឃុំខ្លួនដែលជាវិធីតែមួយគត់ក្នុងការសម្រេចបានគោលបំណងទាំងនេះ។ ក្រសួងយុត្តិធម៌កំពុងពិចារណាការកែប្រែសេចក្តីសម្រេចចិត្តឃុំខ្លួនបណ្តោះអាសន្នឲ្យចេញពីការងាររបស់ចៅក្រមផងដែរ។
ក្រសួងនេះបានលើកឡើងថា “ យើងកំពុងគិតអំពីការកែប្រែមួយចំនួននៅក្នុងក្រមនីតិវិធីព្រហ្មទណ្ឌពាក់ព័ន្ធទៅនឹងការឃុំខ្លួនបណ្តោះអាសន្ន ឬការឃុំខ្លួន។ ដូច្នេះចៅក្រមមិនអាចចេញសេចក្តីសម្រេចបានទេ…។ យើងមិនត្រូវមានអង្គសន្និបាត ឬក៏ក្រុមប្រឹក្សាមួយដើម្បីសម្រេចកិច្ចការនេះ ជំនួសចៅក្រម”។
លោក សុខ សំអឿន នាយកប្រតិបត្តិអង្គការក្រុមអ្នកច្បាប់ការពារសិទ្ធិកម្ពុជាបានលើកឡើងថា លោកសង្ឃឹមថា ឥឡូវនេះចៅក្រមនឹងពិចារណាអំពីភាពធ្ងន់ធ្ងរនៃបទល្មើសដែលត្រូវបានចោទប្រកាន់ មុនពេលសម្រេចថា តើត្រូវឃុំខ្លួនជនណាម្នាក់ ឬយ៉ាងណា។
លោកបានមានប្រសាសន៍ថា “ជួនកាលបទល្មើសមិនមែនជាបទល្មើសតូចតាចទេ ប៉ុន្តែ វាពាក់ព័ន្ធទៅនឹងលុយកាក់ ឬការលួចបន្លំជាដើម។ វាមិនមែនជាបទល្មើសគ្រោះថ្នាក់ទេ ដូច្នេះខ្ញុំគិតថា ក្នុងករណីបែបនេះគួរតែអនុញ្ញាតឲ្យពួកគេគេចផុតពីការឃុំខ្លួនបណ្តោះអាសន្ន”។
លោកស្រី ម៉ារី ដូមីនិច ប៉ារ៉ង់ (Marie-Domini que Parent) អនុប្រធានការិយាល័យឧត្តមស្នងការទទួលបន្ទុកសិទ្ធិមនុស្សនៅក្នុងប្រទេសកម្ពុជា (Office of the High Comissioner for Human Rights in Cambodia) ហៅកាត់ថា OHCHR បានលើកឡើងថា ការសម្រេចចិត្តឃុំខ្លួនជនណាម្នាក់បណ្តោះអាសន្ន ដោយគ្មានមូលហេតុ “មិនមែនជារឿងសមស្រប ក្នុងសង្គមទំនើប ដែល យកច្បាប់ជាមូលដ្ឋានទេ”។ លោកស្រីបានលើកឡើងបន្ថែមទៀតថា ទម្រង់ថ្មីនេះគឺជា “ ជំហានតូចមួយ ប៉ុន្តែ មានសារៈសំខាន់ខ្លាំងណាស់” ក្នុងការកែទម្រង់ប្រព័ន្ធតុលាការ៕ សុធា