29 C
Phnom Penh

លោក សម​ រង្សុី អំពាវនាវ​ឲ្យ​មានការ​ជួប​ជុំគ្នា​នៅ​ទី​លាន​ប្រជា​ធិបតេយ្យ​​​​នៅ​សប្តាហ៍​​នេះ

ដោយ ឌឹ ខេមបូឌា ដេលី

បទវិភាគ

លោក​ សម រង្ស៊ី ប្រធាន​គណបក្ស​ប្រឆាំង​បាន​មាន​ប្រសាសន៍​កាល​ពីម្សិលមិញថា គណ​បក្ស​សង្គ្រោះ​ជាតិ​នឹង​ជួប​ជុំ​គ្នា​ជា​លើក​ដំបូង​នៅ​ថ្ងៃអាទិត្យ​ នៅ​ទីលាន​ប្រជា​ធិបតេយ្យ​​ក្នុង​ទីក្រុង​ភ្នំពេញ​ចាប់​តាំង​ពីរ​ដ្ឋាភិបាល​បាន​បញ្ជូន​មនុស្ស​ដែល​កាន់​ដំបង​ដែក​ និង​ពូថៅ​ឲ្យទៅ​ដេញ​អ្នក​តវ៉ា​ចេញ​ពីទីលាន​នេះ​កាល​ពីថ្ងៃ​ទី​៤​ខែ​មករា​។

លោក សម រង្ស៊ី ប្រធាន​គណបក្សប្រឆាំង​​អង្គុយ​ធ្វើ​សន្និសីទ​កាសែត​ជាមួយ​​លោក កឹម សុខា នៅទីស្នាក់​ការ​គណបក្ស​ កាល​ពីម្សិលមិញ​។ លោក​អំពាវ​នាវ​ឲ្យអ្នក​គាំទ្រ​ទៅ​​ជួប​ជុំ​គ្នា​នៅ​ទីលាន​ប្រជាធិបតេយ្យ​ដើម្បី​ធ្វើ​សមាជប្រជាជន។សីុវ  ចាន់​ណា​
លោក សម រង្ស៊ី ប្រធាន​គណបក្សប្រឆាំង​​អង្គុយ​ធ្វើ​សន្និសីទ​កាសែត​ជាមួយ​​លោក កឹម សុខា នៅទីស្នាក់​ការ​គណបក្ស​ កាល​ពីម្សិលមិញ​។ លោក​អំពាវ​នាវ​ឲ្យអ្នក​គាំទ្រ​ទៅ​​ជួប​ជុំ​គ្នា​នៅ​ទីលាន​ប្រជាធិបតេយ្យ​ដើម្បី​ធ្វើ​សមាជប្រជាជន។សីុវ  ចាន់​ណា​

ពេល​ធ្វើ​សន្និសីទ​កាសែត​នៅទីស្នាក់​ការ​​​គណបក្ស​​សង្គ្រោះ​ជាតិ​ លោក សម រង្ស៊ី បាន​មាន​ប្រសាសន៍​ថា គណបក្ស​ប្រឆាំង​នឹង​ធ្វើ​សមាជប្រជាជន​នៅ​ទីលាន​នេះ​នៅ​ម៉ោង​​១​រសៀល​ដើម្បី​ទំនាក់​ទំនង​ជាមួយ​អ្នក​គាំទ្រ​បន្ទាប់​ពី​​មាន​ការ​ជាប់​គាំង​ការ​ចរចាអំពី​កំណែ​ទម្រង់​​ការ​បោះឆ្នោត​ជាមួយ​គណបក្ស​ប្រជា​​​ជន​កម្ពុជា​នៅ​សប្តាហ៍​នេះ​មក​។

លោក សម រង្ស៊ី បាន​មាន​​ប្រសាសន៍​ថា​​​​​​​​​​​​​​​ “ថ្នាក់​ដឹក​នាំ​របស់​យើង​បាន​និយាយ​ជាមួយ​ ប្រជាជន​ ហើយ​សួរប្រជាជន​អំពី​គំនិត​របស់​គាត់​ និង​សួរ​ថា តើ​យើង​គួរ​បន្ត​ធ្វើ​អ្វី​ទៀត​។ យើង​ត្រូវ​ការ​ជួប​​ពួក​គាត់​ ពីព្រោះ​យើង​មិន​បាន​ជួប​ពួក​គាត់​ជាយូរ​មក​​ហើយ​”។

ប្រធាន​​គណបក្ស​ប្រឆាំង​រូប​នេះ​បាន​មាន​ប្រសាសន៍ថា ការ​ជួប​ជុំ​គ្នា​នេះ​នឹង​ធ្វើ​ឡើង​បន្ទាប់​ពី​ការ​គោរ​ព​វិញ្ញាណក្ខ​​​ន្ធ​នៅ​​​ម៉ោង​៨​ព្រឹក​នៅ​​មុខ​អគារ​រដ្ឋ​សភា​ចាស់​ដល់​អ្នក​ស្លាប់​ចំនួន​១៦​​នាក់​ និង​អ្នក​រងរបួស​ជា​ច្រើន​ទៀត​​នៅ​កន្លែង​នេះ​នៅក្នុង​ការ​គប់​គ្រាប់​បែក​ដៃ​កាល​​ពី​ថ្ងៃទី​៣០​ ខែ​មីនា​ ឆ្នាំ​១៩៩៧​ទៅ​លើ​បាតុកម្ម​ដែល​ដឹក​នាំ​ដោយ​លោក សម រង្ស៊ី ។

លោក​ សម រង្ស៊ី បាន​សរសេរ​ជា​សារ​សំដៅ​ដល់​គណបក្ស​កាន់​អំណាច​ថា “យើង​​​មិន​ធ្វើ​បាតុកម្ម​ដើម្បី​ផ្តួល​រំលំ​រដ្ឋាភិបាល​ទេ ដូច្នេះ​ សូម​កុំ​ប្រើ​រឿង​នេះ​ធ្វើ​ជា​លេស​ ឬ​ធ្វើ​ការ​ចោទ​ប្រកាន់​បែ​បនេះ​។ អ្វី​ដែល​យើង​ធ្វើ​គឺ​សមាជ​ប្រជាជន​”។

នៅ​ក្នុង​សន្និសីទ​​កាសែត​​ដាច់ដោយ​ឡែក​មួយទៀត​​កាល​​ពីម្សិលមិញ លោក ស ខេង ​រដ្ឋមន្ត្រី​ក្រសួង​មហាផ្ទៃបាន​មាន​ប្រសាសន៍​ថា លោក​​នឹង​ពិចារណា​ផែនការ​របស់​គណបក្ស​សង្គ្រោះជាតិ​ នៅពេល​គណបក្ស​នេះ​ធ្វើ​​សំណើ​ជា​ផ្លូវ​ការ​​សុំ​ជួប​ជុំ​គ្នា​។ កាល​ពី​ថ្ងៃទី​១០​ខែ​មីនា​ អាជ្ញាធរ​បាន​បិទ​ទីលា​ន​ប្រជា​ធិប​តេយ្យ​មិន​ឲ្យ​សហជីព​កម្មករ​រោង​ចក្រ​​កាត់​ដេរ​រៀបចំ​វេទិកា​សាធារណៈ។

លោក ឡុង រី ប្រធាន​ផ្នែក​សន្តិសុខ​របស់​គណបក្ស​សង្គ្រោះ​ជាតិ​បានមាន​ប្រសាសន៍​កាល​ពីម្សិលមិញថា “គណបក្ស​សង្គ្រោះ​ជាតិ​នឹង​ធ្វើ​សមាជ​ប្រជាជន ​មិន​ថា អាជ្ញាធរ​មាន​​វិធាន​ការ​បែប​ណា​នោះ​ទេ​”។

លោក សម រង្ស៊ី បានមាន​ប្រសាសន៍​តាម​ទូរស័ព្ទ​ថា គណបក្ស​លោក​នឹង​ធ្វើ​សមាជ​ប្រជា​ជន​នៅ​ទីលាន​ប្រជា​ធិបតេយ្យ​ផ្នែក​ខាង​កើត​ប្រសិន​បើ​អ្នក​គាំទ្រ​មិនត្រូវ​​​បាន​​​​អនុ​​​ញ្ញាត​ឲ្យ​ចូល​ទីលាន​នេះ​ទេ​។

លោក​មាន​ប្រសាសន៍​ថា  ស្តាត​អូ​ឡាំពិក ​ក៏​ជា​ជម្រើ​សមួយ​នៃការ​ជ​ួប​ជុំ​គ្នា​ដែរ​។ លោក​បានមាន​ប្រសាសន៍​ទៀត​​ថា “ប៉ុន្តែ យើង​គិត​ថា អាជ្ញាធរ​នឹង​មិន​បិទ​ទីលាន​នេះ​ទេ​ ប្រសិន​បើ​ពួក​គេ​បិទ​ទីលាន​ប្រជា​ធិប​តេយ្យ​ ​វា​មិន​សម​នឹង​ឈ្មោះ​ និង​គោល​បំណង​នៃ​ទីលាន​នេះទេ​”។

លោក ឡុង​ ឌីម៉ង់​ អ្នក​នាំពាក្យ​សាលារាជ​ធានី​​ភ្នំពេញ​បាន​មាន​ប្រសាសន៍​ថា មន្ត្រី​សា​លា​រាជធានី​ និង​ថ្នាក់​ដឹកនាំ​គណបក្ស​សង្គ្រោះ​ជាតិ​គ្រោង​ជួប​ពិភាក្សា​គ្នា​នៅព្រឹក​នេះ​។

នៅ​ឯសន្និសីទកាសែត​​កាល​ពីព្រឹក​ម្សិល​មិញ លោក​ សម រង្ស៊ី បាន​លើក​ឡើង​សាជា​ថ្មី​អំពី​ពាក្យ​​ដែល​លោក​បានមាន​ប្រសាសន៍​កាល​ពីថ្ងៃអង្គារ​ថា ឥឡូវ​នេ​ះ​ការ​ទទួល​ខុស​ត្រូវ​​ស្ថិត​នៅ​លើ​គណបក្ស​ប្រជាជន​កម្ពុជា​​ក្នុង​ការ​ដោះស្រាយ​ដោយ​ខ្លួន​ឯង​ដើម្បី​​ធានាឲ្យមាន​ឯករាជភាព​របស់​គណៈកម្មាធិ​ការ​ជាតិ​រៀបចំការ​​បោះ​ឆ្នោត​​ ប្រសិន​បើ​ខ្លួន​ចង់​ចរចា​បន្ត​ទៀត​​​។

គណបក្ស​ប្រជាជន​កម្ពុជា​បាន​ចោទ​គណ​បក្ស​សង្គ្រោះ​ជាតិ​ថា បាន​ប្រើ​ប្រាស់​ការ​ខ្វែង​គំនិត​គ្នា​លើ​ការ​កែ​ទម្រង់​​គណៈកម្មាធិ​ការ​ជាតិ​រៀបចំការ​​បោះ​ឆ្នោត​​នេះ​ថា ជា​លេស​សម្រាប់​ដក​ខ្លួន​ចេញ​ពីការ​ចរចា​។

គណៈកម្មការ​កំណែទម្រង់​​ការ​បោះ​ឆ្នោត​​ទ្វេ​ភាគី​​​  មាន​ការ​ខ្វែង​គំនិត​គ្នា​ទាំង​ស្រុង​​អំឡុ​ងកិច្ច​ប្រជុំ​លើក​ទី៤​របស់​ខ្លួន​​កាល​​ពីថ្ងៃ​ច័ន្ទ ​បន្ទាប់​ពី​ប្រតិ​ភូ​គណបក្ស​ប្រជាជន​​កម្ពុជា​និយាយ​ថា ពួកគេ​មិន​ពិភាក្សា​អំពី​សំណើ​របស់​គណបក្ស​សង្គ្រោះ​ជាតិ​តម្រូវ​ឲ្យ​មាន​​សមាជិក​សភាពីរ​ភាគ​បី​ដើម្បី​តែង​តាំង​សមាជិក​​ថ្មី​របស់ គ.ជ.ប.​នោះ​ទេ​។

គណៈកម្មការ​ដែល​គណបក្សទាំង​ពីរ​បាន​បង្កើត​ឡើង​​កាល​ពីខែ​មុន​នេះ​មាន​បំណង​ជួយ​​ត្រួស​ត្រាយផ្លូវ​សម្រាប់​ឲ្យ​គណបក្ស​សង្គ្រោះ​ជាតិ​ទទួល​យក​​អាសនៈសភា​ចំនួន​​៥៥​​ដែល​​ គ.ជ.ប. និយាយ​ថា ​គណបក្ស​នេះ​ទទួល​​បាន​នៅ​ក្នុង​ការ​បោះឆ្នោត​កាល​ពីខែ​កក្កដា ។ គណ​បក្ស​សង្គ្រោះ​ជាតិ​បាន​ធ្វើ​ពហិការ​មិន​ទទួល​យក​អាសនៈ​ទាំង​នេះ​​អស់​រយៈ​ពេល​ប្រាំ​មួយ​ខែ​មក​ហើយ​​មក​ទល់​​ពេល​នេះ​ និង​កំពុង​ជំរុញ​ឲ្យមាន​ការ​​បោះ  ឆ្នោត​ថ្មី​ក្រោម​ការ​ដឹក​នាំ​របស់​ គ.ជ.ប.​ឯករាជ្យ​​។

លោក​ សម រង្ស៊ី និង​លោក​ កឹម សុខា បាន​ដឹកនាំ​ការ​ជួប​ជុំ​ប្រឆាំង​រដ្ឋាភិបាល​ចុង​ក្រោយ​ពីថ្ងៃទី​១៥ ​ខែ​ធ្នូ​ ដល់​ថ្ងៃទី​៤​ ខែ​មករា​​ដែល​នៅពេល​នោះ​សន្តិ​​​សុខ​ខណ្ឌ​ និង​មនុស្ស ​ស្លៀ​ក​ពាក់​សីុវិល​របស់​រដ្ឋាភិបាល​ដែល​​ពាក់​បូក្រហម​​នៅ​ដៃ​បាន​រុះ​​រើ​កន្លែង​តវ៉ា និង​បណ្តេញ​មនុស្ស​ចេញ​ពីទីលាននោះ​។

ពីរ​ថ្ងៃ​មុន​នោះ​​ ការ​ធ្វើ​កូដកម្មនៅ​​​​ទូទាំង​ប្រទេស​​​របស់​កម្មករ​រោង​ចក្រកាត់​ដេរ​​ដែល​បាន​ធ្វើ​ឡើង​ស្រប​គ្នា​នឹង​ការ​ហែក្បួន​របស់​​គណ​បក្ស​ប្រឆាំង​​នៅក្នុង​ទីក្រុង​ភ្នំពេញ​នោះ​​​​ត្រូវ​បាន​បង្ក្រាប​ដោយ​ហិង្សា​។​ យ៉ាង​ហោច​ណាស់​អ្នក​តវ៉ា​ប្រាំនាក់​ត្រូវ​បាន​កង​រាជ​អាវុធ​ហត្ថ​បាញ់​សម្លាប់​ និង​បាញ់​ឲ្យ​រង​របួ​ស​ជាង​៤០​​នាក់​ទៀត​។

លោក ជាម យៀប ​តំណាងរាស្ត្រ​ជាន់​ខ្ពស់​របស់​គណបក្ស​ប្រជាជន​កម្ពុជា​បាន​មាន​​ប្រសាសន៍​ថា គណបក្ស​កាន់​អំណាច​​នឹង​កោះ​ប្រជុំសភា​​ជា​លើក​ទី២​នៅថ្ងៃច័ន្ទ ចាប់​តាំង​ពី​ការ​បោះឆ្នោត​ខែកក្កដា​មក​។ លោក​បាន​មាន​ប្រសាសន៍​ថា សមាជិក​​សភា​៦៨​រូប​​របស់​គណ​បក្ស​​ប្រជាជន​កម្ពុជា​​នឹង​បោះ​ឆ្នោត​លើ​ច្បាប់​ថ្មីមួយ​ស្តី​ពី​ផ្លូវ​ថ្នល់​​ ​អនុម័ត​ថវិកា​ចំណាយ​​នៅ​អាណត្តិ​មុន​ និង​បោះ​ឆ្នោត​​តែ​ងតាំង​​សមាជិក​គណៈ​កម្មការ​រដ្ឋ​សភា​ថ្មី​ៗ​មួយ​ចំនួន​​។

លោក​ ជាម យៀប បានមាន​ប្រសាសន៍​ថា គណបក្ស​សង្គ្រោះ​ជាតិ​គួរ​ពិចារណា​​ឡើង​ វិញ​​​នូវ​​ផែនការ​ជួប​ជុំ​​​គ្នា​របស់​ខ្លួន​​។ “ឥឡូវ​នេះ​ខ្ញុំ​បានធ្វើ​សំណើ​ស្នើ​ឲ្យលោក សម រង្ស៊ី​ បញ្ជូន​មាន់​ជល់ទាំង​៥៥​របស់​លោក​​មក​ពិភាក្សា​ជាមួយ​មាន់​ជល់​របស់​គណបក្ស​ប្រជា​ជន​កម្ពុជា​នៅ​រដ្ឋសភា​”។

គណបក្ស​សង្គ្រោះជាតិ​បាន​ធ្វើ​ពហិការ​មិន​ចូល​រដ្ឋ​សភា​​ចាប់​តាំង​ពី​សមាជិក​សភា​គណ​បក្ស​​ប្រជាជន​កម្ពុជា​​​ត្រូវ​បាន​​ព្រះ​​មហាក្សត្រ​ នរោត្តម​​ សីហមុនី ឲ្យ​ស្បថ​ចូល​កាន់​តំណែង​កាល​ពីថ្ងៃទី​២៤ ខែ​កញ្ញា​ ។

លោក ជាម យៀប ដែល​ជា​ប្រធាន​គណៈ​កម្មការ​​ហិរញ្ញវត្ថុ​ និង​ធនាគារ​​រដ្ឋសភា​ដែរ​នោះ​​បាន​បញ្ជាក់​ថា តំណាង​រាស្ត្រ​ជាប់​ឆ្នោត​ទាំង​៥៥​រូប​របស់​គណបក្ស​សង្គ្រោះ​ជាតិ​​មិន​បាន​ទទួល​ប្រាក់​ខែ​ចំនួន​២.០០០ដុល្លារ​ និង​ប្រាក់​ឧបត្ថម្ភ​សម្រាប់​ធ្វើ​ដំណើរ​ក្នុង​រយៈ​ពេល​នេះ​ទេ​។

លោក​បានមាន​ប្រសាសន៍​ថា “ប្រសិន​បើ​ពួក​គាត់​​ចូល​រដ្ឋសភា​ និង​ស្បថ​នៅ​ព្រះ​បរម​រាជ​​វាំង​ដើម្បី​សុពល​ភាព​​រដ្ឋ​សភានោះ ពួកគាត់​​នឹង​ទទួល​បាន​ប្រាក់​ខែ​ចាប់​ពីថ្ងៃ​នោះ​ទៅ​”។

លោក​ ជាម យៀប បាន​លើក​ឡើង​កាល​ពីមុន​ថា ​រដ្ឋាភិបាល​អាច​បើក​ប្រាក់​ខែដែល​តំណាង​រាស្ត្រ​គណបក្សប្រឆាំង​​មិន​បាន​ទទួល​ បន្ទាប់​ពី​ពួកគាត់​ត្រូវ​បណ្តេញ​ចេញ​ពី​រដ្ឋសភា​​ពីរ​ខែ​មុន​ពេល​បោះឆ្នោត​កាល​ពី​ខែ​កក្កដា ប្រសិន​បើ​ពួក​គាត់​​ឈប់​​ធ្វើ​ពហិការ​​។

លោក សម រង្ស៊ី ដែល​ខ្លួន​លោក​ផ្ទាល់​មិន​ជាប់​ឆ្នោត​ជា​តំណាង​រាស្ត្រ​នោះ​ត្រូវ​បាន​​រដ្ឋា​ភិបាល​​រារាំង​មិន​​ឲ្យឈរ​ឈ្មោះ​​ដោយ​សារ​លោក​ត្រូវ​បាន​​តុលាការ​​ផ្តន្ទាទោស​ដែល​ក្រោយ​ម​ក​ត្រូវ​បាន​ព្រះ​មហាក្សត្រ​ នរោត្តម សីហមុនី ព្រះរាជ​ទាន​​លើក​លែង​ទោស​​កាល​ពីខែ​កក្កដា​ ហើយ​លោក​បាន​មាន​ប្រសាសន៍​ថា តំណាង​រាស្ត្រ​ជាប់​ឆ្នោត​​របស់​គណបក្ស​លោក​មិន​​ខ្វល់​នឹង​ប្រាក់​ខែ​ដែល​បាត់​បង់​នោះទេ​។

លោក សម រង្ស៊ី បានមាន​ប្រសាសន៍​ថា “ប្រាក់​ខែ​មិន​មែនជា​បញ្ហា​ទេ​​។ ពួក​គេ​មិន​អាច​បញ្ចុះ​បញ្ចូល​យើង​ឲ្យ​ចូល​រដ្ឋ​សភា​បាន​ឡើយ​។ យើង​អាច​រស់​បាន​ហើយ​ ហើយ​មាន​​មោទនភាព​ក្នុងការ​រស់​នៅ​ដោយ​សេចក្តី ថ្លៃ​ថ្នូរ​ជាមួយ​ការ​ឧបត្ថម្ភ​ផ្នែក​ហិរញ្ញវត្ថុ​ និង​សម្ភារ​ពីសមាជិក​គណបក្ស​សង្គ្រោះ​ជាតិ​​នៅ​ក្នុង​ប្រទេស​កម្ពុជា​ និង​នៅក្រៅ​ប្រទេស​។

ប្រធាន​គណបក្ស​ប្រឆាំង​រូប​នេះ​បាន​មាន​ប្រសាសន៍​ថា លោក​​រៃអង្គាស​បាន​ថវិកា​ចំនួន​៩០.០០០ដុល្លារ​នៅពេល​លោក​ធ្វើ​ដំណើរ​១០​ថ្ងៃទៅ​ប្រទេស​អូស្ត្រា​លី​ដែល​បាន​បញ្ចប់​កាល​ពីថ្ងៃអង្គារ​ ហើយ​ថា គណ​បក្ស​មាន​លុយ​គ្រប់​គ្រាន់​ហើយ​។ លោក​បានមាន​ប្រសាសន៍​ថា “ប្រជា​ជន​និយាយ​ថា ពួកគាត់​​នឹង​មិ​ន​​​ភ្លេច​​យើងទេ ​នៅ​ពេល​ណា​​យើង​​​​ត្រូវ​ការ​ជំនួយ​”៕ គឹមហឿន

(រាយការណ៍​បន្ថែម​ដោយ ហ៊ុល​ រស្មី និង​ គុ​ច ណារ៉េន)

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស