លោកនាយករដ្ឋមន្ត្រី ហ៊ុន សែន បានចុះហត្ថលេខាលើអនុក្រឹត្រមួយដើម្បីធ្វើនិយតកម្មឲ្យបានប្រសើរលើឱសថស្ថានដែលធ្វើអាជីវកម្មមួយពាក់ព័ន្ធនឹងឱសថនិងសញ្ញាបត្រក្លែងក្លាយ។
អនុក្រឹត្យនេះមានខ្លឹមសារថា “ អនុក្រឹត្យនេះមានគោលបំណងលើកកម្ពស់មនសិការវិជ្ជាជីវៈ ស្មារតីទទួលខុសត្រូវ ការគោរពច្បាប់ក្នុងការធ្វើអាជីវកម្មឱសថស្ថានប្រកបដោយវិជ្ជាជីវៈ ប្រកបដោយកិត្តិយសនិងសេចក្តីថ្លៃថ្នូរសម្រាប់សុខុមាលភាពរបស់ប្រជាពលរដ្ឋ”។
អនុក្រឹត្យថ្មីស្តីពីក្រមសីលធម៌របស់ឱសថការីមាន៧១មាត្រា។ អនុក្រឹត្យថ្មីនេះហាមមិនឲ្យមានការចែកចាយឱសថក្លែងក្លាយ និងហាមមិនឲ្យមានការប្រើឋានៈដែលមិនទាក់ទងនឹងវិជ្ជាជីវៈ។
មាត្រា៨ចែងថា “ ក្នុងគ្រប់ទម្រង់ ឱសថការីមិនត្រូវប្រព្រឹត្តសកម្មភាពណាមួយដែលធ្វើឲ្យប៉ះពាល់សុខភាពសាធារណៈទេ។ ឱសថការីត្រូវតែចូលរួមក្នុងសកម្មភាពប្រឆាំងការបោកប្រាស់ ជាពិសេសជៀសវាងការផលិត ការចែកចាយនិងការទទួលប្រាក់ចំណេញពីឱសថក្លែងក្លាយ និងឱសថគុណភាពអន់ ផុតរយៈពេលកំណត់ និងមិនអាចប្រើបាន”។
បើទោះជាគ្មានតួលេខគួរឲ្យជឿបានក៏ដោយ ក៏ក្រសួងមហាផ្ទៃទទួលស្គាល់ថា ឱសថក្លែងក្លាយ គឺជាបញ្ហាដ៏ធំមួយ។
ឱសថក្លែងក្លាយភាគច្រេើនបំផុតច្រើនតែជាថ្នាំគ្រាប់។ ពេលខ្លះ វាមានសារធាតុពុលដូចជាប្រេងម៉ាស៊ីន និងអាចធ្វើឲ្យមនុស្សចង់ក្អួតចង្អោរ ឬស្លាប់។
មាត្រា៥៦ចែងថា ឱសថការីដែលត្រួតពិនិត្យតាមដានឱសថស្ថានផ្សេងទៀត ត្រូវមានឯករាជ្យភាព និងមិនគួរត្រូវបានអនុញ្ញាតឲ្យគ្រប់គ្រង និងធ្វើអធិការកិច្ចអាជីវកម្មរបស់ខ្លួនឯងឬអាជីវកម្មរួមគ្នា ឬសាច់ញាតិឈាមជ័រតែមួយឡើយ”។
មាត្រា៣០ចែងដែរថា ត្រូវលក់ឱសថ ក្រោយពីឱសថការីផ្សំដោយខ្លួនឯង ដោយវេជ្ជបញ្ជា ហើយត្រូវប្រព្រឹត្តដោយយកផលប្រយោជន៍សុខភាពរបស់អតិថិជនជាធំ។ គួរតែផ្តល់ឱសថឲ្យអ្នកជំងឺដែលត្រូវការជាចាំបាច់ ប៉ុន្តែមិនមានលទ្ធភាពទិញបាន។
លោក ម៉ម ប៊ុនហេង រដ្ឋមន្ត្រីក្រសួងសុខាភិបាល និងលោក ហេង ប៊ុនហៀត ប្រធាននាយកដ្ឋានឱសថសារវន្ត និងចំណីអាហារ នៃក្រសួងសុខាភិបាល មិនអាចទាក់ទងសុំការអត្ថាធិប្បាយបានទេ។
លោក ម៉ៅ ដារ៉េត អនុប្រធានសមាគមឱសថការីកម្ពុជា ដែលមានសមាជិកមានវិជ្ជាជីវៈជាង៦០០នាក់ បានស្វាគមន៍អនុក្រឹត្យថ្មីស្តីពីក្រមសីលធម៌របស់ឱសថការី ដោយលើកឡើងថា វាកើតចេញពីបទពិសោធន៍របស់ប្រទេសផ្សេងទៀត។
លោក ដារ៉េត បានមានប្រសាសន៍ថា “ជាពិសេស វានឹងជួយឱសថការីមិនឲ្យធ្វើខុសពីវិជ្ជាជីវៈរបស់ខ្លួន”។ លោក ដារ៉េត បានមានប្រសាសន៍បន្តថា នៅក្នុងរាជធានីភ្នំពេញ មានឱសថស្ថានជាង៦០០កន្លែង៕ប៊ុននី